KOLOSNA 3 - Boy Lonana

¹ Lona paɗagi ay ki hu miɗna mbuɗugi kolo iiri u Kristu, halagi tlesuu kolo huulona hu li ma Kristu ka kaki hu bik ko ma njufna vi Lona.

² Loɓogi tagi u tlesuu ha kolo huulona, ka kay tlesuu kay ndaŋgaranaɗi.

³ Agi miɗigi ki wa, iiri magira ni ŋgay eg Kristu u Lona.

⁴ Iiri magira gasira ni Kristu, hu li ma nam hin tak tam kina ni agi hin mbay ni u nam may, fagi ɓorow magina ni hu bibiŋil mamba.

Iirira basira ura wilira

⁵ Cagi dla mayra cora egegi hu duliyara wanda ki halaŋ, boy zoŋga, dlara ka teteɗɗira, bay ɗegeera, saara cora, huu ma ŋgiziɗ tlena, (ŋgiziɗta ŋgiziɗ tlena ni ko goɓ fulinara na).

⁶ Kay cora ko wanni na ni yara vi Lona hin mba kay suu ka hum umbina.

⁷ Jew mayra agi ni mborɓiina vi cora agi poy ni ko ndaɗta na may.

⁸ Cecemi agi noy dla ndaɗta ki halaŋ, yara u huu ma ɓeŋga u honira, ŋgulla, u boy ma zolona kal ki funugiɗi.

⁹ Kaboy duk tagiɗi, kay agi noyogi sa ma basina ki u sun mamba wa halaŋ.

¹⁰ Kay mege agi cukugi sa ma wilina ki kagi wa, sa ma wilina mbuɗ ha fok wili na tew tew tli tam ko Lona ma minimma na, gak gak nam wi Lona ki gasi.

¹¹ Ni kay ndaɗta sa ma Juif kaɗi, sa ma ka Juifɗina kaɗi lay, ana sa ma ɗiwim cawina ɗowba bay cawra kaɗi lay, suu ka wi dlaɗina u suu haɗ dla kaɗina, mborɓiina u suu vuɗina, Kristu ni halaŋ hu gegelay halaŋ.

¹² Agi ni suu vi Lonna, Lona managiya, nam managiya agi mba li ki a suu mamma ni kay ndaɗta agi cukugi dlara jivira kagiya u hoŋga hoŋ yamba kaŋgara lalamba u ɗigilla.

¹³ Siɓigi dlara vi tagira tagira, lini sa maa ka tii tam eg ndaramma ni agi hinigi cora vi tagira duk tagiya tagiya, hinigi cora vi ndarayagina ki ko Bu Suuna hinigi magira kira na may.

¹⁴ A su saɓak bella ni minda, ni dlara a taɓagi dukugi a mbuɗugi ɗegeera ni ndaɗ dew.

¹⁵ Ko heɓpa vi Kristu mba li hurugiya, Lona yagi ay u tagi halaŋŋi hu heɓ ndaɗta, lagi ko mbalatara dewra na u gi deɓpa.

¹⁶ Ko boyna vi Kristu u ɦiz mamba halaŋ kak hurugiya haɗagi tagiya gaɗagi tagi duk tagiya tagiya u ne mayra jivira. Gagi soolla gi deɓpa maŋ Lona u hurugi halaŋ, gagi soolla gi deɓpa ɗegeera, u soolla furira ta Musukka haɗagirara.

¹⁷ Hu tlesuu agi lasina, dasina lay halaŋ lasi u sem Bu Suuna Yesu, gagi deɓ Lona Buna.

Taɓpa duk ɦoŋ suuna hu iirira wilira

¹⁸ Boyogina humugi u njufuyugiya, ni agi a li fok Bu Suuna ni na may.

¹⁹ Njufina minigi boyogogiya, lasi va ma co egesiɗi.

²⁰ Agi gorra, magira fok Bu Suuna ni ana humugi u somoyogiya ni ii Lona jiviya.

²¹ Agi somoyoŋ gorra lagi goryogi co a soorosi tasi kiɗi.

²² Agi mborɓiina humugi u maliyagina kaŋga kay ndaŋgara tani lagi jivira ni kosi ni fokosi hu li ma asi gologina ɦawaɗi, humugi usi u huu ma jivina ni kay humba agi hum vun Bu Suunara.

²³ Lini agi li ni sunda lay ni, laɗ u hurugi halaŋ ko agi li ni sunda vi Bu Suuna na, ka ni sunda vi suuna ɦawaɗi.

²⁴ Humugi gagi kay Bu Suuna hin warakagiya, agi hin fagi va ma nam hinim maŋ suu mamma a jonana, kay mege saagi ma agi sunum gasina ni Kristu.

²⁵ Sa ma li cora hin fi warakŋa ni kay dlaamba cora may, kay mege Lona ka ɓorow ii suunaɗi.