JOSUWE 22 - Boy Lonana

Suu cuki ii u maɗiina keŋ mbo lum ma Yurdanna hoŋ hu iisina

¹ Josuwe yi suu vi Rubenna, suu vi Gadna u nus suu vi Manasena,

² Nam dasi ana, «Agi wi dlara Moiz sa sunda vi Yawe daɗta ki u irigi wa. Agi humum vunun hu dlara an dagirarawa bel may.

³ Basara li ki ca ni bolowo ta ta cemi agi noy gorsegina ka kiɗi. Agi tin hurugi a li u gaɗta vi Yawe, Looginara.

⁴ Cemi ni Yawe, Loogina, ɦal koɗ tara wa maŋ gorsegina ko nam di ay ki fok jewra na. Agi ndak cemi ni a hoŋ hu mbutluɓ magina may hu mbas magira kay tagira ta Moiz sa sunda vi Yawe ɦagira kara, ha ki ŋgoo lum ma Yurdanna ii hiniŋŋa wandara.

⁵ Na may va ma ŋgolna ni agi mba humugi u gaɗta vi Lonara lagi uɗ jiviya, gaɗ mayra Moiz ɓiirigira kara. Nammi sa sunda vi Yawe, Loogina, minigi Yawe, Loogina, tuɗugi hu voɗ mamba, golom gaɗ mamba jiviya, ɦeɓegi tagi ni egemu, sunum u hurugi halaŋ u tagira halaŋ may.»

⁶ Josuwe paɗ vunum ki kasiya, hin sunusi hu liisina may. Asi tuɗ hu mbas masira hu ziisina may.

⁷ Moiz ɦal lina ka maŋ nus goryoŋ Manasena ni hu Basan, Josuwe hin ɦal lina ka maŋ nus goryoŋ Manase suu hiniŋŋa ki ni ŋgoo lum ma Yurdanna ii u fiɗigina eg gorsesina tana may, Josuwe a sunusi hu mbas masira ni nam paɗ vunum ki kasi may.

⁸ Nam dasi ana, «Hoŋogi hu ziigina u bege magira coco wandara, u yoori magi suu bolow cocona may, doonora, lorra, walakka u kawina u barawna ŋgol coco lay, ɓorowogi jo ma agi ɦurumum ayna duk tagi u gorsegina may.»

Min li ma ŋgal ɓivunna fun lum ma Yurdanna

⁹ Njaf suu vi Rubenna u suu vi Gadna u nus goryoŋ Manase suu ha ki cuki ii u maɗiinana hoŋ vo hu ziisiya, asi hin gorsesi suu Israelna ka hu Silo hu mbassa Kanaanda may, asi tuɗ hu mbassa Galaadta, mbassa asi faɗ a ɓorow masina ko ndal Yawe di Moiz na mayra.

¹⁰ Asi mba tew hu Gelilot fun lum ma Yurdanna vun mbassa Kanaanda may ni, asi min givin ma togolla ŋgol coco tok kolo fun lumma.

¹¹ Suu Israelna hum suuna ka ɓak ana, «Goryoŋ Rubenna u suu vi Gadna u nus goryoŋ Manasena min givin ma togolla ka vok mbassa Kanaanda na gay hu ɦoŋzi ma Gelilotna fun lumma Yurdanna keŋ suu Israelna na.»

¹² Hu li ma suu Israelna hum dla ndaɗta na ni asi tok tasi hu Silo ga na halaŋ kay a min tasi a tuɗ duu u asira.

¹³ Suu Israelna sun suuna eg goryoŋ Rubenna suu vi Gadna u nus goryoŋ Manasena hu mbassa Galaadta. Pinhas ma goŋ mul ŋgol ma li ɓivunna Eleazarna,

¹⁴ u suu ŋgolo suu fok suunana um hu doogo may kay dee suu Israelna halaŋ. Suu ŋgolo asina paɗ ay ki ni hu deera dew dew halaŋ.

¹⁵ Asi mbay eg suu vi Rubenna u suu vi Gadna u nus suu vi Manasena hu mbassa Galaadta, mba ɓakasi ana,

¹⁶ «Gola suu tokka vi Yawena u dlasira halaŋga di ana, agi a li dlara bay ɗegeera eg Lona vi suu Israelna na ni kay mege? Agi huɗ tagi ay ki eg Yawe na day a minigi givin ma togolla ki kay tagi ni nanage? Cemi ni agi min a duu ni u Yawe su?

¹⁷ Dla cora Peor laɗ wandara ndakaygi kaɗi su? Cemi ni aygi ni bay mbuɗuygi ki teteɗ tu lay, dla cora ka ndi kay suu vi Yawena coco lay.

¹⁸ Agi may ni, cemi ni agi min a garak dukugi ki u Yawe olo, agi cemi ni min duu u Yawe, vini wanni nam hurum hin ɓeŋ ki ni eg suu Israelna halaŋ may.

¹⁹ Lini mbassa ɦagirara ka ki teteɗɗi, tuɗugi ay hu mbassa vi Yawera li ma Yawe ka kaki huna, mbay taɓagi u amiya, lagi dlara a duu u Yaweraɗi, lagi dlara a duu u ami a minigi givin ma togolla ki kay tagi keŋ li ma ŋgal ɓivunna ma vi Yawe Looyginanaɗi.

²⁰ Hu li ma Akan ma goŋ Zerana li dla cora ŋgel vun gaɗta na ni, dla cora hin ndi ni ka kay suu Israelna halaŋgi su? Nam ba ka kay coomba ni ka kay tam dewɗi.»

Hoŋ dira vi suu u maɗiinana

²¹ Goryoŋ Rubenna u goryoŋ Gadna u nus goryoŋ Manasena hoŋ dira maŋ suu ŋgolo suu fok suu Israelnana ana,

²² «Lona, Lona, Yawe, Lona, Lona, Yawe, ni sa ŋgolna, nam wi dlara ami laɗ wandara ki halaŋ halaŋ. Agi tagira lay ni hin wi dla ndaɗta kiyo, lini ami li gasi ni dlara duu u agiya, lini ami li ni dlara co eg Yawe ni ka nam hin njun kamiɗi.

²³ Lini ami min givin ma togolla ni a hin Yawe mamina kiyo ni, lini ami minimmi a li ɓivun ma ŋgalam ki ŋgalina, a li ɓivun ma taɓ duk ɦoŋga u ɓivun ma furira ni Yawe hin wami dlaami ndaɗta ni namu.

²⁴ Ҥawaa, ami li dla ndaɗta na ni u ndaa ma ana vini wanni goryogi hin ɓakami goryomi ka ana va ma taɓagi dukugi u Yawe, Lona vi suu Israelna, ni mege?

²⁵ Duk hoŋoygi u agi goryoŋ Rubenna u suu vi Gadna Yawe kaaygi dukuygi ki u mbo lum ma Yurdanna wa. Kay ndaɗta vaagi ma ka ko Yawe oloɗi, li wa na ni goryogi hin viɗimi yam goryomi ki ka hinisi a li ndaa Yawe oloɗi.

²⁶ Ami ɓak tami ana mariyaɗ ni ami min givin ma togolla ni ka kay a ŋgal ɓivunna huraɗi lay, ka a li ɓivunna huraɗi lay.

²⁷ Ni a di kira duk ɦoŋogi u amiya, duk ɦoŋ goryoygi suu hin ka ŋgoroygi daganna a asi wi ki ana ami li ni sunda vi Yawera daŋ may, u ɓivun ma heɓpa ma taɓ duk ɦoŋga, a ɓivun ma ŋgalam ki ŋgalina, ni kay ana goryogi ka dami goryomi ka vini ana agi ka suu vi Yawena diraɗi.

²⁸ Ami ɓak tami ana, lini suu ta hin dami ana agi ka suu vi Yawenaɗi ni ami hin takasi givin ma togolla ma mini varami wanna. Ni a ŋgal ɓivunna maŋ Yawe ma somoyomi minim kana. Ni ka a ŋgal ɓivun huɗi lay, a li ɓivun ki hu taniɗi lay, ni kay a dikira duk ɦoŋomi u agiya.

²⁹ Saara a ami duu u Yawe ka hurumiɗi, a mbuɗ irimi u va ma daŋ a hin Yawe kiɗi lay. Ami min ka givin ma togolla ma ami a li ɓivunna hu a hin Yawe kiɗi, Yawe ka ni hu givin ma togolla ma nam ŋgaɓamma tew tew.»

³⁰ Hu li ma mul ma li ɓivunna Pinhas ma a ŋgolla fok suu tokina u muli suu ka fok suu Israelna suu ka moli egemma hum boy ma goryoŋ Rubenna, goryoŋ Gadna u goryoŋ Manasena damma na ni, asi seŋ tasi gaw, boy namma irisi jiviya.

³¹ Pinhas, ma goŋ mul ŋgol ma li ɓivunna, Eleazar, di goryoŋ Rubenna u goryoŋ Gadna u suu vi Manasena ana, «Ami wi ki ana Yawe ka dukuygiya kay ana agi li dlara co ka eg Yaweɗi, agi buɗ gorsegi suu Israelna ki ko Yawe wa.»

³² Pinhas ma goŋ mul ŋgol ma li ɓivunna Eleazarna u suu ŋgolo suu fok suunana cuk tasi hin goryoŋ Rubenna u goryoŋ Gadna kaa, hoŋ ay ki hu mbassa Galaadta hu mbassa Kanaanda eg suu Israelna mba cuɗusi boy namma ki may.

³³ Suu Israelna hum boy namma u furira, suu Israelna halaŋ gi deɓ Lona, hinni asi ka ɓak boy ma tuɗ duu u suu asina oloɗi, ka li dlara tuɗ ɓalak mbassa vi goryoŋ Rubenna u goryoŋ Gadna u suu vi Manasena ki oloɗi lay.

³⁴ Goryoŋ Rubenna u suu vi Gadna yi givin ma togolla namma ana, Dikira kay «Nammi a va ma dikina duk ɦoŋomiya, ana Yawe ni Lona.»