KOLOSNA 1 - Boy Lonana

Gi deɓpa

¹ Ni an Pol, u minda vi Lona, sa vovoɗta vi Yesu Kristu, u wayaygina Timote.

² Maŋ suu vina vi Lona suu ka hu Kolosna asi ni gorseygi suu ɗegeena hu Kristu. Ko Buygi Lona ɦagi oora u heɓpa.

Pol cen Lona kay suu vina hu Kolos

³ Ami gi deɓ Lona Bu Bu Suuna Yesu Kristu hu cen mamira tew tew kagiya.

⁴ Kay ndaɗta ami hum kay viigira hu Yesu Kristu, u min magira agi min suu vina vi Lona halaŋga.

⁵ Hu li ma Boy ma Ayra, boy ma gasina, mbay varagi tani jewra tagi mini kay juɓpa agi hin faɗ ha kolora. Viigira u min magira coli ni kay va ma agi tin hurugi kamma, ka juɓugi koloo.

⁶ Boy ma Ayra njay kiyo, mbaa paɗvunna ki hu duliyara halaŋ, ko nam li ay dukugi jew day hu buu ma agi hum kay oora vi Lona, wagi gasi ndaɗta lay.

⁷ Epafras ndarami ma sunda haɗagina ni namu, nammi sa ɗegeena vi Kristu mala sunda ko ami na may.

⁸ Nam dami kay minda Musukka ɦagira hurugira.

⁹ Ni kay ndaɗta ami ka hin cenda cen kagira kiɗi, ay hu buu ma ami hum kagina day, ami joɓ Lona kay nam mba hoɓogi u wira vi min mamba, kay Musuk mamba mba ɦagi nera u yal mamma.

¹⁰ Ni agi hin poy ko Bu Suuna minda na, li ni dlara nam minda lay. Ni agi hin li sunda jivira a wulugi fok hu wiigira kay Lona.

¹¹ Ami joɓomi Lona kay nam mba ŋgomogi u saɓak mamma bibiŋilna ni agi hin ndak siɓ tlena halaŋ u ɗigilla.

¹² Gagi deɓ Buna u furira, kay nam mbuɗugi ndaki a fi tlesuu Lona hinisi maŋ suu mamsina ha kolo hu mul mamba hu kiɗikkana.

¹³ Na nam buɗuygi ay ki hu saɓak ndufunda, cukuygi ki hu mulla vi gorom ma nam minimma.

¹⁴ Gi deɓpa ŋgolla kay buɗ maygira, kay cooygira daɓ kira.

Kristu u sun mamba

¹⁵ Kristu, ma suuna wam u irisina, tli tam u Lona ma bay sa wam u irimma, nammi gorom ma jewna, ŋgol su tlesuu nam lasina halaŋ.

¹⁶ Lona min tlesuu kolo huulona, kaŋga kay ndaŋgara lay halaŋŋi u namu, tlesuu suuna wasina u suu sa ka wasiɗina, dlamba mulla, u eŋga, u ŋgolla, garaŋga. Lona lasi halaŋŋi u namu ni mam nam lay.

¹⁷ Nam ay ni jew tlesuu lasina halaŋ, tlesuu asina halaŋ ka coli hu liisi ni umu.

¹⁸ Nammi yamba vi mbalata suu vi Kristuna, iirira wilira gijaŋŋa ha ni u namu. Nammi goo ma vuɗ jewna, ma paɗ ki kolo hu miɗna iiri jewna lay, kay a kak a ŋgolla vi tlena halaŋ.

¹⁹ Lona min a ndak mamba halaŋ kak hu goromma.

²⁰ Ni na may nam min taɓ tlesuu hu duliyara halaŋ u nam hu goromma. Lona mba heɓpa kay duliyara u miɗna vi goromma hu gu garakŋa, ni nam taɓ dukum u tlena halaŋ u namu, hu ndaŋgara lay kolo huulona lay.

²¹ Agi may ni li ay ki jewni eg Lona day, agi li ay jewni suu mam suu babalira, kay saara cora agi ka laɗta.

²² Cecemi u miɗna vi goromma fam hu mbalatamma, Lona taɓagi dukugi u namu, kay a mbuɗugi fokom teteɗ bay cora, bay ŋgulla.

²³ Ni kay ndaɗta agi kak saɓak hu viigira, coli eŋ kay ura tinira, hinigi juɓ magira ay day day hu li ma agi hum Boy ma Ayrana kiɗi. Boy ma Ayra namma dam ki maŋ suuna hu duliyara halaŋ, ni an Pol mbuɗ a sa sunda ni kamu.

Sunda vi Pol duk suu vi Kristuna

²⁴ Cecemi an li furira hu wihawra an ka faɗ kagira. Wihaw mayra an ka faɗ eg mbalatan wanda, ni an faɗ ki ni vun wihaw mayra li ka eg Kristu tuɗira kay mbalatamu. Mbalatam ni suu vi Kristuna.

²⁵ An mbuɗ ni sa sunda vi suu vi Kristuna, ni kay sunda Lona ɦanda a laɗ kagira, nam ɦan sunda a dam boy mamma ki u voɗomu.

²⁶ Ni a di ana dlaamba ay ki ŋgay day day, sa warna ka waɗɗira, ni nam takaɗ ki cecemi maŋ suu mamsina.

²⁷ Lona min a takasi ɦizza u jivira vi dlaamba ŋgayra kiyo, maŋ suu mamsina duk njaf suuna halaŋ. Dlaamba ŋgay ndaɗta ni ana, Kristu hurugiya ka ɦagi saara eŋga kay agi hin fi ɓorow magina hu bibiŋil Lonara.

²⁸ Ni kay ndaɗta ami di ki kay Kristu maŋ suuna halaŋ. Ami neesi yasi kiyo haɗasi lay u neemba halaŋ kay colosi fok Lona ko suu ŋgolona na hu taɓpa u Kristu.

²⁹ Kay a li u sun ndaɗta wani, an li sunda njogoɗ u saɓak ma Kristu ɦannana, saɓak namma li egen ni namu.