JOSUWE 8 - Boy Lonana

Suu Israelna min tasi a duu u suu Aina

¹ Yawe di Josuwe ana, «Li ndaaɗi, yow suu duuna uŋ halaŋ, tuɗ kolo duu u suu Aina. Gola an ɦaŋ mul ma Aina ki hu duk koŋ wa, suu mamsina, ɦoŋziisina halaŋ u mbas mamba halaŋ lay.

² Aŋ hin li dlara eg mbassa Aira u mul maɗna ni ko ndal aŋ li mbassa Yerikora ay wandara na may. Na may tlesuu hu Aina u yoorina agi ndak a yowosi kay tagiya. Agi tuɗ baaragi zi ma Aina u ɦoŋzi ma ŋguyumma halaŋ.»

³ Josuwe col kolo u suu duu mamsina halaŋ a tuɗ ndug zi ma Aina. Josuwe man suu duuna buɓ buɓ dok hindi suu wi dla duuna cocona. Sunusi njeŋgee.

⁴ Nam gaɗasi dasi ana, «Gola agi hin tuɗ baaragi ɦoŋzi namma ay ŋgorom dagani. Tuɗugi ki saɓaki day eg ɦoŋzinaɗi. Lakagi ni tagi miniya.

⁵ An u suu kay ceerenna ami ɦuɗumi tami ha tok eg fun ɦoŋzina may. Hu li ma asi cuk ay ki a ŋgafamira wa ni, ami hin yow ay ki liŋŋa fokosiya ko jewra na.

⁶ Kay ndaɗta asi hin ɓak tasi ana, Gola asi yow liŋŋa koygi wa. Ni ami hin liŋ ay fokosiya. Asi hin dikimi ay gak gak ami tuɗusi ha ki eg ɦoŋzina na day.

⁷ Ni agi hin yowogi ay kolo mba ndug zina ni na gaw. Yawe, Looygina, ɦagi ɦoŋzi namma ki ni kogiya.

⁸ Hu li ma agi tli ɦoŋzina ki wa ni agi gam ki kura, ko Yawe dira na. Gola ni gaɗta an dagirara.»

⁹ Josuwe sunusiya. Asi tuɗ hu li ma baa zina may. Asi baa ay ni duk ɦoŋ gi Betel u Ai na, ay kolo ii u fiɗigina vi ɦoŋzi ma Aina na. Josuwe buu njeŋge ndaɗta ni duk suuna vo hu mbutluɓma.

Suu Israelna ndug ɦoŋzi ma Aina

¹⁰ Josuwe col kolo maɗii feɗet gol suu duuna ki halaŋ. Asi hin min tasi a tuɗ duu u suu Aina. Nam u suu ŋgolo suu fok suu Israelnana tuɗ fok suuna may.

¹¹ Suu ŋgolo suu duuna halaŋ suu ay u namma tuɗ kolo halaŋ. Asi mba ca vok ɦoŋzi ma Aina na ga ni vi ziisi ay ii mbayaw keŋ zi ma Aina na. Ҥuɗugumba ŋgolla hin duk ɦoŋosi u ɦoŋzi ma Aina ni ndaɗu.

¹² Josuwe yow suuna va ma buɓ buɓ vadl, baarasi ga duk ɦoŋ gi Betel u Ai. Ay ii u fiɗigina na ɗow.

¹³ Suuna vi ziisi ay ii mbayaw na may. Suu a juɓ ura ay ii u fiɗigina na may. Njeŋge ndaɗta ni Josuwe kal ki hu mbas ndaɗta may.

¹⁴ Maɗii ndaɗta feɗet gaw ni mul ma Aina wi suuna na ni, nam u suu mamsina suu ŋgolo suu hu ɦoŋzinana cuk ay ki ni na zak gaw a duu u suu Israelna. Hu li ma asi ŋgaf tasi hu tew tewna vok ɦuɗuguma Yordanda na. Na may asi wi ka ana suu daŋŋa ay ka baari ŋgorosi daganiraɗi.

¹⁵ Josuwe u suu mamsina li tasi ko ndal asi su ni kasi na. Asi yow liŋŋa tin irisi ŋgoo bagi hu fulla na ɗow.

¹⁶ Suu Aina cuk suu vo hu ɦoŋzinana ay ki halaŋ a dik u suu Israelna. Asi tuɗ ha ki na day eg ɦoŋzina a dik u gi Josuwera.

¹⁷ Hu ɦoŋzi ma Aina u Betel halaŋ sa njuf ma hin vo bay kal ki dik u suu Israelna kaɗi. Asi cuk ha ki ni hin vun kaana ka ni bay duga lay.

Suu Israelna ŋgal ɦoŋzi ma Aina kiyo

¹⁸ Yawe di Josuwe ana, «Mek saɓ maŋga vii koŋga ha kay zi ma Aina, kay an min a hiniŋsina ki ni hu duk koŋu.» Josuwe mek saɓpa kawi komba ha kay zi ma Aina na gay.

¹⁹ Hu li ma nam mek kom ha na may ni, suu ay baari ŋgoo ɦoŋzinana mba ndug zina ni na gaw. Asi mba cuk vo hu ɦoŋzina ɦurum tlena kiyo. Ŋgoo dagan asi gi ku zina ki ni na gif gif gaw.

²⁰ Suu Aina gol irisi dagan na ni, ndoos ku zina ki kolo ni na ɗew ɗew gaw. Josuwe u suu Israelna wi ndoos ku zina col kolo wa may ni asi wi ana suu ay baari gana ndug zina wa, cuk kura hu ɦoŋzina wa.

²¹ Josuwe u suu mamma hoŋ ay dagan mba duu u suu Aina. Suu Aina ka wi li ma asi a liŋ huna oloɗi. Suu Israelna casi kiyo.

²² Suu Israel suu ay vo hu zinana cuk ay ki may. Suu ay ŋgoo bagina hoŋ ay may, mba ŋgaf suu Aina, casi ki ni halaŋ halaŋ. Sa suɗ ka na dewɗi. Sa maa ka iiriɗi lay.

²³ Na may sa ma asi vam ay iirina ni mul ma Aina doy hol. Mbaaram ay fok Josuwe.

²⁴ Hu li ma suu Israelna daɓ suu Aina ki cira halaŋ, suu ay ki ŋgoo bagina u suu ay hu senena halaŋŋi, asi hoŋ ay vo hu ɦoŋzina, ci u suu hin ka vona ki halaŋ halaŋ may.

²⁵ Suu casi ki hu buu nammana halaŋ njufiina u boyogina bel ndi na 12.000, ni ndum suu hu zi ma Aina halaŋ.

²⁶ Josuwe ka hin lokoɗta lokoɗ saɓ mamba ha kay ɦoŋzi ma Ainaraɗi, ta ta asi daɓ suu hu zi nammana ki cira halaŋ tuwa.

²⁷ Na may suu Israelna yow yoori suu huna, ɦurum tlesuu hu zinana halaŋ ay ki kay tasiya ko ndal Yawe di ay ki fok jew maŋ Josuwera na may.

²⁸ Josuwe ŋgal ɦoŋzi ma Aina ki halaŋ halaŋ, mbuɗum ki ni ko li ma ŋgoo bagina na, ta ta cemi.

²⁹ Mul ma Aina Josuwe ɓalam ki kolo eg guna ta ta fiɗigiya. Faɗta mbuɗ a dikka may ni Josuwe ɦal voɗta ana paɗ maɗ mulna ay ki kaŋgaa. Asi gikim ha ki vun grek ma ɦoŋzinana, molom gogoyra kam na mbiw, usum ndaɗta ka ta ta cemini.

Ndum gaɗta vi Lonara kay ɦinira Eballa

³⁰ Josuwe min givin ma togolla maŋ Yawe, Lona vi suu Israelna kolo kay ɦinira Eballa.

³¹ Ko ndal Moiz, sa sunda vi Yawe, di ka maŋ suu Israelna jewra na, boy namma ki ɓiiri ga hu magaara gaɗta vi Moiz. Givin ma togolla ma minim u gogoyra sak sak kawi ka kal huɗina, asi li ɓivun ma ŋgalam ki ŋgalina maŋ Bu Suuna, hin li ɓivun ma mbaa heɓpa may.

³² Hu li ma suu Israelna ka gol halaŋŋa, Josuwe ɓii gaɗta vi Moiz eg gogoyra.

³³ Suu Israelna halaŋ, suu ŋgolona u suu kaɓakŋa u koyogi suu dukusina halaŋ, asi col ki keŋ Zandukka keŋeɗ jak bel. Asi ŋguy ki kay suu Levina suu ka zii Zandukka Galamba vi Yawera. Suu ta ɦiw col ay kay ɦinira Garizimba, suu hiniŋŋa col ha kay ɦinira Eballa may, ko ndal Moiz, sa sunda vi Yawe di kaɗta na ana paɗvunna ki fok jew tu ni kay suu Israelna.

³⁴ Ŋgoo dagan Josuwe ndum boy ma ɓiiri hu gaɗtana ki kolo u delem eŋga halaŋ halaŋ, paɗvunna u givunna. Ko ndal ɓiiri hu magaara gaɗtara na may.

³⁵ Boy ma Moiz ɓiirim kana halaŋ Josuwe hin maa ka ki bay ndumum ki fok suu Israelnaɗi, fok boyogina u kemba, fok suu koyogi suu ka dukusina bel lay.