KALKIRA 5 - Boy Lonana

Moiz u Aaron tuɗ fok Faraw

¹ Ŋgoo dagan Moiz u Aaron mbay di Farawna ana, «Gola, Yawe, Lona vi suu Israelna, di ana, Hinin suu mansina asi tuɗ koyra ŋgoo bagi hu fulla a ŋgaanu.»

² Faraw di ana, «Yawe namma nige a an humum vunum a hin suu Israelna tuɗ ki ŋgoo bagi nige? An ka wi Yawe nammaɗi. Kay ndaɗta an ka hin suu Israelna tuɗɗi.»

³ Asi hoŋom dira ana, «Lo ma vi suu Hebrena tak tam irimiya, dami ana ami tuɗ ta ta buuna hindi ŋgoo bagi a li ɓivunna maŋ Yawe, kay ka nam cukumi tuguɗira cora u ŋgewna kamiɗi.»

⁴ Mul ma Egiptena dasi ana, «Moiz u Aaron agi min a tuɗ suuna ki day eg sun masira ni kay mege? Tuɗugi hu sun magira.»

⁵ Faraw di ana, «Cemi ni suuna zuli cocoo, agi min ana asi koɗ tasiya, li sundaɗi.»

Faraw ɦuɗ sunda fok ŋgol kay suu Israelna

⁶ Hu buu namma Faraw di suu ŋgolo suu gol sunda u suu ɓiira ana,

⁷ «Agi yow usuna ay fok suuna ko jewra na oloɗi, hinisi asi tuɗ hal usu ma ci birikka ay kay tasiya.

⁸ Tinisi birikka kasi ni ko ndal ta jewra na lay, yowosi ndum birikka ki kasiɗi. Asi ni suu zolomba kay ndaɗta asi tii ni na ana tuɗuygi laygi ɓivunna maŋ Looygina.

⁹ Ko lassa zul ha kasi ni zuli na ɗow ɗow, hinisi a koɗ tasi u kaboy masi nammaɗi.»

¹⁰ Suu ŋgolo suu gol sunda u suu ɓii magaara cuk ay ki mba di suuna ana, «Faraw njaɗ ay anaba an ka yowogi usuna ay oloɗi.

¹¹ Agi tuɗugi halagi usuna ay ni u tagira lay. Na lay ni sun magira ka a hoŋ ki daganɗi lay.»

¹² Suuna njay kosi ki hu mbassa Egiptera halaŋ a hal usu ma ci birikka.

¹³ Suu gol sunda dikisi usi ana asi li sunda ki zak zak, ana, «Lagi sunda ni ko agi kaa day laɗ hu buuna tew tewra na may. Ni ko asi li ɦagi usuna ay jewra na lay.»

¹⁴ Suu ŋgolo suu Egiptena ci suu may suu Israel suu wi ɓiira suu asi tinisi ha fok gorsesinana ana, «Sunda agi laɗ kaara ura karamba, agi li ka ko agi laɗ jewra na ɗini kay mege?»

¹⁵ Suu wi magaara suu Israelna mba sek Faraw ana, «Aŋ li dla ndaɗta eg suu sun maŋsina ni ana mege?

¹⁶ Suuna ka ɦal usuna ay maŋ suu maŋ suu sunda oloɗi. Asi hin dami ana ami ci birikka ni ko jewra na may. Gola asi poŋ suu sun maŋsina kini bay u boyna.»

¹⁷ Nam hoŋosi dira ana, «Agi ni suu zolomba kay ndaɗta agi di ana tuɗuygi laygi ɓivunna maŋ Yawe.

¹⁸ Cemi ni tuɗugi lagi sunda. Sa ka yowogi usu ha oloɗi, may agi ci birikka ni kora jewra na lay.»

¹⁹ Suu wi magaara suu Israelna wi ki ana asi cukŋi hu lassa ŋgolla, «Ka agi yow ki u ndum birikka agi caɗ jewraɗi hu buuna tew tew agi cini ko ndal agi caɗ jewra na.»

²⁰ Cuk ay ki vi Faraw may ni, asi tuɗ ndini kel gi Moiz u Aaron gaw, asi ka laki juɓusi may.

²¹ Asi dasi ana, «Ko Yawe gol aya nam kaɓak mamma, Faraw u suu mamsina ka minimi oloɗi, ni kay boy magina, agi guurusi sii ŋgewina kosi a cami kira wa.»

Lona vi vunum u Moiz a buɗ suu Israelna kiyo

²² Moiz hoŋ eg Yawe di ana, «Bu Suuna, aŋ a las suu asina na ni kay mege? Aŋ sunun ay na heregŋi kay mege?

²³ Hu li ma an tuɗ eg Faraw a njaɗ kay seŋga ni, nam ka las suu asina aŋ hin buɗ suu maŋsina ka kiɗi lay.»