JOSUWE 3 - Boy Lonana

Suu Israelna taɓa mbo lum ma Yurdanna

¹ Vin maɗiira wanni Josuwe u suu Israelna yow kolo maɗii na feɗet, asi tuɗ fun lum ma Yurdanna. Asi tuɗ buu fun lumma a hin taɓa lumma vin maɗiira may.

² Hu buu ma hindi cana ni, suu ŋgolo suu fok suu Israelnana tuɗ kolo dukusi ni na zuk zuk a dasira.

³ Asi di suu Israelna ana, «Hu li ma agi wagi Zandukka galamba vi Yawe, Loogina wa, u muli suu li ɓivunna suu Levina ka tlaɗu ni, agi hinigi li ma agi hu wanna, cukugi tagi kay ceereɗu.

⁴ Agi hin wi voɗta tuɗ ni uɗu, kay agi tuɗ ay ka hu li namma dewɗi. Na may tuɗugi ha kolo u Zandukka tokgi, hinigi duk hoŋogi ki kilometer dew.»

⁵ Josuwe hin di suu Israelna ana, «Lagi tagi ki teteɗ kay vini maɗii wanni Yawe hin li dlara mbuɗ mbuɗta dukugiya.»

⁶ Josuwe hin di muli suu li ɓivunna ana, «Tlagi Zandukka Galamba tuɗugi ha fok suu Israelna.» Asi tli Zandukka Galamba tani tuɗ ha fok suu Israelna.

⁷ Yawe di Josuwe ana, «Cemi wanni an gijaŋŋa a mbuɗuŋ ŋgolla ii suu Israelna, kay a asi wi ki ana an hin li u aŋŋi ko an li ay u Moizza na may.

⁸ Aŋ may ni hin ɦal gaɗta maŋ suu may suu zii Zandukka Galamba ana, hu li ma agi tew fun mbo lum ma Yurdanna wa ni, agi hin col duk mbo lumma, hu li ma agi cuk ha dukŋa.»

⁹ Josuwe di suu Israelna ana, «Huɗugi tagi ay tani humugi boy ma vi Yawe, Looginana, haa.»

¹⁰ Agi hin wi ki ana Lona ma iirina ka dukugiya. Nam hin dikigi suu Kanaanna, suu Hetna, suu Hivna, suu Perizna, suu Girgasna, suu Amorna u suu Jebusna ha ki fokogiya.

¹¹ Gologiya Zandukka Galamba vi Yawe ma kay ndaŋgara belna hin tuɗ ha fokogi duk mbo lum ma Yurdanna.

¹² Cemi ni agi yowogi suuna doogo yam mba duk suu Israelna, deera halaŋŋi agi tli sana ay ki hu dew dew bel.

¹³ Hu li ma sem muli suu li ɓivunna suu zii Zandukka Galamba vi Yawera tin ha ga duk mbo lum ma Yurdanna may ni, mbo lum ma Yurdanna irim ɓorow kiyo, mbo ma ɓaɗ ay kolo kay ɦinira Amonda col ha gaw may, mbona tok ha ki kolo kel tam hu li ma dewna.

¹⁴ Hu li ma suu Israelna hin mbutluɓ masina yow wa a calaɗ mbo lum ma Yurdanna ni, muli suu li ɓivunna suu zi Zandukka Galamba tuɗ ha ni fokosiya.

¹⁵ Asi taɓa lumma ni hu til ma suuna feɗ tlena vona, ni hu li ma lum ma Yurdanna tli cocona. Hu li ma suu zii Zandukka Galamba tew fun mbo lum ma Yurdanna, cuk sesi ha ga duk mbona may ni,

¹⁶ mbo ma ɓaɗ ay kolo kay ɦinira seŋ gaw, nam tok ha ki kel tam na dew, col ha ki na day, ha ki Adam hu ɦoŋzi ma keŋ Sartanna. Mbo may ma tuɗ ay ga hu Araba mbo lum ŋgol ma galakŋa um ka ni na gaw may, suu Israelna calaɗ lum ma Yurdanna ni vok ɦoŋzi ma Yerikona na.

¹⁷ Muli suu li ɓivunna suu zii Zandukka Galamba vi Yawera col kay ndaŋgara ki sooyra duk gayra hu mbo lum ma Yurdanna. Asi suu Israelna halaŋ calaɗ mbo lumma ay ki ni u sesi ki sooyra ɦawa may, ta ta asi juɓa a njaf suu Israelna halaŋ taɓa ay kiyo.