KALKIRA 12 - Boy Lonana

Haɗta kay dla luu ma Pakŋa

¹ Yawe di gi Moiz u Aaron hu mbassa Egiptera ana,

² «Til namma hin varagi ni a til ma jewna duk tilna halaŋŋa. Agi gijaŋ ndum basa magira ni u til namma.

³ «Njaɗagi dla ndaɗta ki maŋ suu Israelna halaŋ. Hu buu ma doogona hu til namma ni gegelay hu ziimmi vi timiina, sana hu ziim halaŋ vi timiina dew dew.

⁴ Lini sana ka vo bolowɗi ni asi taɓ kay timii ma dewna u ndaram ma ziim egem tokŋa ni u ndum suu war suu vona. Agi manni timii ma a tliwim hin ndak kay suuna belna.

⁵ Agi vi ni timii ma bay ŋgulla egemma, ni timii ma basaɗam dewna, vi ni timii gamlana, agi ndak vi ni duk yoori magisina, lini gamla ɗowba, ŋgekŋa lay.

⁶ Agi golom gak gak tew hu buu ma doogo yam fiɗina hu til namma. «Suu Israelna halaŋ ŋgaɗ timigii asina vo ni fiɗigi lina goona gege?

⁷ Agi vo busuna hoorom vun goŋga kolora may, keŋ vunna may ni hu zira agi a kom tliwna hura.

⁸ «Agi kom tliw namma ki ni njeŋge ndaɗta, agi cuf tliw namma ni cufiya, komommi u fu ma bay kuffa dukumma, tlumum u usu ma galaana.

⁹ Komom iiriɗi lay, zalam zaliɗi lay, may cufum mi cufi duk kura, ki u yamba lay keweɗta lay u huuna lay.

¹⁰ Agi hin maa buu koloɗi, maa buu kolo wa ni, maɗii ni agi ŋgalam kiyo.

¹¹ Agi komommi tagi miniya, u furugi njuniya, tuɓuruna cuki segiya, tokolo magira kogiya, agi komommi na zak zak. Ni Pakka vi Yawera.

¹² «Karam njeŋge ni an min poy mbassa Egiptera ki halaŋ. An hin ci gor suu vuɗ fok jew suu hu mbassa Egiptera ki halaŋ halaŋ, col ha kay suu warna ta ta yoorina. An ka ɓakŋa kay loogi suu Egiptena ni an, Yawe.

¹³ «Busuna ni va ma hin tak ki kay zi ma agi ka huna. An wi busuna wa ni, an hin jak kagiya, dla mayra ɓalak zina hin ka li varagi hu li ma an a ci suu Egiptenaɗi.

¹⁴ «Buu namma ni buu ma humugi a gagi kam tew tewna. Agi hin tuɗ koy ndaɗta ni a li luuna maŋ Yawera. Ha ni na gak gakŋi ka gaɗta do ki dukgi. Agi hin li luu namma ni na gak gak.

Luu ma fu ma bay kuffa

¹⁵ «Ta ta buuna kiɗisiya ni agi ti ni fu ma bay kuffa dukumma. Hu buu ma jewna gawni, agi cuk kuffa ka vo varagira ki halaŋ. Sa ma ti fu ma kuffa dukumma hu buu ma jewna ta ta buu ma kiɗisiyana, sa namma hin tlam ki duk suu Israelna.

¹⁶ Hu buu ma jewna agi lini tokka li tagi ki teteɗta. Hu buu ma kiɗisiyana agi lini ko ndaɗta na lay. Hu buu namma ni sa ka li sunɗi, may yini fu ma ti funugina doy hol.

¹⁷ Agi saa kay luu ma fu ma bay kuffa dukumma tew tew, kay hu buu namma ni buu ma an cukugi ɓagi magi ma duuna ki kiɗikŋa. Agi saa kay buu namma hu basara basara hani na gak gakŋi ka gaɗta ɗo ki dukgi.

¹⁸ «Hu til ma jewna buu ma doogo yam fiɗina hu til namma, fiɗigi ndaɗta ni agi ti ni fu ma bay kuffa dukumma ta ta tuɗ tew fiɗigira buu ma dok-mba' yam dewna may.

¹⁹ Hu buu ma kiɗisiya namma ni sa ka wi kuf vo varagiɗi. Sa ma ti fu ma kuffa dukŋa, koyna ɗowba sa ma voona, sa namma ka duk suu Israelna oloɗi. Njafam bulum ki duk suu Israelna.

²⁰ Agi ka ti va ma ki ndi u kuf dukumbi, hu li ma agi cuki huna halaŋ. Agi tini fu ma bay kuffa dukumma.»

Min tasi kay fu ma Pakŋa

²¹ Moiz yi suu ŋgolo suu Israelna ay egem halaŋ dasi ana, «Tuɗugi halagi gor timigiina u gor ɦugunina u suu magisina dew dew halaŋ halaŋ, ŋgaɗagi goo timii ma Pakŋa.

²² Agi karak hum gu ma yam ana hisopma, kalam ay duk busuna, hoorom kolo vun zira may keŋ vunna may. Agi vo hu zina halaŋŋi sa kal ki kiɗikgi ta ta vin madiya.

²³ Yawe hin poy karam hu mbassa Egiptera halaŋ a ci suuna, hu li ma nam wi busuna fun zina, ni Yawe hin jak kay zi namma, ka ci sa huɗi, nam ka hin sa Ɓalak Lina kal vo taraŋ hu zi namma oloɗi.

²⁴ Agi li u dla ndaɗta jiviya, gaɗ ndaɗta hin ka ni magi u goryogi a fafaɗta.

²⁵ «Hu li ma agi cuk hu mbassa Yawe a ɦagirara wa ko nam dira na ni, agi li ka ko ndaɗta na tew tew.

²⁶ «Lini goryogi joɓogi ana, ‹Ɓivun namma ummi ana mege?› ni

²⁷ agi dasi ana, ‹Ni ɓivun ma Pakŋa maŋ Yawe, kay nam jak fun zina vi suu Israelna ay hu mbassa Egiptera, ni hu li ma nam ci suu Egiptena ki, hin buɗ suu Israelna ay kina.›» Suuna halaŋ goɓ ga u vun gifisiya gi deɓ Lona.

²⁸ Suu Israelna hoŋ vo halaŋ gijaŋ sunda gaw, asi li ni ko Yawe di ay maŋ gi Moiz u Aaronda na may.

Dlara mbuɗta doogora, ci gor njufii suu vuɗ jew suu hu Egiptena kiyo

²⁹ Tew duk ŋgikka ni Yawe ci gor njufii suu vuɗ jewna ki halaŋ halaŋ hu mbassa Egiptera, col ha kay goŋ Faraw ma ŋgolna ma a varak balamam kay mullana ta ta kay gor suu vuɗ jewna vi suu vasi ha ki balna hu daŋgaynana lay, u gor yoori suu vuɗ jewna lay halaŋ.

³⁰ Faraw col kolo duk njeŋgera u suu mam suu kaɓakŋa lay halaŋ. Suu Egiptena bel bel lay. Tii ma ŋgolna tum hu mbassa Egiptera halaŋ halaŋ. Kay hu zina halaŋ aŋ ka fi zi ma bay maɗ hurumbi.

³¹ Faraw yi gi Moiz u Aaron ay duk njeŋgera dasi ana, «Yowogiya cukugi ha ki duk suu mansina, agi u suu Israelna halaŋ, tuɗugi sunugi Yawe ko agi dira na.

³² Yoori magisina suu ŋgolona u suu gorina lay yowosi ugi halaŋ ko agi dira na. Tuɗugiya, paɗ vunugi ka ki kan may.»

³³ Suu Egiptena dik u suu Israelna ana asi tuɗ zak zak hinisi mbas masira. Asi di ana, «Ami hin miɗ kini halaŋ.»

³⁴ Suu Israelna giɗ fuɗ masira asi zuɓuluɗ a funara kasi halaŋ bay ndaɗ dlay ki tuwa.

³⁵ Suu Israelna li ko Moiz dasira na, asi joɓ tlena ko suu Egiptena cocoo, joɓ gursura u lorra lay, joɓ baraw ma cuk tara lay.

³⁶ Yawe li oo mamba kay suu Israelna, asi mbuɗ ii suu Egiptena hahawi, hu li ma asi cenesina ni asi ɦasi tlena cocoo. Kay ndaɗta suu Israelna kaa ki u begera vi suu Egiptena halaŋ.

SUU ISRAELNA CUK AY KI HU EGIPTE Suu Egiptena dikisi ki zak zak

³⁷ Suu Israelna yow ay hu Ramses tuɗ hu Sukot. Suu ŋgolona suu tuɗ u sesina ii va ma 600,000 ni ndum gorkemba u boyogina ka dukgi.

³⁸ Suu daŋŋa tuɗ usi cocoo, timigiina u mbutlina lay, asi tuɗ u yoorina ŋgol cocoo.

³⁹ Asi zal fuɗta asi zuɓuluɗ ha kasi hu Egiptera kiyo, ndaɗ li jiviya ndi ka kiɗi kay kuf ka dukgi. Dikisi ay ki Egipte ni asi min tasi kaɗi, kay ndaɗta va ma ti ay ka kasiɗi.

⁴⁰ Suu Israelna basa ay hu mbassa Egiptera ni basara 430.

⁴¹ Hu li ma basara 430 ndakŋa, hu buu namma, Yawe cuk suu mamsina ay ki hu mbassa Egiptera ko tasi dew.

⁴² Ni njeŋge mayra Yawe saa kay suu Israelna a cukusi ki hu mbassa Egiptera. Njeŋge ndaɗta ki ni maŋ Yawe. Ni Buu ma suu Israelna saa ha kam fok na gak gakŋa.

Gaɗta kay luu ma Pakŋa

⁴³ Yawe di gi Moiz u Aaron ana, «Gola ɓivun ma Pakŋa ni na. Sa ma koy ka ti ɓivun nammaɗi.

⁴⁴ Mborɓii suu agi gususi u gursurana, agi cawasi ɗiwisi kiyo, suu asina ndak ti ɓivun ma Pakŋa.

⁴⁵ Sa ma mba koyra u sa ma li sunda kay gursura lay ka tiɗi.

⁴⁶ Agi ti fu namma ni hu zira dewra. Aŋ ka kal tliw namma ki kiɗikgi, kom tliwna ni agi kus sokŋa ki dukgi lay.

⁴⁷ Njaf suu Israelna halaŋ mba li luu namma.

⁴⁸ Lini sa ma mba ki ŋgayra varaŋu, min a li luu ma Pakŋa vi Yawe ni sa namma u suu vo varamma halaŋ caw ɗiwisi kiyo. Ni nam ndak a mbay egegi a li luu ma Pakŋa. Nam mbuɗni ko sa ma hu mbas ndaɗtana na. Na may sa ma ɗiwim bay caw ka ti fu nammaɗi.

⁴⁹ Gaɗ ndaɗta ni kay agi suu vona lay, kay koy ma cuki dukugina lay.»

⁵⁰ Suu Israelna halaŋ li ni na. Asi li ni ko dlara Yawe daɗ maŋ gi Moiz u Aaronda na may.

⁵¹ Hu buu ma ŋgaay namma Yawe cuk suu Israelna ay ki hu mbassa Egiptera u suu masisina halaŋ.