JOSUWE 7 - Boy Lonana

Cora Akan laɗta u ɓak ma kaamma kamma

¹ Suu Israelna li dla cora ŋgel gaɗta li dla mayra dasi ana laɗɗira. Akan ma goŋ Karmina, goŋ Zabdina, goŋ Zerana hu deera vi Yudara, yow tlesuu doo ki kasi ana sa ŋgen kom egesiɗina aya. Huu Yawe ɓeŋ ki eg suu Israelna.

² Ay hu Yeriko wanni, Josuwe sun suuna a tuɗ gol ɦoŋzi ma Aina. Zi namma cuki u maɗiina vi ɦoŋzi ma Betelna na, tok eg zi ma Bet-Avenna, a asi tuɗ gol lina ay ki fok jewra.

³ Suu asina hoŋ ay eg Josuwe mba dam ana, «Ka suuna tuɗ belɗi, li ni suu buɓ buɓ mba' kala, hindi kala, ni ndak dik zi ma Aina. Aŋ ka loɓ ta suu Israelna u ŋgolosi belɗi. Kay suu asina ka zuli cocoɗi.»

⁴ Suu Israelna tuɗ ni va ma buɓ buɓ hindi, may ni asi hin yow liŋŋa ay ko suu Aina.

⁵ Suu Aina ci maɗna ha usi ni va ma dok hindi yam karkiya, dikisi usi ta ta mba tinisi ki hu Sebarim tlasi ay vun grekŋa dayra. Asi casi ay ni ga hu ɦuɗugumba. Suu Israelna mbuɗ ki ndaa cocoo. Asi ɓaɗ fokosi ni ko mbona ɦawa na.

⁶ Josuwe u suu ŋgolo suu Israelna haa barawi masisina kiyo, mba girif kaŋga fok Zandukka vi Yawera ta ta ɗik faɗta. Asi cuk buɗna kasi lay, kay dla mayra suuna suu ay kasi ndaɗta.

⁷ Josuwe cen Lona hin di ana, «Ҥii, Bu Suuna Yawe, aŋ hin hin suu Israelna a calaɗ mbo lum ma Yurdanna ay ki ni kay mege? Ni kay a hinimi ki ko suu Amorna a asi baami kira su? Lini hinimi ha ni doŋ lumma keŋ hiŋŋa ni mariyaɗɗi su?

⁸ An ceneŋu, Bu Suuna, hu li ma suu Israelna ɦal ŋgorosi fok suu babali masisinana, an hin di ni ana me ologe?

⁹ Suu Kanaanna u suu cuki hu mbas ndaɗta halaŋ hum boy namma na ni, asi hin tokŋi kami bel bel. Asi hin bulumumi semi ki hu mbas ndaɗta, ɦa ni aŋ hin saa kay seŋ ma ŋgol coco wanna ni ana mege?»

Cora vi Akanda asi faɗ uɗ kiyo

¹⁰ Yawe di Josuwe ana, «Col ki koloo, aŋ buu ga u vun dikiŋŋi kay mege?

¹¹ Suu Israelna li sulukŋa ni asiya. Na daŋ may asi ɓalakan galam manda kiyo, galamba an ɓiirisira a ŋgal Yerikora halaŋ. Na may asi yow tlesuu an dagi ana sa ŋgen kom egesiɗina aya. Asi kul ay lay. Ŋgay tle asina ka kosi voo.

¹² Kay ndaɗta suu Israelna ka ndak a col fok suu babali masisinaɗi. Asi mbuɗ ŋgorsi ay fok suu babali masisina. Asi mbuɗ ki ni ko tlesuu doo ki kasina na kay asi ŋgen tlesuu doo ki kasina. Lini agi ka cuk tlesuu ki doori asina kiɗi ni, an ka li u agi oloɗi.

¹³ Col koloo, mbuɗ suu Israelna ki teteɗ. Aŋ dasi ana, danagiya, lagi tagi ki teteɗ kay vinda. Yawe Lo ma vi suu Israelna di ana, va ma doo ki kamma ka dukugiya agi suu Israelna. Ni agi ka ndak a col fok suu babali magisinaɗi, bay agi gi va namma ki na baɗi.

¹⁴ Maɗii ni, agi mbaagi ay fok Yawe u njafagiya, njaf suu Yawe ŋgaɓasina hin mbay u deeresiya, deera Yawe ŋgaɓaɗta hin mbay ni u ziisiya. Zi ma Yawe ŋgaɓamma hin mbay ni u suu hurumma. Suu hu zi nammana sana gegelay ni hin mbay ki dew dew halaŋ.

¹⁵ Sa ma dla ndaɗta do kelemma hin ŋgalam ki u kura. Sa namma u suu mamsina halaŋ, kay nam ɓalak ki ni Galamba vi Yawe, li ni suluk may ma cona duk suu Israelna.»

Asi bulum cora Akan laɗta kiyo

¹⁶ Josuwe col kolo maɗii feɗet, nam tok suuna ay u njafasiya, dlara ndi ni kay njaf suu vi Yudana.

¹⁷ Nam tok dee suu vi Yudana ay halaŋ. Dlara hin ndi ni kay deera vi Zarara. Nam hin tok deera vi Zarara ay tokŋi, dlara hin ndi ni kel suu vi Zabdina.

¹⁸ Nam hin tok goryoŋ Zabdina ay tokŋi, dlara hin tokŋi kel Akan, goŋ Karmina, goŋ Zabdina, goŋ Zerana, hu deera vi Yudara.

¹⁹ Josuwe di Akan ana, «Goonna, aŋ ŋga ni Yawe, Lona vi suu Israelnana ɗow, ɦam ŋgolla ni mamu, dan dlara ay laɗta ay kiyo ŋgay taa kaŋgaɗi.»

²⁰ Akan hoŋ dira maŋ Josuwe ana, «A gasira anni sa ma li cora eg Yawena, Lona vi suu Israelnana, gola ni dlara an laɗ ndaɗta.

²¹ An wi baraw robba ŋgolla jivi cocora ay hu Babilonni, doonora kis kis mba' may, tokolo lorra dew may. An irin filiw yowosi aya. An pasi ka ga hu mbutluɓma, doonora ŋgay ki kaŋga u may.»

²² Josuwe sun suuna ana tuɗ vegesi ay ki kolo hu mbutluɓma. Asi tuɗ fasi ay ko ndaɗta na may, doonora ŋgay kaŋga usiya.

²³ Asi paɗ tlesuu ay pii ga asina ay kiyo, mbaarasi ay maŋ Josuwe. Ki fok suu Israelna halaŋ, asi cukusi ki ga fok Yawe.

²⁴ Josuwe tay Akan ma goŋ Zerana u baraw robba jivira, tokolo lorra may, doonora may, goryom suu njufiina u gorɓiina, bolo mbutl mamma, koro mamba u yoori mam suu gorina halaŋ, mbutluɓ mamma u tlegeyem suu vona halaŋ. Suu Israelna tuɗ um halaŋ, asi tuɗum ha ki hu Ҥuɗugumba Hahawra.

²⁵ Hu li ma asi tew hu li namma, Josuwe di ana, «Aŋ a mbaarami hahawra kami na ni kay mege? Yawe tiniŋ hahaw ndaɗta karam kaŋ wa may.» Suu Israelna halaŋ gikim ki u gogoyra, ŋgalam kiyo, cam ki ni u gogoyra.

²⁶ Asi molom gogoyra kay usumu, gogoy ndaɗta ka ta ta cemi. Yawe hurum hin heɓ ki kay yaamba coco ndaɗta. Kay ndaɗta li namma ta ta cemi ni asi yam ana, Ҥuɗugumba Hahawra.