KALKIRA 1 - Boy Lonana

SUU ISRAELNA HIN EGIPTE KIYO Suu Israelna ay mbaɓura hu Egipte

¹ Gola ni sem goryoŋ Israel suu mbay ki hu Egiptena. Asi mbay ki ni u tasi u Yakob, gegelay ni u suu mamsina.

² Ruben, Simeon, Levi u Yuda

³ Issakar, Zabulon u Benjamin

⁴ Dan u Neftali, Gad u Aser.

⁵ Njaf Yakob na halaŋŋi suuna dok-kiɗisiya, Yosef ha ki ni jew hu Egipte paŋ.

⁶ Ŋgoo dagan Yosef miɗ ki miɗni, gorsemma miɗ ki lay, njaf suu jew asina miɗ ki halaŋ.

⁷ Gor suu Israelna zul hani zuli na ɗow ɗow, mbuɗ bolow cocoo, asi mbuɗ saɓak coco lay, oy yam mbassa kini asi halaŋ halaŋ.

⁸ Ɗaŋŋi mul ma wili ma wi Yosef kaɗina varak kay mulla vi suu Egiptena ɗaŋ.

⁹ Nam di suu mamsina ana, «Gologiya, goryoŋ suu Israelna cemini zuli cocoo, asi mbuɗ saɓak coco a suygi lay.

¹⁰ Halaygi mbeleŋ ma daŋŋa kasiya, ka hinisi a asi zul coco oloɗi. Kay hu li ma duu mba kaygi kalani, asi taɓ usi ay ki u suu babali maygisina, duu u aygiya ni asi hin sel ki a hiniygi mbas maygirara gaw may.»

¹¹ Suu Egiptena tin suu ŋgolona kay suu Israelna, ɦasi sunda nekka, ɦeɓesi a li sunda u eŋga. Asi min ɦoŋzi ma ŋgolna maŋ Faraw ni, Pitom u Ramses.

¹² Asi ka lasasi cocora na lay ni suu Israelna zul ha fokŋi zuli na ɗow ɗow, zul masira mbuɗ suu Egiptena ki ndaa cocoo.

¹³ Suu Egiptena ka las suu Israelna coco u waɗta ɦay lay.

¹⁴ Kak masi ma hu Egiptena mbuɗ hahaw cocoo, ɦoɓ luɓuna, ci birikka, li sunda hu senena lay, li sunda mborɓiina, sunda asi laɗta halaŋŋi u poŋga.

Faraw las suu Israelna

¹⁵ Mul ma Egiptena di boyogi suu vuɗ boyogi suu Hebrena, ta hiŋga yaɗ ana Sifra, ta mbara yaɗ ana Pua ana,

¹⁶ «Hu li ma agi vuɗ boyogi suu Hebrena, gologi gorra jiviya, lini go njufu ni agi cam kiyo, lini go tamara ni agi hiniɗ iiriya.»

¹⁷ Na may boyogi suu vuɗ ndarayasina na li ndaa Lona, asi li ka ko mul ma Egiptena dasira naɗi, hin gor njufiina iiriya.

¹⁸ Mul ma Egiptena yasi egem dasi ana, «Agi li boy namma na ni amege? Agi hin gor njufiina iiri ni nanage?»

¹⁹ Boyogi asina di Faraw ana, «Boyogi suu Hebrena ka ko boyogi suu daŋŋa naɗi, asi saɓak cocoo, jew bay cara vuɗta tew egesi may ni asi vuɗ ki gaw.»

²⁰ Lona njun u boyogi suu vuɗ ndarayasina cocoo, suu Israelna zul coco, mbuɗ saɓak coco lay.

²¹ Ko boyogi suu vuɗ ndarayasina na li ndaa Lona na ni, Lona ɦasi gora may.

²² Faraw ɦal voɗta maŋ suu mamsina ana, «Kemba vuɗ wilira, gor njufiina halaŋ cukusi ki duk mbo lum ma Nilna, hin gorɓiina iiri may.»