KALKIRA 21 - Boy Lonana

Gaɗta kay mborɓiina

¹ Gola ni gaɗta aŋ tuɗ takasirara.

² Lini aŋ gus goo mbaɓuna ni duk suu Hebrena toko ni nam laŋ sunda ta ta basara karkiya, hu basara kiɗisiyara ni nam ki ni buɗiya, nam kal ki ni ka warak vaɗi.

³ Lini nam mbay varaŋŋi dew ni nam kal ki ni u dewem lay. Lini u ca umu ni caamba kal ki u nam may.

⁴ Lini sa ma gusumma ɗumum cara ni namu ni, nam vuɗ gor njufiina u gorɓiina wa ni, cara u gorkemba hin ka ni maŋ malamma, nam tamba kal ki ni u dew tamu.

⁵ Lini mbaɓuna di ana, «An min malanna, caanda u goryon an min kak u asiya, an ka min a buɗ tan kiɗi.»

⁶ Malamma tuɗum ay fok Lona, nam mba colom fun zira hu vun ma kalla, malamma duɓum humum kiyo, nam hin vo varammi a fafaɗta.

⁷ Lini sana gus goromba ki wa ko ndal mbaɓura na ni ndaɗ ka kal ki vi malaɗna ko gor njufiina kal kira naɗi.

⁸ Lini ndaɗ ka ii malaɗ ma gusuɗna jiviɗi ni, nam ndak hoŋoɗ ki gussa. Voɗta ka kay nam a gusuɗ ki ko njaf suu ɦawanaɗi. Ni nam laɗ egeɗ ni dla cora.

⁹ Lini nam ɦaɗ ni maŋ goromu ni nam li u ndaɗni ko gaɗta kay gorɓiina dira na may.

¹⁰ Lini nam tli ta daŋ mam lay ni, nam ka hin bay ɦal tina, barawna, li ma buuna u ndaɗta wandaɗi may.

¹¹ Lini nam ka laɗ tlesuu hindi asinaɗi ni, ndaɗ ndak a kal ki varam bay warakŋa, ka hoŋom gursu oloɗi.

Sa ma ci sana

¹² Sa ma ci sana ki maɗnana, cam ki cii may.

¹³ Na may ni sa ma saa ka gin a cam kiɗi, Lona tinimma maɗam kommi tini ɦawana, an hin takaŋ li ma nam pii ŋgay ki huna.

¹⁴ May lini sana guruɗ eg ndaram zina hal a cam ki u mbeleŋŋa ni, aŋ dik sa namma ki hu givin ma togolla kay nam miɗ kiyo.

¹⁵ Sa ma poŋ gi bum u summa, sa namma cam ki ciiya.

¹⁶ Sa ma kul sa warna, gusum kina, ɗowba asi fam u sa namma komma, cam ki ciiya.

¹⁷ Sa ma ŋgul gi bum u summa, sa namma cam ki ciiya.

Sa ma dak sana

¹⁸ Lini suuna li honira duk tasiya, sa hiŋŋa ci ndaramma u kom ɗowba gikim u gogoyra dakamu, nam li ka buuri gaa ni,

¹⁹ lini nam ndak a col kolo taɓal u tokolora a kal ki kiɗiki ni, sa ma dakamma asi ndak kaam ɓakŋa kamu.

²⁰ Lini sana waɗ mbaɓu mamma, ɗowba mbaɓura u tokolora nam miɗ kom wa ni, hin sa sugul sa namma ni u tamba may.

²¹ Lini sana mbaɓu mamma ɗowba mbaɓura buu bay miɗ dew kala, mba' kala, hin miɗ tuwa ni, sa ka joɓom vaɗi, kay nam ci kini bege mamba.

²² Lini suuna mba' li tasiya, daɓ cara wiina ga wa, ndaɗ vuɗ ki bay tiliɗ ma vuɗta ndak wa ni, fi dlara co ka saɓakiɗi ni, suu asina ɓakŋa mba ka kasiya, asi ndak warak va ma njuf cara ŋga ana ɦam na gana may.

²³ Lini maɗ kal ki duk wa ni sana warakŋi u iiri mamba may.

²⁴ Iira warakŋi u iira may, siina ni u siina may, kona ni u kona may, semma ni u semma may.

²⁵ Ŋgalla warakŋi u ŋgalla may, dakka ni u dakka may, ci maɗna ni u ci maɗna may.

²⁶ Lini sana co ii saam ma sunda ɗowba caamba sunda kiwa ni, nam mba hin sa namma tuɗ ki buɗiya, ni a warak ma kay irimma gaw may.

²⁷ Lini nam to ki ni sii saam ma sunda ɗowba caamba sunda ni, nam hinim tuɗa ni a warak mam ma kay siimma gaw may.

²⁸ Hu li ma mbutlna daɓ sana cam ki wa, ni mbutl namma asi duurum u gogoyra cam kiyo. Sa ka komom tliwimbi, may malaŋ mbutlna boy ka kambi.

²⁹ May lini mbutlna jew day daɓ suuna asi nee yam malamma ki jew lay, nam li ka golombi, mbutl namma ci sa wa ni, asi ci mbutlna kiyo, malaŋ mbutlna asi cam ki may.

³⁰ Lini asi joɓom a nam waraka ni nam warak va namma kay a mbuɗ iiri mambara may.

³¹ Lini nam cini go njufna ɗowba go tamara ni, lini ko gaɗta di ay fok wanda na lay,

³² Lini mbutlna daɓmi sa sunda ɗowba cara li sunda vi sana ni asi warak may ci mbutl namma ki may.

³³ Lini sa gi zul mbona voo, hiniɗ vunuɗ ki ɦoŋ, duguɗ kaɗi, lini mbutl kala, kor kala, ndi huwa ni,

³⁴ malaŋ zulla waraka, nam ndak warak gus va ma ndi hu zulla namma, ma miɗ kina asi ndak ɓorowom dukusi may.

³⁵ Lini mbutl ma vi sanana ci ma vi sa hiŋŋa ki wa ni, asi gus mbutl ma hin iirina kiyo, ɓorow bege ndaɗta duk tasiya, mbutl ma miɗ kina asi ɓorowom tliwim dukusi may.

³⁶ Lini suuna di ana mbutlna ka daɓ ndarayamma tew tew, malamma golom kaɗi ni, namu ni nam ndak ɦal mbutl ma daŋŋa maŋ sa namma, ma miɗ kina ni mam may.

Gaɗta kay kulla

³⁷ Lini sana kul ni mbutl ɗowba timii gusum ki ɗowba cam kiyo ni, sa namma warak mbutlina vadl kay balam mbutl ma dewna, warak timigiina fiɗi kay timii ma dewna may.