KALKIRA 18 - Boy Lonana

Moiz ŋgaf u kunumma, Jetro

¹ Jetro, mul ma li ɓivunna vi suu Madiyanna, kunuŋ Moizna, hum dlara Lona laɗ u Moiz u suu Israelna suu mamsinara halaŋ, Yawe cukusi ay ki hu mbassa Egiptera.

² Jetro, kunuŋ Moizna, tay Sifora, caŋ Moizza, ni dagan li ma nam tiniɗ ay kina,

³ u goryom suu mbana may. Ma wanna sem ana, Guerkommi ana ma tuɗ kolona. Moiz di ana, «An mbuɗ kini sa ma tuɗ ki kolo hu mbassa daŋgana.»

⁴ Ma mbana sem ana Eliyezer, ni ana, «Loonna njununu, kay ana Lo ma vi bunna mba njununni namu, nam suɗun ay ki ko ŋgew ma vi Farawna.»

⁵ Jetro ma kunuŋ Moizna, goryom u caamba tuɗ eg Moiz ŋgoo bagi hu fulla asi cuki eg Ҥinira vi Lonara.

⁶ Nam sun ha di Moiz ana, «Ni an Jetro, kunuŋŋa, an min tuɗ ha egeŋ u caaŋga u goryoŋ lay.»

⁷ Moiz kal ay ki mba ŋgaf vok kunumma, nam goɓ gaa mboɗomu, furi tasiya, gi deɓpa tasi si si may, tuɗ cuk hu mbutluɓma.

⁸ Moiz cuɗ dlara Yawe laɗ eg Faraw u suu Egiptena kay suu Israelnara maŋ kunumma u loɓ ma fasi ay hu voɗtana halaŋ Yawe suɗusi ay kiyo.

⁹ Jetro furi coco kay dla mayra Yawe laɗ kay suu Israelnara, hu li ma nam buɗusi ay ki ko suu Egiptena.

¹⁰ Jetro di ana, «Gi deɓ Yawe ma buɗugi ay ki ko suu Egiptena ay ki ko Faraw tamba lay, buɗ suuna halaŋ ay ki ko suu Egiptena.

¹¹ An wi ki gasi ana Yawe nam ŋgol su loogina hu njafasi lay halaŋ.»

¹² Jetro, ma kunuŋ Moizna, li ɓivun ma ŋgalam kina, u ɓivun ma daŋŋa maŋ Lona. Aaron u suu ŋgolo suu Israelna halaŋ mba ti fu namma fok Lona u kunuŋ Moizna.

Moiz tin muli suu kaɓakŋa

¹³ Vin maɗiira ni Moiz kak a kaɓakŋa maŋ suu Israelna, suuna laki fok Moiz maɗii day ta ta tew fiɗigiya.

¹⁴ Kunuŋ Moizna wi dlara nam laɗta na ni, dam ana, «Aŋ li u suuna na ni dla mege? Aŋ kak ki u taŋga na dew suuna coli fokoŋ ta ta fiɗigiya ni nanage?»

¹⁵ Moiz di kunumma ana, «Suuna mba egenni a joɓmi Lona.

¹⁶ Lini dla ay kosiya ni asi mbay egen an hin gasi ii dla ndaɗta ki may. An takasi gaɗta vi Lonara may.»

¹⁷ Kunuŋ Moizna dam ana, «Dlara aŋ laɗ wanda ni ka jiviɗi.

¹⁸ Aŋ hin ci taŋ kini ɦawaa, suu moli fok cana lay, sunda kal ki coco kaŋu, ni ka sunda aŋ a laɗ kay taŋ dewɗi.

¹⁹ Aŋ humun vunun haa, an min takaŋ nera, ko Lona li u aŋ may. Aŋ lini a sa ma tak suu Israelna maŋ Lonana. Aŋŋi a sa ma tuɗ dlara fok Lonana.

²⁰ Aŋ ɓalasi gaɗta ki koloo, ndaɗ hin takasi voɗta u poyra jivira may.

²¹ Duk suuna ni aŋ man suu ndaki suu li ndaa Lona, suu dlasi jivi ii suunana, suu ka ɓeŋ dla kiɗina. Aŋ tinisi fok suuna a mulina fok suu buɓma, fok suu kisna, fok suu dok-vadlna may, fok suu doogona may.

²² Suu asina ni suu ka ii ɓakŋa maŋ suuna tew tewna. Dlara kal ki ŋgolla asi hin mbaaraŋga ay fokoŋ may. Ta gorira ni asi gaɗ iriɗ ha dukusiya. Feɗ nek ndaɗta ki kaŋ ɦiw, asi ndak zii nekka u aŋ may.

²³ Lini aŋ li na ni Lona ndak ɦaŋ gaɗ mamba aya, aŋ ndak a li jivi lay, ni suuna ndak a hoŋ vo hu ziisi u heɓpa lay.»

²⁴ Moiz hum vun kunumma, li ko nam damba na may.

²⁵ Duk suu Israelna halaŋ Moiz man suu ndakina tinisi fok suuna a mulina, suu buɓmi tin sa fokosiya, suuna kis ni tin sa fokosiya, suuna dok-vadl ni tin sa fokosiya, suuna doogo ni tin sa fokosiya.

²⁶ Suu asina ni suu kaɓakŋa maŋ suunana. Dlara su kasira asi tuɗuɗ fok Moiz may. Dlara gorira halaŋŋi asi gaɗ iriɗ vo dukusiya.

²⁷ Moiz tin kunumma nam hoŋ vo hu mbas mamba.