KALKIRA 9 - Boy Lonana

Dlara mbuɗta vadlla u yoorina

¹ Yawe di Moiz ana, «Tuɗ vi Faraw dam ana, Yawe, Lo ma vi suu Hebrena di ay ana, hinin suu mansina asi tuɗ sununu.

² Lini aŋ ka min a hinisiɗi olo ka min ana asi tuɗɗi ni

³ Yawe hin tin kom kay yoori suu ka hu mbas maŋgana halaŋ, kay kulumina, kay korra, kay jamballa, kay mbutlugina u timigiina, hin li kasi ni mbogom ma dlam cona.

⁴ Yawe hin ɓorow ii yoori suu vi suu Israelna ki u yoori suu vi suu Egiptena, yoo maa ka hin miɗ vi suu Israelnaɗi.»

⁵ Yawe ŋga buuna ki di ana, «Vin wanni Yawe hin li dla ndaɗta hu mbassa tani.»

⁶ Tuɗ vin maɗiira ni Yawe li gasi na may. Yoori suu vi suu Egiptena miɗ ki halaŋ, may duk yoori suu vi suu Israelna goo maa na dew lay miɗ kaɗi.

⁷ Faraw sun ay mba gol yoori suu vi suu Israelna haa, fiya ni maa dew lay ni miɗ kaɗi. Na lay ni Faraw so hurum gak gak ka min a hin suu Israelna cuk kiɗi.

Dlara mbuɗta karkiyara u kolla

⁸ Yawe di gi Moiz u Aaron ana, «Oyogi duk kogi u bondi ma hu dagirana.» Moiz tuɗ cukum kolo huulona fok Faraw.

⁹ Nam hin njay kom ha ki kay yam mbassa Egiptera halaŋ. Gugum namma hin mbaa tuguɗi kolla kay suu warna lay, kay yoorina lay, hu mbassa Egiptera halaŋ.

¹⁰ Asi ko bondi ma dagi namma kosiya, tuɗ col fok Faraw, Moiz cukum kolo huulona, nam mbaa tuguɗi kolla kay suu warna u yoorina halaŋ.

¹¹ Suu li kumuna suu Egiptena ka ndak a col fok Moizɗi kay tasi ki cuki kolla ni halaŋ u suu Egiptena bel bel lay.

¹² Na may Yawe so huu Faraw gak gak ka min a hum vun Moiz u Aaron ko Yawe dira naɗi.

Dlara mbuɗta kiɗisiyara u dlaŋmagina

¹³ Yawe di Moiz ana, «Col kolo maɗii na feɗet tuɗ tak taŋ ii Faraw dam ana, Yawe, Lo ma vi suu Hebrena di ana Hinin suu mansina asi tuɗ sununu.

¹⁴ Kay wanda ni an sun dla cora ay ni kaŋ taŋga may, kay suu sun maŋsina may kay suu maŋsina halaŋ lay. Kay a aŋ wi ki ana sa ma ko ndal an na ka ga kay ndaŋgara taniɗi.

¹⁵ Lini an mina ni an li ka caŋ ki u tuguɗira wa, aŋ u suu maŋsina halaŋ, aŋ li ka bulum ki kay ndaŋgara wa lay.

¹⁶ An hiniŋ iiri tu ni a takaŋ ki ni saɓak manna. Ni kay a sen tii ki kay yam mbassa halaŋ.

¹⁷ Aŋ so huruŋ gak gak ka min a hinin suu mansina tuɗɗi.

¹⁸ Vin maɗii faɗta ko wanda na an hin si dlaŋmagina u babaana kay ndaŋgara, dlaŋmagi ma ko namma na bay si hu mbassa Egiptera hu uɗta tin ay dayra na tuwa.

¹⁹ Cemi ni aŋ koɗ yoori maŋsina halaŋ ki voo, u tlegeyeŋ suu daŋŋa halaŋ suu ka hu senenana suu warna u yoorina, ma mba ka voɗina, dlaŋmagina si kasi wa ni casi ki halaŋ halaŋ.»

²⁰ Duk suu sunda vi Faraw halaŋ suu may suu li ndaa boy ma vi Yawena ŋgay suu masisina u yoori masisina ki voo.

²¹ Sa ma caa yam ka kay boy ma vi Yawena ɗina, hin suu mamsina u yoori mamsina ha ki bagiya.

²² Yawe di Moiz ana, «Maɗ koŋ kolo huulona nam si dlaŋmagina ay ga kay yam mbassa halaŋ, kay suu warna, kay yoorina, kay usu ma hu senena lay, hu mbassa Egiptera halaŋ.»

²³ Moiz tli tokolo mamba kolo huulona Yawe sun babaana u dlaŋmagina aya, welera liya, lona bay cocoo, Yawe hin dlaŋmagina si kay yam mbassa Egiptera halaŋ.

²⁴ Dlaŋmagina, lo ma bayra tlumi u dlaŋmagina, lo namma li saɓak cocoo, day day hu mbassa Egiptera ni lo si ka na dew tuɗi.

²⁵ Hu mbassa Egiptera halaŋ, dlaŋmagina ci tlesuu hu senenana ki bel bel. Suu warna u yoorina, dlaŋmagina ŋgal usuna ki lay, bow ŋgusugi suu hu senenana ki ga lay.

²⁶ Dlaŋmagina hinni mbassa Gosenda doy hol, ni li ma suu Israelna cuki huna.

²⁷ Faraw yi gi Moiz u Aaron ha dasi ana, «Ndaɗta wanni an li coo Yawe ni sa ma ɗegeena, ami u suu mansina ni suu cona.

²⁸ Cenegi Yawe nam hin sira na ga, an hin hinigi agi tuɗa agi ka juɓ ta ta oloɗi.»

²⁹ Moiz dam ana, «Hu li ma an kal ki doŋ kaana wa ni, an hin tli kon kolo fok Yawe, babaana hin seŋa, dlaŋmagina ka li oloɗi, ni kay a aŋ wi ki ana malaŋ ndaŋgara ni Yawe.

³⁰ May aŋ u suu sun maŋsina an wi ana agi ka li ndaa Yawe, Lona tuɗi.»

³¹ Barawra u wana ɓeŋ kiyo, kay wana fam ki ni u wiina, barawra gijaŋ ɓora may.

³² May wa blena ɓeŋ ka kiɗi kay nam ka li zakgira.

³³ Moiz kal ay ki vi Faraw, kal ki doŋ kaana may ni, yow kom kolo eg Yawe, babaana u dlaŋmagina seŋ gaw, lona ka si kay ndaŋgara oloɗi.

³⁴ Faraw wi ana lona u babaana u dlaŋmagina ka oloɗi ni nam li cora olo. Nam u suu sun mamsina so hurusiya.

³⁵ Faraw so hurum gak ka min a hin suu Israelna a cuk ki ko Yawe di ay fun Moizza naɗi.