KALKIRA 6 - Boy Lonana

¹ Yawe di Moiz ana, «Cemi aŋ hin wi dlara an hin a laɗ eg Farawda. Nam hin hinisi tuɗ ki ni u doolera, nam hin dikisi ay ki hu mbas mamba ni u saɓakŋa.»

Bu Suuna hoŋ yi Moiz a mbara

² Lona ɓak Moiz dam ana, «Anni Yawe.

³ An tak tan ay ki ii Abraham, ii Isaak, ii Yakob ni El Saday, na may an tak tan ka irisi u sen ma Yawe naɗi.

⁴ An vi galamba u asi ni a ɦasi mbassa Kanaanda, mbassa asi poy hura ta asi huruɗ ko koygina nara.

⁵ Hu li ma an hum tii ma vi suu Israelna ma suu Egiptena ka lasasina, humun gan kay galam manda.

⁶ Kay ndaɗta aŋ di suu Israelna ana, ni an Yawe. An hin paɗagi ki hu lassa suu Egiptena ka lasagira, an hin buɗugi ki ko mbaɓura, an hin saagi sugulugi ni u saɓakŋa u eŋga.

⁷ «An hin mbuɗugi ki ni a suu mansina, an hin li ni a Loogina may. Agi hin wi ki ana, anni Yawe, ni Loogina, ni sa ma buɗugi ay ki ko lassa Egiptera.

⁸ «An hin tuɗugi ki hu mbassa an suu tan ɦaɗ maŋ Abraham, maŋ Isaak, maŋ Yakobpa. An hin ɦagira ni magiya, ni An Yawe».

⁹ Moiz njaɗ boy namma maŋ suu Israelna lay ni asi ka min humumbi kay lassa su ki kasi cocoo.

¹⁰ Yawe di Moiz ana,

¹¹ «Tuɗ di Faraw, mul ma Egiptena, nam hin suu Israelna cuk ki hu mbas mamba.»

¹² Moiz ɓak fok Yawe ana, «Gola suu Israelna ka min a humun vununɗi, na ni nam Faraw hin humunni nanage? An sa ma vunun ka ɓak ki jiviɗina.»

¹³ Yawe di Moiz u Aaron ɦasi gaɗta ay maŋ suu Israelna, maŋ mulna Faraw lay ni kay a cuk suu Israelna ki hu mbassa Egiptera.

Sem somoyoŋ Moiz u Aaronna

¹⁴ Gola ni muli suu ka fokosi hu deeresina. Goryoŋ Ruben ma goo ŋgol ma vi Israelna, Henok u Pallu, Hetsron u Karmi. Ni njaf suu vi Rubenna.

¹⁵ Goryoŋ Simeonna ni Yemuel Yamin, Ohad, Yakin, Sohar u Saul ni goryoŋ goora Kanaanda ni asi njaf suu vi Simeonna.

¹⁶ Gola ni sem goryoŋ Levina u njafasiya. Gerkon, Kehat u Merari. Levi basa kay ndaŋgara ni kis duk dok-hindi yam kiɗisiya.

¹⁷ Goryoŋ Gerkonna ni Libni u Simey u deeresiya.

¹⁸ Goryoŋ Kehatna ni Amram, Isar, Hebron, u Uziyel. Kehat basa kay ndaŋgara ni kis duk dok-hindi yam hindi.

¹⁹ Goryoŋ Mararina ni Mahli u Musi. Njaf ma vi Levina u deeresi ni na.

²⁰ Amram ɗum a cara ni mbayamba, Yokebed, ndaɗ vuɗum gorra mba' ni Aaron u Moiz. Amram basa kay ndaŋgara ni kis duk dok-hindi yam kiɗisiya.

²¹ Goryoŋ Isarna ni Kore, Nefeg u Zikri.

²² Goryoŋ Uziyelna ni Mikael, Elsafan u Sitri.

²³ Aaron ɗum caamba ni Eliseba ta goŋ Aminadabba, ni wayaŋ Nakonda ndaɗ vuɗum fiɗi, Nadab, Abihu, Eleazar u Itamar.

²⁴ Goryoŋ Korena ni Asir, Elkana, u Abiyasaf. Ni asi njaf ma vi Korena.

²⁵ Eleazar ma goŋ Aaronna vi a cara ni goŋ Putiyella, ndaɗ vuɗum goona yam ana Pinhas. Ni asi njaf suu ŋgolo suu vi Levina u deeresiya.

²⁶ Gola ni Aaron u Moiz suu Yawe dasi ana cuk suu Israelna ay ki hu mbassa Egipterana ko ndal suu duuna na.

²⁷ Asi ni suu njaɗ maŋ Faraw mul ma Egiptena a cuk suu Israelna ay kina. Ni asi gi Moiz u Aaron.

Boy ma Bu Suuna dam maŋ Moiz u Aaronna

²⁸ Hu buu ma Yawe ɓak Moiz hu mbassa Egiptera ni

²⁹ buu ma nam ɓak Moiz nana «Ni an Yawe, aŋ tuɗ di dlara an daŋgara ki maŋ Faraw mul ma Egiptena halaŋ.»

³⁰ Moiz ɓak fok Yawe ana, «An vunun ka ɓak jiviɗi may ni Faraw hin humun vunun su?»