KALKIRA 2 - Boy Lonana

Vuɗta Moiz vuɗta

¹ Sana dew ni hu njaf ma vi Levina, ɗum goora ay hu njaf namma may.

² Ca ndaɗta vi wiina, vuɗ go njufna. Ndaɗ wi ana go namma jivi cocoo ni ŋgayam ta ta tilna hindi.

³ Nam mbuɗ ki ŋgol ka ndaɗ a ŋgayam oloɗi ni, ndaɗ cil kaalam usu ma yam ana papirusna, hoorom tam ki u daɓaŋga, gi gogoona huwa, tuɗ ŋgayam ha ki duk cerewna fun lum ma Nilna.

⁴ Wayamba col ha ki na day a juɓum umba may.

⁵ Goŋ mulna Farawra mbay fun lumma a mbus taɗu, ndarayaɗna tuɗ ay kay cereɗ doŋ lumma may. Ndaɗ wi kaalamba ha tini na ni sun goora sunda ha ana tlaɗta ay gige.

⁶ Ndaɗ malaɗ vunuɗ ki nani wi gogoona gii hu tiira, nam mbuɗ iriɗ hahaw cocoo, ndaɗ di ana, «Ni gogoo ma vi suu Hebrena.»

⁷ Wayamba di goŋ Farawra ana, «Ndak min ana an halak ca taa ay vi suu Hebrena a wulukŋa su? Ndaɗ ndak ɦam pona ta ta colokŋa kiɗi su?»

⁸ Goŋ Farawra daɗ ana, «Tuɗa». Ndaɗ goora tuɗ yi su goona ay ni na gaw.

⁹ Goŋ Farawra di cara ana, «Tli goona tuɗ wulunna aya, an hin ɦak va ma kay loɓ makŋana may.» Cara tli goona, ɦam pona may.

¹⁰ Goona wul ki wulni, ndaɗ mbaaram ay maŋ goŋ Farawra. Nam mbuɗ ki ni a goroɗna, ndaɗ tinim sem ana, Moiz, kay ana ndaɗ tlam ay ki ni duk mbona.

Moiz pii ki hu mbassa Madiyanda

¹¹ Buu maa dew, hu li ma Moiz jeŋ kina, nam kal ay ki mba gol gorsemma hu liisi ma sunda. Nam fi ma Egiptena las ma Hebrena ni duk gorsemma may.

¹² Nam gol irim ki com commi wi sa kaɗi, nam ci ma Egiptena kiyo pam ha ki ga duk ŋgetlna.

¹³ Vinda ni nam kal ay ki mbay egesi olo, fiya ni suu Hebrena mba' ka li tasiya, nam di sa ma boy mamma cona ana, «Aŋ a ci ndaraŋŋa nani kay mege?»

¹⁴ Sa namma hoŋom dira ana, «Sa ma kakaŋ a kaami ɓakŋa kamina ni gege? Aŋ min a can ki ko aŋ ci sa ma Egiptena kira na may su?» Moiz mbuɗ ki ndaana di ana, «Boy namma um gi ki wa ɗaŋ.»

¹⁵ Faraw hum boy namma nani hal a ci Moiz kiyo, Moiz pii ki hin ziŋ Farawna kiyo. Nam tuɗ ki hu mbassa Madiyanda, kak fun goloŋga na tok.

¹⁶ Mul ma li ɓivunna ma vi suu Madiyanna gorɓiina kom ma kiɗisiya. Asi mbay go yona ga a ɦam maŋ yoori suu vi busina.

¹⁷ Suu taa yoorina mbay dikisi kiyo, Moiz col kolo njun kasiya, nam ɦasi yona maŋ yoori masisina.

¹⁸ Asi hoŋ ay vo eg busi Rewel, nam dasi ana, «Agi hoŋ ay karam na zakŋi nanage?»

¹⁹ Asi dam ana, «Sa ma Egiptena suɗumi ay ki ko suu taa yoorina, nam go yona u tamba maŋ yoori mamisina ni nam lay.»

²⁰ Nam di goryom ana, «Sa namma ni arage? Agi hinim ha kini kay mege? Tuɗ yam ay nam mbay ti funa.»

²¹ Moiz vi kam a cuk ziim tok eg sa namma may. Nam ɦam goromba Sifora a caamba gaw may.

²² Ndaɗ vuɗum goona nam tinim sem ana, Gersom, ni ana, an mbuɗ ki ni koyna, kay Moiz di ana, «An mbuɗ ki ni koyna hu mbassa daŋga.»

Bu Suuna yi Moiz

²³ Duk ɦoŋ basara fiyek ndaɗta Faraw, mul ma Egiptena, miɗ kiyo. Goryoŋ Israelna ka yoo tasi ko lassa mbaɓura may. Asi ka yi eg Lona koloo, yiisira tew kolo eg Lona wa may.

²⁴ Lona humusi sek masira, humum gam kay galamba nam vaɗ u Abraham, Isaak u Yakobpa.

²⁵ Lona wi suu Israelna las hu mbaɓura nani, humum gamu.