KALKIRA 11 - Boy Lonana

Moiz di ki kay miɗ ma gor suu ŋgolona miɗna. Dlara mbuɗta doogora ta daɓ daganda

¹ Yawe di Moiz ana, «An min mbaa tuguɗira daɓ daganda kay Faraw, kay suu Egiptena halaŋ lay. Ŋgoo dla ndaɗta ni nam hin hinigi agi tuɗa. Ka hinigi a tuɗ ɦawaɗi, nam hin dikigi ni a fafaɗta.

² Aŋ di suu Israelna asi joɓ suu vok ziisina, cara joɓ ndaraɗta vok zina lay, kay gi doonora, lorra, u gursuna.»

³ Yawe hin kal oo mamba huu suu Egiptena. Moiz hin mbuɗ ŋgol coco hu mbassa Egiptera, ii suu sunda vi Faraw, ŋgol ii suu Egiptena halaŋ.

⁴ Moiz di ana, «Yawe di ana karam duk ŋgikka ni an hin kal ay ki duk suu Egiptena.

⁵ Gor njufii suu vuɗ fok jew hu Egiptena halaŋ hin miɗ kiyo. Goŋ Faraw ma ŋgolna ma a kak gin kay mul mambana, goŋ ca mayra li sunda hu li ma luɗ fuɗta ma ŋgolna lay ta ta gor yoori suu vuɗ jewna lay.

⁶ Tii ma ŋgolna hin tum kolo hu mbassa Egiptera cocoo, dlara ko ndaɗta na bay li dew tuwa, ha fokka lay ndaɗ ka li na oloɗi.

⁷ May duk suu Israelna ni di lay ka buɗi lay, vabak lay ka miɗɗi lay, kay a agi wi ki ana Yawe ɓorow ii suu Israelna ki u suu Egiptena».

⁸ Moiz di olo ana, «Hu buu namma suu sun maŋsina hin mba egenu goɓ kaŋga fokonu, dan ana, agi u suu maŋsina halaŋ tuɗugiya, hu li namma ni an hin tuɗa.» Moiz hurum ɓeŋ cocoo, kal ay ki vi Farawni u yara.

⁹ Yawe di Moiz ana, «Faraw ka hin a humuŋ vunuŋgi. An li dlara mbuɗ mbuɗta van coco lay ni nam ka min a humbi.»

¹⁰ Moiz u Aaron li dlara mbuɗ mbuɗ ndaɗta halaŋ fok Faraw, na may Yawe so huu Faraw gak gak ka min a hin suu Israelna a cuk ki hu mbas mambaɗi.