KALKIRA 26 - Boy Lonana

Li ma teteɗ ma Lona kak huna

¹ Aŋ min mbutluɓma u baraw ma doɓorokŋa irim zeɗ zeɗ doogo. Suu yalna cil baraw namma u baraw dlemba ni tam ndali zeɗ zeɗ ma tam tlawna u ma wili wilina u ma tlaw keŋ keŋŋa may. Aŋ mba min Serubim hu may.

² Fiyek baraw ma dewna ni meter doogo yam fiɗi, hayammi meter mba' may, lam fiyekem halaŋ fun tam dew.

³ Baraw maa vadl taɓam kel tamu, ma vadl hiŋŋa kel tam may.

⁴ Aŋ dam vun baraw ma ki fun keɓereɗna ki u baraw ma wili wilina, dam vun ma daɓ ha ki daganna ki na may.

⁵ Baraw ma fun keɓereɗna aŋ cil zewna funum na dok-vadl, cil fun ma mbana na dok-vadl may, zew ma fun namma lini fun tam dew.

⁶ Aŋ dli va ma ɓal barawna kolo fun tamma na dok-vadl ni u lorra. Aŋ jak vun barawna fun tam u lorra aŋ dlaɗ ndaɗta kay a li namma li ni a mbutluɓma dewna.

Baraw ma baari kolo kay mbutluɓmana

⁷ Ŋgoo dagan aŋ cil barawna u tlimiɗ ɦugunina, a baram ay kolo kay mbutluɓma. Aŋ cilim na zeɗ zeɗ doogo yam dew.

⁸ Fiyek baraw namma ni meter doogo yam vadl, hayammi meter mba' may cil baraw namma halaŋ fun tam dew.

⁹ Aŋ taɓ baraw maa vadl kel tamu, taɓ maa karkiya kel tam may. Aŋ boɗ baraw ma karkiyana vok mbutluɓma.

¹⁰ Aŋ dam vun baraw ma fok jewna ki u zewna dok-vadl, ma a mbarana aŋ damam vunum ki u zewna dok-vadl may.

¹¹ Aŋ dli va ma ɓal barawna kolo fun tamma na dok-vadl u walakka. Aŋ taɓ vun barawna fun tam dew a nam mba li ni ko tam dew.

¹² Vun baraw ma kolo kayamma mba su kiyo, vunumba su ki ndaɗta mba cuk ha ki ŋgoo mbutluɓma dagani.

¹³ Hu fiyek mbutluɓma na ni barawna jak ki meter dew, vunumba jak ki ndaɗta baa ha ki keŋ mbutluɓma.

¹⁴ A baa yam mbutluɓ ma mbana ni aŋ ɗee ni bak gamlagina coorosi ki tlawi hin baa bak vabak ma lus duk mbona ha kolo kayam olo.

Gu ma min mbutluɓma u namma

¹⁵ Aŋ min u mbutluɓma ta kaŋgara ni u gu akasiyana, pam kolo u sem ɗegee.

¹⁶ Fiyek guna li meter vadl, bebeɗemmi nus meter dew may.

¹⁷ Va ma njunum kolo eg tamma li eg gu ma dewna mba' mba' aŋ li gu namma halaŋŋi ko ndaɗta na.

¹⁸ Aŋ ceɗ gu ma daŋŋa na dok-mba' pam ay hu keŋ ma dalina na.

¹⁹ Yoo va ma njaa guna kolo kamma u doonora, yoorom na dok-fiɗi. Gu ma dewna u kawi namma um mba' mba' kay a taɓam eg tamba ma hiŋŋa mamma ha ummi na lay.

²⁰ Hu keŋ ma mbayawna na ni guna hu ni dok-mba' may.

²¹ U doonora yoori u sesira ni dok-fiɗi may. Gu ma dewna u doono mamba um mba' mba' kay a taɓam eg tamba ma hiŋŋa mamma ha ummi na lay.

²² Hu hurumba daɓ ha ki daganda u fiɗigina na ni aŋ li guna hu karkiya.

²³ Aŋ li gu ma daŋŋa ay kurufu hu mba' a vi mbutluɓma kolo eŋga may.

²⁴ Gu ma mba' namma umba gara ha ki ɓorowi zeɗ zeɗ yam tuɗ taɓ ha ki kolo ko tam dew. Gu ma mba' namma fiyekem fun tammi dew, nam hu ni a vi gu ma daŋŋa kolo eŋga.

²⁵ Gu ma daŋŋa kalavandi ay ŋgoo dagan u doonora yoori a njaram kayamba doogo yam karkiya may. Guna dew ni doonora u mba' mba'.

²⁶ Aŋ ka tokolo gu akasiyana na vadl kay keŋ ma jewna,

²⁷ vadl kay keŋ ma mbana may, vadl kay keŋ ma ki u fiɗiginana may.

²⁸ Tokolora duk gayra kalaɗ ni hin vun guna ki kolo fiyek nde nde. Kalaɗ ha keŋ hiŋŋa ta ta tuɗ laɗ ha ki keŋ hiŋŋa may.

²⁹ Guna aŋ lam tam ki u lorra, li zul li ma kal tokolora huna ki u lorra may, li ta tokolora ki u lorra lay.

³⁰ Aŋ min mbutluɓma ni ko ndal an takaŋŋa ay kolo kay ɦinirara na.

³¹ Aŋ cil baraw ma cak duk lina u baraw dlemba, tam ndali tlatlaw may, wili wili may, ma tlaw keŋ keŋŋa may u ma tlawam war warna may. Cil sa sunda huulona Serubim egem may.

³² Aŋ gaɓam kolo ni u guna fiɗi ni gu akasiyana, hoorom tam ki u lorra, va ma ɓalam kolo u namma yoo ni lorra lay. Col sem guna ni kolo kay doonora may.

³³ Aŋ cak baraw namma kurufu hu mbutluɓma, ha ŋgoo barawna dagan aŋ tin Zandukka Galamba ha huwa. Baraw ma caki namma ɓorow ii Li ma Teteɗna ki u Li ma ki Saɓaki Teteɗna.

³⁴ Aŋ dug vun Zanduk mayra Galamba u Lonara ta tini hu Li ma ki Saɓaki Teteɗna kiyo.

³⁵ Aŋ tin tabulla fok barawna na gay, tin pindilla fok tabulla keŋ bik dali na, tin tabulla mbayaw na may.

³⁶ Aŋ cil baraw ma daŋŋa a baa vun mbutluɓma kira may. Baraw namma cilim u baraw dlemba, ndali wili wili may, tlaw may, ma tlaw keŋ keŋŋa may.

³⁷ Kay baraw namma aŋ ka tokolo akasiyana vadl, hooroɗ taɗ ki u lorra, va ma ɓalam kolo u namma ni lorra lay. Aŋ yoo kawi ma tlawna a tinim sem kayamba may.