JOSUWE 5 - Boy Lonana

Suu Israelna caw ɗiwisi hu Gilgal

¹ Muli suu Amorna suu cuki ŋgoo lum ma Yurdanna ii fiɗigina nana, u muli suu hu mbassa Kanaanda halaŋ suu ka cuki vok mbo lum ma ŋgolna nana, hum ana Yawe so mbo lum ma Yurdanna ay ki fok suu Israelna, asi calaɗ ay ki ŋgoo lumma ii ma hiniŋŋa wa ni, asi mbuɗ ki ndaa cocoo. Musukusi ka tin ga oloɗi ko ndaa suu Israelna.

² Hu li namma Yawe di Josuwe ana, «Tli velna koŋu, caw ɗiw suu Israelna suu ɗiwisi bay caw tuna kiyo.»

³ Josuwe ɦal voɗta maŋ suuna a yow vel gogoyra caw ɗiw suu Israelna ki kolo kay mbura yaɗ ana mbu mayra jagawa ɗiwrara.

⁴ Gola ni boy ma Josuwe cawasi ɗiwisi ki kamma, suu may suu cuk ay ki hu mbassa Egiptera halaŋ, njufnai u asgaari suu duuna bel bel ni miɗ ha ki ni ŋgoo bagi hu fulla, hu voɗta hu li ma asi cuk ay ki hu mbassa Egiptera.

⁵ Na may suu Israel suu cuk ay ki hu Egiptena halaŋ ɗiwisi ki cawiya. Suu may suu vuɗ ay ki ŋgoo bagi hu voɗtana halaŋŋi sa ma ɗiwim cawi kaɗi.

⁶ Suu Israelna li basara ŋgoo bagi hu fulla ni dok fiɗi. Hu basa ndaɗta suu may suu cuk ay ki hu mbassa Egiptera ki ndaki a duunana daɓ ki miɗna ŋgoo bagi hu fulla halaŋ halaŋ. Suu may suu ŋgel vun Yawe nam suu tam ki ana asi ka cuk hu mbassa nam vi vunum kaɗ a ɦaɗ maŋ somoyosiraɗina, mbas mayra law mbul yumma u mbiira.

⁷ Goryosi varak kay sesi ca ni asiya. Goryosi asina ni suu Josuwe cawasi ɗiwisi kina, kay asi ɗiwisi ka cawiɗi. Sa cawi ɗiwisi ay ka voɗ ŋgoo bagi hu fullaɗi.

⁸ Hu li ma asi daɓ caw ɗiw suuna ki daɓmi asi lak hu li namma gak gak ɗiwisi cil ki tuwa.

⁹ Yawe hin di Josuwe ana, «Cemi ni an gikigi njenjera ay hu mbassa Egiptera ha ki egegi wa na day.» Li namma asi tinim sem ana Gilgal ta ta cemi.

Luu ma vun til Pakŋa ma luurum jewna

¹⁰ Suu Israelna vi ziisi hu Gilgal asi li luu ma Pakŋa hu buu ma doogo yam fiɗina hu til namma fiɗigira ŋgoo bagi hu fulla tok eg zi ma Yerikona.

¹¹ Vini maɗiira ni asi ti ni fu ma bay kuffa dukumma, waa ni gaarana may. Asi li tina ni u tlesuu hu mbas ndaɗtana.

¹² Hu li namma na gaw ni asi ka fi manna oloɗi. Hu basa ndaɗta ni asi ti ni tlesuu jiv hu mbassa Kanaanda.

Josuwe u sa sunda vi Yawe coli u ŋgewna komu

¹³ Hu li ma Josuwe tew eg Yeriko tokŋa, tli irim gol ha na ni wi sana coli fokom u ŋgewna ki paɗi komu, sii cocoo. Josuwe tuɗ ha egem joɓom ana, «Aŋŋi saamina ɗowba ni sa ma vi suu duu u amina su?»

¹⁴ Sana hoŋom dira ana, «Ҥawaa, anni sa ma ŋgol asgaa suu vi Yawena. An mba ni mbaay tuwa.» Josuwe cuk kaŋga fokom u vun gifimu goɓ vogom kaŋga fokomu hin di ana, «Bu Suuna manna a di ne me maŋ saam ma sunda nige?»

¹⁵ Sa ma ŋgol suu asgaa suu vi Yawena di Josuwe ana, «Fok tuɓuru maŋ ma seŋŋa kiyo, kay li ma aŋ hu wanna ni li ma ki teteɗna.» Josuwe hin li ko ndaɗta na may.