JOSUWE 6 - Boy Lonana

Gulumun ma Yerikona bow ki kaŋgaa

¹ Yam ɦoŋzi ma Yerikona ki ŋgufi u gulumunna, vun grekŋa dugi lay. Sa ka kal ki kiɗikgi lay, sa ma ha kiɗik ka kal ha vo huu kaanaɗi lay ko ndaa suu Israelna.

² Yawe di Josuwe ana, «Aŋ gola, an hiniŋ suu Yerikona u mul masina u suu masi suu dlasi ŋgolona halaŋ ki ni hu duk koŋu.

³ Agi suu may suu ki ndaki a duunana halaŋ, ŋguyugi yam ɦoŋzina hu buuna dew ni agi ŋguy yam zina segi dew may ta ta buuna karkiya.

⁴ Muli suu li ɓivunna na kiɗisiya yow difi mek gamlagina kosi na kiɗisiya may, tuɗ ha fok Zandukka Galamba. Hu buu ma kiɗisiyana ni agi suu asgaana u muli suu li ɓivunna hin ŋguy yam ɦoŋzina segi na kiɗisiya. Muli suu li ɓivunna hin bu diffa may.

⁵ Hu li ma dif gamlagina buwa, agi hum del difina wa ni, suu Israelna halaŋ tum soora, ni gulumun ma ŋguy kay zinana hin bow ay ki ga kay tamu. Suu Israelna gegelay ni kal ha ni fokom ɗegee hu li ma nam coli huna gaw.»

⁶ Josuwe, goŋ Nunna, yi muli suu li ɓivunna ay egem di ana, «Tlagi Zandukka Galamba, muli suu li ɓivunna kiɗisiya yow dif gamlana kosi tuɗ ha fok Zandukka vi Yawe may.»

⁷ Nam di suu halaŋŋa ana, «Tumugi koloo ŋguyugi yam ɦoŋzina. Na may hin suu gol yam suunana cuk tasi ha fok Zandukka vi Yawera jewe.»

⁸ Dlara halaŋ li ni ko ndal Josuwe dira na may. Suu gol yam suunana tuɗ ha fok muli suu li ɓivunna suu kiɗisiyana. Asi yow mekŋa fok Yawena tuɗ ha foko bu diffana may. Zandukka Galamba vi Yawera tuɗ ha kay ceeresi may.

⁹ Suu gol yamba suu hiniŋŋa tuɗ dagan kay cee Zandukka may. Asi tuɗa bu diffa may.

¹⁰ Josuwe di suu halaŋŋa ana, «Agi ka tak delegi ki na ndeɗi, ka boy ma kal ay ki funugiɗi ta ta tew hu buu ma an hin dagi ana, tumugi soorana, ni agi hin tumugi soora ni na tuwa.»

¹¹ Zandukka Galamba vi Yawe ŋguy yam ɦoŋzina ay yaɗ dew ni hoŋ ay ki voo, mba buu ki ni hu zina.

¹² Maɗii feɗet ni Josuwe col ki kolo gaw, muli suu li ɓivunna tli Zandukka vi Yawe gaw may.

¹³ Muli suu li ɓivunna suu kiɗisiya suu u dif gamlagina kosina tuɗ fok Zandukka vi Yawe, tuɗ ha fok na ni bu diffa ha may. Suu gol yam suunana tuɗ ha fokosi may. Suu gol yam suuna suu hiŋŋa tuɗ ha kay cee Zandukka vi Yawe may. Asi tuɗ na ni u bura bu diffa irisira may.

¹⁴ Asi hin ŋguy yam ɦoŋzina ay a sesira mbara hin hoŋ ay voo. Asi li na gak gak tew buuna na karkiya u ndaɗta.

¹⁵ May hu buu ma kiɗisiyana ni asi yow kolo maɗii na feɗet, asi ŋguy ɦoŋzina yasi na kiɗisiya hu buu ma dewna, ni ko asi li ay fok jewra na may. Hu buu ma dew namma ni asi ŋguy yasi ni kiɗisiya kama.

¹⁶ A ŋguy mayra sesi a kiɗisiyara ni muli suu li ɓivunna bu diffa. Josuwe di suu Israelna ana, «Tumugi soora kay Yawe ɦagi ɦoŋzi namma ki ni magiya.

¹⁷ Agi hin to zi namma ki ni u tlesuu hurumma halaŋ halaŋ, li namma hin ki ni maŋ Yawe. Hin hu iirira ni cara gawlaŋga Rahab u suu maɗsina doy hol u tlege suu uɗ vo taraŋ hu ziiɗna may. Kay ndaɗ ŋgay suu may suu aygi cukusi ay a gol linana vo varaɗu.

¹⁸ Agi may ni ŋgenegi kogi eg va ma hu zi nammaɗi, tlagi va kogiɗi, ka agi kal tlesuu doo ki kasina ay vo duk suu Israelna a mbaarasi dlara yoora ay kasiɗi.

¹⁹ Doonora, lorra, u tlesuu yoori u kawi ma tlawna u kawi ma warna, asina halaŋŋi maŋ Yawe. Cukusi ni duk begera vi Yawera.»

²⁰ Suu Israelna halaŋ tum soora may, muli suu li ɓivunna bu diffa may. Asi tum soora cocora na ni gulumun ma ŋguy kay ɦoŋziunana bow ki ga ni na kirim gaw. Suuna halaŋ cuk ha vo hu ɦoŋzina ni na gaw, gegelay ni kal ha ni fokom hu li ma nam coli huna ni na gaw. Asi ɦurum zina ki halaŋ halaŋ.

²¹ Tlesuu hu ɦoŋzinana halaŋ asi ŋgalasi kiyo, sa tli va ka kombi, suu warna njufiina u boyogina lay, gorzoŋina u suu maarina lay, yoorina, timigiina u korra halaŋ asi casi ki u ŋgewina.

Josuwe hin Rahab u suu maɗsina iiriya

²² Josuwe di suu mba' suu may suu ay ki gol lina fok jewna ana, «Cukugi ha kalafi hu ziŋ cara gawlaŋga, kalaɗ ay kiyo, ndaɗ u tlegeyeɗ halaŋ ko ndal agi suu tagi ka fokoɗta na may.»

²³ Gorzoŋi suu ay gol lina jew asina cuk ha uɗ kalafiya, kal Rahab ay ki u buɗu, suɗu, gorseɗna u tlegeyeɗ suu ay uɗ kalafina halaŋ. Asi cukuɗ suu hu dee maɗtana ay ki bunsu halaŋ, tuɗ lakasi ha ki na day eg ziisi asi suu Israelna.

²⁴ Ҥoŋzi ma Yerikona asi ŋgalam ki halaŋ halaŋ u suu may suu hurumma bel bel. Va ma asi hinimma ni doonora, lorra u tlesuu yoori u kawi ma tlawna u kawi ma warna. Asi mba cuk tle asina duk begera hu ziŋ Lonara.

²⁵ Josuwe hin cara gawlaŋga Rahab iiri u suu maɗsina u tlegeyeɗ suu varaɗna halaŋ. Ndaɗ kak ki zina duk suu Israelna ta ta cemi. Kay ndaɗ ŋgay suu may suu Josuwe sunusi ha a gol linana varaɗu.

²⁶ Hu coki ndaɗta ni Josuwe col kolo suu ki fok suuna kay ɦoŋzi ma Yerikona ana, «Sa ma hal a hoŋ min zi ma Yerikona kolo na minna ni Yawe gam vunna. Sa ma hal a vek u zina gana vekŋi zul goorom ma ŋgolna gaw. Sa ma hal a vek vun grekŋa kolona vekŋi zul gorom ma tobona gaw may.»

²⁷ Yawe ka u Josuwe sem tii ha ki kay yam mbassa na halaŋ halaŋ.