JOSUWE 23 - Boy Lonana

Bolla vi Josuwe ta daɓ daganna

¹ Basara ki dagan bolow cocoo, hu li ma Yawe koɗ ta suu Israelna ii suu babali masi suu ŋguyusina halaŋŋa ni, Josuwe mbuɗ ki maa cocoo, basaɗam kal ki bolow ɦay.

² Nam yi suu Israelna, suu ŋgolo mamsina, mulina suu ka ɓakŋa u suu ŋgolo suu li sunda halaŋ dasi ana, «An cemi mbuɗ ki ni maari, basaɗan ki ni ŋgolo.

³ Agi u tagira wi dlara Yawe Loogina laɗ eg njaf suu daŋŋa wanda kay a njun kagira, kay Yawe, Loogina, duu kagi ni nam u tamba.

⁴ Gola an ɓorowogi mbassa vi njaf suu ɦawa suu li cuki kaɗna ki maŋ deeregi dew dew halaŋ u njaf suu ɦawa suu an casi ki col ha fun mbo lumma Yurdanna ii u maɗiina day ta ta tuɗ ay fun mbo lum ŋgol ma Mediteranena u fiɗigina.

⁵ Yawe, Loogina, dikigisina ha ki fokogi ni u tamba, ni kay a agi varak lak ki hu mbas masira ko ndal Yawe, Loogina, dagira na.

⁶ Agi may ni lakagi saɓaki, lagi u gaɗta Moiz ɓiiriɗ kara. Viɗigi tagi ki a tuɗ bik njuf may bik gulu mayɗi.

⁷ Kalagi ka vi suu ɦawa suu hin cuki keŋegi ca canaɗi, yagi sem loogi masisina funugiɗi, suu tagi u loogi masisinaɗi lay, sunusiɗi lay. Goɓogi ga fok loogi masisinaɗi ɗay.

⁸ Lini agi ɦagi tagi ni maŋ Yawe, Loogina, ko agi li ay ki fok jew wandara na ni,

⁹ Yawe ndak a dikigi njaf suu ɦawana suu saɓak cocona kiyo, sa ma ndak a col ay fokogi kaɗi ta ta cemi.

¹⁰ Sa ma dewna ndak a dik suuna buɓ, kay Yawe, Loogina, duu kagi ni namu, ko nam dagi ki fok jewra na.

¹¹ Agi tagira may ni gol tagi jiviya, minigi Yawe, Loogina.

¹² Na may lini agi noyogi Lona kiyo, lini agi vi galamba u njaf suu ɦawa suu hin wanna, lini agi ɗum boyogina duk tagi u asiya, lini agi tuɗ varasiya, asi mbay varagi may,

¹³ ni agi wi ki kagi ana Yawe, Loogina, ka hin tuɗ fok gak a dikigi njaf suu ɦawana ha ki fokogira oloɗi, asi hin mbuɗ kagi ni a bayna u daw ma vagina, ni a balaf ma waɗagina ni a wayra ndi irigira ta ta agi hin bulum ki hu mbassa jivi ndaɗta ta Yawe, Loogina, ɦagirara.

¹⁴ Gola an cemini tuɗ ni tuɗiya ko ndal tlesuu kay ndaŋgarna halaŋ ka tuɗta na may. Na may agiya, wagi ki u hurugi halaŋ u tagira halaŋ ana, boy jivi ma Yawe, Loogina, dam wanna maa na dew lay ma maa ki kaŋga kaɗi, dlara nam daɗ kagira halaŋ li kiyo, boy maa dew ma nam dam hin ki bay li ni kaɗi.

¹⁵ Na daŋ may boy jivi ma Yawe, Loogina, damma li ki ni halaŋ halaŋ ko ndaɗta na lay Yawe ndak a lagi boy ma cona egegi ta ta daɓagi ki hu duliyara kay ndaŋgara jivi ndaɗta may, ta nam Yawe, Loogina, ɦagirara.

¹⁶ Lini agi ŋgel Galamba Yawe, Loogina, vaɗ u agira, Galamba nam ɓiirigira kara, lini agi tuɗ sun loogi suu ɦawana, lini agi goɓ ga fokosiya, yara vi Yawera hin col kolo kagiya, bulumugi ki ni na zak hu mbassa jivira nam ɦagira wandara.»