KOLOSNA 4 - Boy Lonana

¹ Agi maliyasina, lagi mborɓii magisina jivi ɗegee, humugi gagi ana malagina ka kolo huulona may.

Pol gaɗ suuna

² Cenegi u ɗegeera, kakagi saɓak hu cenda, cen Lona u gi deɓpa.

³ Cenegi kamiya, kay Lona mba ɦami voɗta jivira a di boy mamma ŋgayna vi Kristu, an ka cecemi daŋgayna ni kay boy mamma ŋgay namma.

⁴ Cenegi kanu kay an a ɓak boyna ki jivi teteɗ a suuna wam kiyo, ko Lona min an lira na.

⁵ Poyogi u nera duk suu bay vina, lagi jivira hu li ma agi kana.

⁶ Ko boy magina mba li tew tew jivi a sa fi va umu, wagi yal a hoŋ dira maŋ gegelay u jivira.

Gi deɓpa daɓ daganda

⁷ Wayagina Tisik, ndaran goo ma njunun a sunda vi Bu Suuna, min dagi ki kay boy manna halaŋ.

⁸ An gam ha egegi kay nam tuɗ dagi dlaamira, nam hin tuɗ ha a ɦagi saɓakŋa hurugiya.

⁹ Asi ka tuɗ ha u tasi u Onesim wayay ma ɗegeena, nam ay ni dukugiya, asi hin dagi kay dlara ka li tanira halaŋ.

¹⁰ Aristark ma ka hu daŋgayna u an tanina gagi deɓpa u Mark go ndusu Barnabasna (agi lay ni hum boyna ki kay Mark lini nam mba ha dukugi wa ni lagina jiviya).

¹¹ Yesu ma yam ana Justusna gagi deɓpa, suu hindi asina ni suu Juif suu vina ka li sunda kay Mul Lonara u anna, asi njun un saɓak cocoo.

¹² Epafras ni wayagina lay gagi deɓpa nammi sa sunda vi Yesu Kristu ma cen Lona kagi tew tewna, kay agi mba kak saɓak hu ŋgussa ko suu ŋgolona na, kay min tagi a li sunda jivira ɗegee ta Lona miniɗta.

¹³ An ndak di kam ana nam ɦal tam kagi cocoo, kay suu Laodise u suu Hierapolisna.

¹⁴ Luk banaygi ma dokdorna u Demas gagi deɓpa.

¹⁵ Gi deɓ gorseygi suu Laodisena, u Nimfa, u suu vi Kristu suu ka li tokka hu ziimma.

¹⁶ Hu li ma agi fagi magaara wa ni ndumuɗ wani, ɦaɗ maŋ suu Laodisena, asi ndumuɗ may. Agi lay ni ndum magaara sunugira ay Laodisera ki may.

¹⁷ Agi di maŋ Arsip, «Gol taŋ jivi kay sunda yaŋ kaɗ vi Bu Suunara laɗ u voɗoɗu.»

¹⁸ Ɓiirigi boyna ha ni u kon tanda Pol, gagi deɓpa, humugi maa kay an ka hu daŋgaynaraɗi. Ko oora kak u agiya.