JOSUWE 4 - Boy Lonana

Gogoyra doogo yam mba ta gi humba

¹ Hu li ma suuna halaŋ daɓ ha ki taɓara kolona may ni, Yawe di Josuwe ana,

² «Yow suuna doogo yam mba' duk njaf suu Israelna, deera halaŋŋi aŋ tli sana ay ki hu dew dew halaŋ.

³ Ҥasi voɗta asi tuɗ yow gogoyra ay na doogo yam mba' u sem muli suu li ɓivunna hu li ma asi coli hu wanna, agi tuɗ u gogoy ndaɗta tuɗ cukuɗ hu li ma agi hin nda buu huna.»

⁴ Josuwe hin yow suuna doogo yam mba' duk njaf suu Israelna, suu nam ŋgaɓasi ay hu deera dew dewna.

⁵ Josuwe hin dasi ana, «Tuɗugi ha fok Zandukka Galamba vi Yawe, Loogina, ha duk mbo lum ma Yurdanna duk gayra tana, gegelay ni tli gogoyra ay pel bikim dew dew u ndum dee suu Israelna halaŋ.

⁶ Gogoy ndaɗta hin ha dukugi ni a va ma gi humba, ha fokka ni goryogi li joɓogi ana gogoy ndaɗta agi cukuɗ na ni amege ni.

⁷ Agi hin dasi ana, ni kay a tak mbo lum ma Yurdanna so ki fok Zandukka Galamba vi Yawe hu li ma asi taɓa ay dukum ndolna. Mbo lumma irim ɓorow ki duku, gogoyra ndaɗta hin ki cuki ɦawaa. Gogoy ndaɗta ca ni hin ka ni a gi humba maŋ suu Israelna ha kay goryosi na gak gak.»

⁸ Suu Israelna li ko ndal Josuwe dasira na may. Asi yow gogoyra kasi doogo yam mba' ay duk mbo lum ma Yurdanna ko ndal Yawe di Josuwera na may. Ni u ndum dee suu Israelna bel may. Asi tuɗ cukuɗ ni hu li ma asi a buu ga njeŋge huna tu may.

⁹ Josuwe min gogoyra doogo yam mba' ta yowoɗ ay u sem muli suu li ɓivunna suu zii Zandukka Galamba ay duk mbo lum ma Yurdanna kolo, ta ta cemi gogoy ndaɗta kaa.

¹⁰ Muli suu li ɓivunna suu zii Zandukka Galamba col duk mbo lumma Yurdanna gak gak daɓ u boy ma Yawe dam maŋ Josuwe ana lamuna ki halaŋ halaŋ tuwa. Ni ko ndal Moiz di ka maŋ Josuwera na may. Suu Israelna dik u tasi zak zak a taɓa lum ma Yurdanna kira.

¹¹ Hu li ma suu Israelna daɓ ha ki taɓara ii hiŋŋa halaŋŋi Zandukka Galamba vi Yawera hin ha kay ceeresi dagani. Muli suu li ɓivunna tuɗ ha fok suu Israelna may.

¹² Suu may suu gi vun vokŋa ha jewna ni dee suu vi Rubenna, suu vi Gadna u nus dee suu vi Manasena may. Asi nja tasi ha ni u mbeleŋ duu ma asi duurumma ko Moiz dasi kaɗta na may.

¹³ Suu duuna suu tasi ki mini a gijaŋ duunana na 40.000 jak fok Yawe a nda li duuna tuɗ irisi ni hu mbassa Yerikora na gay.

¹⁴ Hu buu namma ni Yawe mbuɗ Josuwe ki ii suu Israelna ŋgol cocoo. Asi mbuɗ lam ndaaram ɦay. Ko ndal asi li ndaa Moiz ay u iiri tam ta ta miɗ mammara na may.

Suu Israelna tuɗ Gilgal hu mbassa Kanaanda

¹⁵ Yawe di Josuwe ana,

¹⁶ «Di muli suu li ɓivunna suu zii Zandukka Galamba asi taɓa ay ki koloo.»

¹⁷ Josuwe hin di muli suu li ɓivunna ana, «Taɓagi ay ki koloo.»

¹⁸ Hu li ma muli suu li ɓivunna suu zii Zandukka Galamba vi Yawe taɓa ay ki kolo may ni, sem muli suu li ɓivunna ma tin ki kolo doŋ hu li eŋŋana may ni mbo lum ma Yurdanna hoŋ cilla ki balamammi na welekeɗ gaw, gijaŋ ɓaɗta ni ko tamba jewra na. Mbona oy hoŋ hoŋŋa ki na halaŋ halaŋ gaw.

¹⁹ Suu Israelna taɓa mbo lum ma Yurdanna ay ni hu buu ma doogona hu til ma jewna. Asi vi ziisi ni ii u maɗiina vi ɦoŋzi ma Yerikona na hu mbassa Gilgalla.

²⁰ Gogoy mayra yowoɗ ay duk mbo lum ma Yurdanna doogo yam mbara Josuwe miniɗ kolo ni hu Gilgal.

²¹ Nam hin di suu Israelna ana, «Hu li ma gor ŋgologi magisina hin joɓ somoyosi ka ana gogoy ndaɗta uɗ ni ana megena,

²² agi hin haɗ dla ndaɗta ka maŋ goryogi dasi ana, suu Israelna taɓa mbo lum ma Yurdanna ndol nam so ki fokosiya.

²³ Yawe, Loogina, soogi mbo lum ma Yurdanna ki fokogiya ta ta agi taɓa lumma ki bay segi loɗa ko nam li ay jew hu mbo Lum ma Cerewnara na may. Yawe soomi mbona ki fokomiya, ami jak ay hu lum ŋgolna ni semi loɗ kaɗi.

²⁴ Nam li na ni kay a suu kay yam ndaŋgarana halaŋ wi ki ana Yawe, nam saɓak cocoo. Olo ni, kay a agi li ndaa Yawe, Loogina, hu buuna tew tew.»