KALKIRA 4 - Boy Lonana

Lona tak saɓak mamma maŋ Moiz

¹ Moiz hoŋ dira ana, «Asi hin ka van boy mannaɗi, asi ka hin humun vununɗi lay. Asi hin di ni ana Yawe tak tam ay ka iriŋgi.»

² Yawe dam ana, «Vama koŋ kawina ni mege?» Nam dam ana, «Ni tokolora.»

³ «Gaɗ ga gige.» Moiz gaɗ ga na ni, tokolora mbuɗ ki guyna. Moiz mbuɗ ndaana, paɗ ki liŋŋa komu.

⁴ Yawe di Moiz ana, «Maɗ koŋu vam njawamu.» Nam sii kom vam njawam na ni, guyna hoŋ mbuɗ ki kom tokolora balamam gaw.

⁵ «Na ɗaŋŋi asi hin vi ana Yawe tak tam ay iriŋu, ni Lo ma vi somoyosina, Lona vi Abraham, vi Isaak, vi Yakob.»

⁶ Yawe hoŋ dam olo ana, «Kal koŋ u tlawaŋu» Nam kal kom ay u tlawam, paɗam ay ki na ni kom ka ki ndondona, mbuɗ ki haɓpa ko ndal dlaŋmagina na.

⁷ Yawe hin dam ana, «Hoŋ koŋ kalla u tlawaŋu». Nam hoŋ kom kalla u tlawam na ni paɗam ay kiyo ni kom mbuɗ ki balamam jivira gaw.

⁸ «Na ɗaŋŋi lini asi humuŋ vunuŋ ka kay takka aŋ laɗ jewraɗi lay ni, ta mbara ni asi ndak huma.

⁹ Lini asi hum ka u takka aŋ laɗ mba caraɗi oloni, aŋ tuɗ go yona ay hu mbo lumma mba voom ki kay ndaŋgara, yo ma aŋ goom ay hu luuma mba voom ki kay ndaŋgara namma hin mbuɗ ki busuna.»

Lona sun Aaron a njun u Moiz

¹⁰ Moiz di Yawe ana, «An ceneŋu, Bu Suuna, an vunun ka njaɗ jiviɗi, kaa lay, ay kaa hiŋga lay, ay hu li ma aŋ ka ɓak saaŋ ma sunda na ni an vunun can neke, sinin nek coco lay.»

¹¹ Yawe hoŋom dira ana, «Sa ma li vun sa warnana ni gege? Sa ma mbuɗ sana ki ndumu lay ŋgeli layna ni gege? Sa ma dug ii sana ki lay malaɗ ki layna ni gege? Ni ka an, Yaweɗi su?

¹² Cemi ni aŋ tuɗa an ka u vunuŋu, an hin haɗaŋ dla mayra aŋ hin daɗta.»

¹³ Moiz hin dam ana, «Ҥawaa, Bu Suuna, sun gegelay ma huruŋ minimma.»

¹⁴ Yawe hurum ɓeŋ ki eg Moiz dam ana, «Wayaŋŋa Aaron ma Levina kaɗi su? An wi ana nammi sa ma vunum njaɗ jivina, gola nam kal ay ki ka ŋgafaŋ aya, hu li ma nam waŋ wa ni nam hin furi cocoo.

¹⁵ Aŋ hin njaɗamu, boy ma aŋ a damma aŋ hin ɓakamma ha funumu. An may ni ka njun u vunuŋ may njun u mamma lay. An hin haɗagi dlara agi hin a laɗta.

¹⁶ Nam hin ɓakaŋ ha ki maŋ suuna ni boy maŋŋa, nam mbuɗni a vunuŋu, aŋŋi a loomma may.

¹⁷ Tokolora wanda aŋ tlaɗ koŋu, aŋ hin li dlara mbuɗ mbuɗta ni u ndaɗu.»

Moiz hoŋ ay hu mbassa Egiptera

¹⁸ Moiz hoŋ eg kunumma, Jetro, dam ana, «Cemi an min hoŋ eg gorsenna hu Egipte tuɗ golosiya, lini asi ka iiri tuwa.»

¹⁹ Jetro di Moiz ana, «Tuɗ u heɓpa.» Yawe di Moiz ay hu Madiyan ana, «Tuɗa hoŋ hu Egipte kay suu hal a caŋ kina halaŋ miɗ ki wa.»

²⁰ Moiz vi caamba u goryomu yowosi kay korra hoŋ hu Egipte. Moiz tli tokolora vi Lonara kom may.

²¹ Yawe di Moiz ana, «Hu li ma aŋ hoŋŋa wanni gola, dlara mbuɗta an takaŋgara halaŋ an ɦaŋ saɓakŋa, aŋ tuɗ laɗ ki fok Farawna. Na may ni an hin soom hurumu, nam hin ka hin suu Israelna a cuk kiɗi.

²² Aŋ tuɗ di Faraw ana, Yawe di ay ana, Goron ma ŋgolna ni Israel.

²³ An daŋu hinin gorona nam tuɗ ki sununu. Lini aŋ hinim ka a tuɗɗi ni, an hin caŋ goroŋ ma ŋgolna ki may.»

²⁴ Ay hu voɗta a tuɗta wanni, Yawe ŋgaf u Moiz, hal a cam kiyo.

²⁵ Sifora tli ɦinira caw ɗiw goroɗna tin busuna eg sem Moiz di ana, «Aŋŋi njuf ma busuna.»

²⁶ Yawe hinim gaw. Ndaɗ di ana, «Aŋŋi njuf ma busuna.» Ni kay dla caw ɗiwra.

²⁷ Yawe di Aaron ana, «Tuɗ ŋgaf vok Moiz ŋgoo hu fulla». Nam tuɗ ŋgafam ay eg Ҥinira vi Lonara, nam mboɗom kolo furi tasiya.

²⁸ Moiz cuɗ dlara Yawe damba ayra ki maŋ Aaron halaŋ, takam dlara mbuɗta nam takamba ay a nam nda laɗta ki lay.

²⁹ Moiz u Aaron tuɗ tok suu ŋgolo suu Israelna kaŋga halaŋ.

³⁰ Aaron dasi boy ma Yawe dam ay maŋ Moizna ki halaŋ. Nam takasi dlara mbuɗ mbuɗta ki irisi halaŋ lay.

³¹ Suuna vi boy namma. Asi wi ki ana Yawe mbay a njun kay suu Israelna wa, nam wasi hahaw masira ay wa, asi goɓ ga cen Lona.