Boy Ma Ayra Ma LUK Ɓiirimma 1 - Boy Lonana

Tin u boyna vi Luk

¹ Bananna Tewfil, suuna bolow ɓii tlesuu li ay jew dukuygina.

² Hu magaa masira asi ɓakaygi kay dlara aygi humuɗ fun suu wi tle asina ay u irisi fok jewna, sunda kosira ni a di boy ma vi Lonna.

³ Cecemmi an may ni fi eŋga a hal u dla mayra li ay fok jew ndaɗta. Na may ni irin jivira a an ɓiiriŋsina ha ki dew dew halaŋ.

⁴ An laɗ ni, a aŋ wi u tlesuu aŋ haɗasi ay ki fok jewna ana ni gasiya.

Sa sunda di ki kay dla vuɗta vi Jaŋ ma mbus batemma

⁵ Hu basara Herod ay a mulna vi suu Yudena ni, sa li ɓivunna sem ana Zakari, nam u ndarayamma ni suu vi Abiana. Caamba yaɗ ana Elisabet. Ndaɗ ni hu njafna vi Aaron, mul ŋgol ma li ɓivunna.

⁶ Asi ni suu ɗegeena. Asi hum u gaɗta vi Lonara halaŋ lay.

⁷ Goo ka kosiɗi. Elisabet ka vuɗɗi asi mbuɗ ki maara bay vuɗa.

⁸ Faɗta dew Zakari a li ɓivunna maŋ Lona, ŋguyra mba ni kam u suu mamsina.

⁹ U gaɗta vi suu li ɓivunna ni asi ŋgaɓam a ŋgal mbul ma his fayatna hu Ziŋ Lonara.

¹⁰ Nam ŋgal mbul ma his fayatna na ni suuna moli bunsu cen Lona may.

¹¹ Sa sunda huulona ndi ki ii Zakari. Nam coli hu givin ma togolla bik njufna hu lii ŋgal mbul ma his fayatna.

¹² Zakari wam na ni tam dlaka, mbuɗ ki ndaana.

¹³ Sa sunda huulona dam ana, «Li ndaaɗi Zakari. Lona humuŋ cen maŋga ha wa. Caaŋga Elisabet hin vuɗ goona. Aŋ hin tinim sem ana Jaŋ.

¹⁴ Aŋ hin li furira ŋgol cocoo. Suuna hin furi kay vuɗ mamba coco lay.

¹⁵ Nam hin mbuɗ sa ŋgolna ii Lona. Nam hin ka ci summaɗi lay. Hu buu ma nam vuɗ kina, Musuk Lonara hoɓom ay ki hu sum day.

¹⁶ Nam hin holoŋ ii goryoŋ Israelna ay coco eg Lona mul masina.

¹⁷ Lona hin ɦam Musuk mamba a tuɗ fokom u saɓak ma vi sa jok vun Lona Elie. Nam taɓ duk suu ŋgolona u goryosi dew. Suu hurusi cona mbuɗ ki ɗegee, nam hin min huu suu njaf ma vi Lonna ki jiviya.»

¹⁸ Zakari di sa sunda huulona ana, «Dla ndaɗta hin li ni ana mege? Ami u caanda ki maa may ni ge?»

¹⁹ Sa sunda huulona dam ana, «Ni an Gabriel ma col ay fok Lona a lam sun mambana. Nam gan ay ni a daŋ Boy ma Ayra kiyo.

²⁰ Aŋ tin huruŋ ka kay boy nammaɗi ni, aŋ hin mbuɗ ki ndumuwa. Vunuŋ hin mal ki ni falira goroŋŋa hin a vuɗ kira tuwa.»

²¹ Suu moli a juɓumma saa ana nam kak karam kalafi na ni nanage?

²² Nam kal ay ki wanni, ka ɓakasi oloɗi. Suu molina wi ana va ndi ay ki irim hu Ziŋ Lonara wa. Nam dasi u komu, vunum ka ɓakgi.

²³ Zakari daɓ sunda daɓmi, kal ay ki tuɗ voo.

²⁴ Ŋgoo daganni Elisabet hin vi wiina gaw. Ndaɗ ŋgay taɗ li tilna vadl. Ndaɗ di ana,

²⁵ «Gola ni dlara Bu Suuna landa egenda. Nam min a tlan zolona ki kan duk suuna u ndaɗta.»

Sa sunda di ki kay dla vuɗta vi Yesu

²⁶ Hu til ma karkiyana Lona sun sa sunda huulona aya, yam ana Gabriel, hu zi ma Nazaretna.

²⁷ Vo vi go tamara yaɗ ana Mari. Sa ɗumuɗna sem ana Yosef. Ni hu njafna vi mulna David.

²⁸ Sa sunda huulona kal varaɗu daɗ ana, «An gak deɓpa Mari, ndakŋi goora Lona lak jivira egekka. Bu Suuna ka u ndaku.»

²⁹ Mari mbuɗ ndaana ko boy namma, Ndaɗ joɓ taɗ ana u gi deɓ ndaɗta ni ana mege?

³⁰ Sa sunda huulona daɗ ana, «Li ndaaɗi, Mari. Ndak fi jivira fok Lona wa.

³¹ Ndak hin vi wiina, hin vuɗ goona, tinim sem ana Yesu.

³² Nam hin mbuɗ ŋgola. Asi hin yam ana Goŋ Lona ma Kolona. Bu Suuna hin kakam a mulna balam bum David.

³³ Nam hin li ni a mulna kay suu Israelna gak gak, mul mamba ka daɓ kiɗi.»

³⁴ Mari di sa sunda huulona ana, «Dla ndaɗta hin li ni ana mege? An ka buu u saa njufi may ni ge?»

³⁵ Sa sunda huulona daɗ ana, «Musuk Lonara hin mbay kaku, saɓak ma vi Lo ma kolona hin kuluɓ ki kak ko ŋgussa na. Goo ma ndak hin vuɗumma suuna hin yam ana Goŋ Lo ma gasina.

³⁶ Wayakka Elisabet suuna di kaɗ ana ndaɗ ni cara bay vuɗa, ndaɗ li tilna ki ca ni karkiya u wiina.

³⁷ Va dum Lona kaɗi.»

³⁸ Mari hin di ana, «An hin ni goora li sunda maŋ Lonara, dlara nam a landa egenda li ay ko aŋ dira na.» Sa sunda huulona gi tam hiniɗ gaw.

Mari mba gol Elisabet

³⁹ Hu li namma Mari tuɗ zak zak hu mbassa ɦinira yaɗ ana Yude.

⁴⁰ Ndaɗ kal hu ziŋ Zakarina, gi deɓ Elisabet.

⁴¹ Ndaɗ Elisabet hum deɓpa vi Mari na ni, goona gijaŋ ŋgen tam huruɗ gaw. Musuk Lonara oy ki hu Elisabet.

⁴² Ndaɗ sawalla kolo eŋga ana, «Lona ɦak ŋgolla a su ndarayak boyogina halaŋ. Saɓak mamma ka eg goo ma ndak vuɗumma lay.

⁴³ An na ganak may ni, ndak su Bu Suu manna mbay ki varan ni nanage?

⁴⁴ An humuk deɓ makka na ni, goron ma hurunna gijaŋ furira ŋgen tam gaw.

⁴⁵ Furira ka kaku kay ndak hum u boy ma Lona dakŋana.»

Mari gi soolla furira

⁴⁶ Mari di ana, «An geleɗ Lon Bu Suuna

⁴⁷ hurun oy u furira kay Lo ma suɗta.

⁴⁸ Nam wi hahaw goomba sunda, cecemmi suuna halaŋ hin furiyunu.

⁴⁹ Kay saɓakŋa vi Lona ma sem tiina lan dlara ŋgolla egenu.

⁵⁰ Nam hurum haɗ kay suu hum umma.

⁵¹ Nam tak saɓakam ki u komu, nam njay suu ŋga tasina kiyo.

⁵² Suu kaki kolona nam dikisi ki kaŋgaa. Suu kaki kaŋgana nam jokosi ki koloo.

⁵³ Suu mayra casina nam hoɓosi kiyo, suu begera nam dikisi ki u kosi ma vadlna.

⁵⁴ Nam njun suu mam suu Israelna, humum ka maa kay jivira nam lasiraɗi.

⁵⁵ Maŋ Abraham u njafam na gak gak ko nam di ay ki maŋ somoyoygi suu jewna na.»

⁵⁶ Mari kak vi Elisabet va ma til hindi, hin hoŋ vo tuwa.

Vuɗta vi Jaŋ ma mbus batemma

⁵⁷ Elisabet tiliɗ ma vuɗta ndak ndakŋi, ndaɗ vuɗ goo njufna.

⁵⁸ Suu maɗ suu hu zina u somoyoɗ hum ana Elisabet vuɗ wani, asi taɓ li furira u ndaɗu kay goo ma Lona u jivi mamba ɦaɗna na.

⁵⁹ Hu buu ma kalavandina asi a caw ɗiw goona. Asi min a tinim sem ana Zakari u sem bumu.

⁶⁰ Sum dasi ana, «Ҥawaa. Sem ana Jaŋ.»

⁶¹ Asi daɗ ana, «Sa ma hu njafak ma yam ana Jaŋ kaɗi.»

⁶² Asi joɓ bum ana, «Aŋ min a yi sem goona ni ana mege?»

⁶³ Zakari joɓosi ana ɦam magaara ay nam a ɓiirim sem haa. Nam tinim sem ana Jaŋ. Asi viɗ ki hu dla ndaɗta na dawla.

⁶⁴ Asi gola ni Zakari vunum mal ki gaw. Nam gijaŋ ɓakŋa, geleɗ Lona u delem kolo eŋe.

⁶⁵ Suu hu zina halaŋ mbuɗ ki ndaana. Asi ɓak dlara wanni halaŋ hu mbassa ɦinira yaɗ ana Yude.

⁶⁶ Suu hum boy namma halaŋ gijaŋ saara ana, «Gogoo namma hin mbuɗ ni ko mi nage?» Saɓakŋa vi Bu Suuna ka u nam gasi.

Soolla jok vun Lona vi Zakari

⁶⁷ Bum Zakari Musuk Lonara mbay egem day ni nam gijaŋ di boy ma vi Lonna ana,

⁶⁸ «Geleɗ Bu Suuna, Lo ma vi suu Israelna. Nam tin saa mamba kay suu mamma a suɗusi kira.

⁶⁹ Lona tin saɓak mamma hu njaf suu vi mulna Davidna a suɗusi kira.

⁷⁰ Ni boy ma nam dam ay ki fok jew fun suu jok vun Lonna.

⁷¹ Nam di ana nam hin suɗuygi ki ko suu babali maygisina u suu gonok maygisina lay.

⁷² Nam tak min mamba maŋ somoyoy suu jewna. Humum gam kay bana mamba nam vaɗ u aygira.

⁷³ Lona suu tam ay fun Abraham, buygi ma jewna.

⁷⁴ Nam suɗuygi ki ko suu babali maygisina, hin hiniygi a lam sun mamba bay ndaana.

⁷⁵ A aygi mbuɗ suu ɗegeena fokom gak gak hu iiri mayra hu buuna tew tew.

⁷⁶ Aŋ, goonna, aŋ hin mbuɗ ni a sa jok vun Lo ma kolona. Aŋ hin tuɗ fok Bu Suuna a minim voɗ mamba ni aŋ lay.

⁷⁷ A tak maŋ suu mamma ana nam suɗusi ki u bulumba bulumusi coosira kira.

⁷⁸ Lona u min mamba hin kiɗik mamba weleɗ kaygi ko faɗta na.

⁷⁹ A gi u suu ay ki duk ndufundana kiyo, asi suu ay fun maɗnana. Kay tuɗuy hu voɗta heɓpa.»

⁸⁰ Goona wuli ŋgolo, mbuɗ yal cocoo. Nam kaki bagi gak gak tew hu buu ma nam tak tam ki ii suu Israelna.