JOSUWE 9 - Boy Lonana

Galamba vaɗ u suu Gabaonnara

¹ Muli suu ŋgoo mbo lum ma Yurdanna halaŋ, hu li ma asi hum dlara vi suu Israelnara na ni, u suu hu mbas mayra u gara lay, suu cuki fun mbo lum ŋgolnana lay, suu ha ki tok eg mbassa Libanda, suu Hetna, suu Amorna, suu Kanaanna, suu Perizna, suu Hivna, suu Jebusna halaŋ,

² vi vunusi ko tasi dew a duu u Josuwe u suu Israelna halaŋ may.

³ Suu hu ɦoŋzi ma Gabaonna hum dlara Josuwe laɗ eg ɦoŋzi ma Yerikona u ma Ainara ha may.

⁴ Asina min a li dlaasira ni u mbeleŋŋa. Asi gijaŋŋa a jok tasi ki zeɗ, yow njoro mbumbu ma basina kay korra, mbumbu bakka basira u sum veŋŋa, mbumbu bak mayra ki ɦarira iriɗ ɗeeriya.

⁵ Asi cuk ay sesi ni tuɓuru ma ki ɦaarina, njori cocoo, cuk tasi ni baraw ma njorna may. Yow ay kasi a tira ni heɓelekŋa, funa kosi ni ki sooy cocoo.

⁶ Asi tuɗ eg Josuwe hu Gilgal. Asi dam u suu Israelna ana, «Ami yow ay ni hu mbassa dayra. Ami mbay ni a agi vagi galamba u amiya.»

⁷ Suu Israelna di suu Hivna ana, «Kala agi li ka cuki ni dukumi tani tok kalage. Ami hin a vi galamba u agi ni ana mege?»

⁸ Asi hin di Josuwe ana, «Ami ni suu sun maŋsina.» Josuwe joɓosi ana, «Agi ni suurage? Agi cologi ay ni arage?»

⁹ Asi hoŋom dira ana, «Suu sun maŋsina col ay ni hu mbassa dayra ni kay dlara vi Yawe, Looŋŋa, ami hum sem tii ha ki cocoo, dlara nam laɗ ay hu mbassa Egiptera.

¹⁰ U dlara nam laɗ ay eg muli suu Amorna suu mbana ŋgoo lum ma Yurdanna ii hiniŋŋara. Sihon, mul ma Hesbonna u Og, mul ma Basanna ma ay cuki hu mbassa Astarotta.

¹¹ Suu mami suu maarina u suu ŋgolo mamisina cuɗumi dla ndaɗta ana ami yow tina kami a ti hu voɗta, tuɗumi ŋgafagiya mba dagi ana, Ami ni suu sun magisina cemi wanda ni agi vagi banara u amiya.

¹² Gologi fu ma ay komina, nam ay ni kuwa hu li ma ami yowom ay komina, gologiya cemi ni nam so kiyo, mbuɗ ki ni heɓelekŋa.

¹³ Mbumbu bak mamira sel sum veŋŋa ay ni wiliya, cemi ni ndaɗ mbuɗ ki basira, haa ki lay. Baraw ma tamina u tuɓuru mamisina daɓ ay ki haara ni ko voɗta fiyekka.»

¹⁴ Suu Israelna vi tlesuu ti suu ay kosina tiya, may ni asi min ka a joɓ Yawe kay dlaasiraɗi.

¹⁵ Josuwe vi galamba u asiya, li heɓpa duk tasi ana nam hin hinisi iiriya. Suu Israelna halaŋ suu tasi kiyo.

Suu Israelna kaɓakŋa kay suu Gabaonna

¹⁶ Li buuna ŋgoo galamba asi vaɗ u suu asinara na hindi ni, suu Israelna huma ni ana suu asina ni ndarayasi suu vok zina, asi cuki ni dukusi tok.

¹⁷ Hu buu ma hindi namma gaw ni suu Israelna tuɗ ndugusi ziisiya, ɦoŋzi namma ni Gabaon, Kefira, Beerot u Kiriat Yearim.

¹⁸ Suu Israelna casi ka kiɗi, kay ana suu ŋgolo suu fok suu Israelna suu tasi ki ana asi hin hinisi iiriya, asi suu tasi ki ni fok Yawe, Lona vi suu Israelna. Na may suu Israel suu halaŋŋa gurni u suu masi suu ŋgolona.

¹⁹ Suu ŋgolona halaŋ di suu Israelna ana, «Ami suu tami ki vogosi ni u Yawe, Lona vi suu Israelna, kay ndaɗta aygi ka ndak a lasi dlara co egesiɗi.

²⁰ Gola ni dlara aygi hin lasira egesira, aygi hinisi iiriya kay ana suura aygi suu taygira mba hoŋ kaygiɗi.»

²¹ Suu ŋgolo suu fok suu Israelna hin ɓak kasi ana, «Asi lak iiriya». Asi hinni a suu maygi suu wakaygi guna u gooygi yona ay vona, ni maŋ suu Israelna halaŋ ko suu ŋgolona dira na.

²² Josuwe hin yasiya ɓakasi ana, «Agi ganami yami ana agi col ay ni hu mbassa dayra ni kay mege? Doliɗi ni agi cuki ni umi vo gaw may ni nanage?

²³ Agi hinni suu may suu gasi vunna kina, agi halaŋ hin miɗ ni u sunda laɗ fok suunara. Suu wak guna u suu go yona hu ziŋ Lonara.»

²⁴ Asi hoŋ di Josuwe ana, «Na daŋ may ami li na ni kay ami wi ki ana Yawe, Looŋŋa, di ay ki maŋ zoŋ mamma Moiz ana, mbas ndaɗta halaŋ nam hin ba suu cuki huruɗna kiyo, hin ɦagi mbas ndaɗta kiyo. Ami mbuɗ ki ndaa cocoo. Ami lagi ndaaragi ni kay a suɗumi ni iiri mamira. Ni kay ndaɗta ami li dla ndaɗta ni na.

²⁵ Aŋ gola ami cemi ni ga u saɓak maŋŋa, aŋ li dlara huruŋ min a laɗta u ami ko aŋ minda na.»

²⁶ Josuwe lasi ni ko ndaɗta na may, doo suu Israelna ki kasi ana sa casi kiɗi.

²⁷ Hu buu namma ni Josuwe cukusi a wak guna may go yona ay vo maŋ suu Israelna may. Hu givin ma togolla vi Yawena may ta ta cemi, hu li ma Lona manamma halaŋ.