KALKIRA 3 - Boy Lonana

¹ Moiz a taa yoori suu vi kunumma, Jetro, mul ma li ɓivunna vi suu Madiyanna wanni. Nam a tuɗ yoorina ki ŋgoo bagi hu fulla tew eg ɦini mayra vi Lonara hu Ҥinira Horebba

² Sa sunda vi Yawe tak tam irim duk kura hum goo guna. Nam gola ni hum guna ki u kura halaŋ, ta guna ka ŋgalɗi may.

³ Moiz ɓak tam ana, «An hoŋ dagan gol dla ndaɗta ki jivi tuwa, guna ka ŋgalɗini kay mege?»

⁴ Yawe wi ana nam hoŋ ay dagan ka gola ni, Lona yam ay duk hum guna, «Moiz, Moiz.» Nam humum ana, «An wanni.»

⁵ Nam dam ay ana ɦuɗ taŋ ay tani tokgi, fok tuɓuru ma seŋŋa kiyo, kay li ma aŋ coli hurum wanna ni ndaŋgara teteɗta.

⁶ Nam di ana, «Anni Lo ma vi somoyoŋŋa, Lona vi Abraham, Lona vi Isaak, Lona vi Yakob.» Moiz baa irim kiyo kay nam mbuɗ ki ndaana ka gol Lonaɗi.

⁷ Yawe di ana, «An wi hahawra vi suu mansina hu Egiptera wa halaŋ. An hum asi ka tii ko telekŋa vi suu Egiptena, na daŋ may an wasi las masira wa.

⁸ An cuk ay ga ni a buɗusi ki ko suu Egiptena, a tuɗusi ki hu mbassa ŋgolla jivi cocora, hu mbas mayra law gi mbiira u mbul yumma. Ni hu lina vi suu Kanaanna, suu Hetna, suu Amoreenna, suu Perizina, suu Hivna u suu Jebusenna.

⁹ Cemini tii ma vi suu man suu Israelna tew ki egen wa gasi, an wi nekka suu Egiptena tinisira kasira wa lay.

¹⁰ Aŋ tuɗa, an sunuŋ eg Faraw, aŋ cukun suu mansina ay ki hu mbassa Egiptera, ni suu goryoŋ Israelna.»

¹¹ Moiz joɓ Lona ana, «Anni ge zeneŋ may a tuɗ eg Faraw nige? A cuk suu Israelna ay ki hu mbassa Egiptera nige?»

¹² Nam dam ana, «An ka u aŋu, gola ni va ma hin tak ki ana, An ka u aŋu, sunuŋ ay ni anuna. Hu li ma aŋ cuk suu Israelna ay ki hu mbassa Egiptera wa ni, agi hin mba sunun an Loogina kay ɦini ndaɗta tani.»

Lona tak sem maŋ Moiz

¹³ Moiz di Lona ana, «Gola an min tuɗ eg suu Israelna, tuɗ dasi ana Lo ma vi somoyogina sunun ay egegi ni namu, lini asi hin joɓon wa ana, sem ana mege? An hin dasi ni ana me mayge?»

¹⁴ Lona di Moiz ana, «Anni ma Kana, aŋ dasi ana MA KANA sunun ay egegi ni namu.»

¹⁵ Lona hin di Moiz olo ana, «Aŋ hin ɓak suu Israelna ana, Yawe Lo ma vi somoyogina, Lona vi Abraham, Lona vi Isaak, Lona vi Yakob sunun ay egegi ni namu. Ni sen ma fafaɗna, ni asi hin cenen hu basara basara ni u sen namma.

¹⁶ Tuɗ tok suu ŋgolo suu Israelna dasi ana, Yawe, Lo ma vi somoyogina, Lona vi Abraham, Lona vi Isaak, Lona vi Yakob tak tam ki irin dan ana, An min a kal tan hu boy magina, kay dlara asi lagira egegi hu Egipte wanda.

¹⁷ An di ana, an min cukugi ay ki hu lassa Egiptera, tuɗugi ki hu mbassa Kanaanda, ta Hetta, ta Amoreenda, ta Perizira, ta Hivda u ta Jebusenda, ni hu mbas mayra law gi mbiira u mbul yumma.

¹⁸ Asi hin humuŋ deleŋu, aŋ u suu ŋgolo suu Israelna hin tuɗugi vi mulna Faraw agi dam ana, Yawe, Lo ma vi suu Hebrena, tak tam ay ki irimiya. Cemi ami min tuɗ ta ta buuna hindi ŋgoo bagi hu fulla, kay a li ɓivunna maŋ Yawe Loomina.

¹⁹ Na may an wi ana mul ma Egiptena ka hinigiɗi, ni hu li ma hin ɦeɓem u saɓakŋa tuwa.

²⁰ An hin maɗ kon kiyo, hin ci suu Egiptena u dlara mbuɗ mbuɗta zeɗ zeɗ ta an hin laɗ dukusira, ŋgoo dagan nam hin hinigi agi tuɗa.

²¹ Jivira an laɗ gin maŋ suu Egiptena an hin laɗ ki ni maŋ suu mansina, agi a cukugi kira ni ka tuɗ u kogi ɦawaɗi.

²² Ca taaragelay joɓ ndaraɗta vok zina kay tlena, joɓ cara ndaɗ varaɗta lay, kay doonora u lorra u barawna lay, agi hin yowosi kay goryogiya kay gor njufiina u gorɓiina lay. Agi hin cuk ki u begera vi suu Egiptera halaŋ.»