JOSUWE 2 - Boy Lonana

Josuwe sun suuna mba' ŋgayra hu Yeriko a gol lina

¹ Josuwe ma goŋ Nunna ay hu Sittim wanni cuk suuna ay ŋgay gumun mba', dasi ana, «Tuɗugiya nda gologi mbassa aya, suu bella ni agi gol ni Yeriko.» Asi hin tuɗ may, ii cuk hu ziŋ cara gawlaŋga dew yaɗ ana Rahab, buu varaɗu.

² Fiɗigi ndaɗta asi i jok boy namma ha ki maŋ mul ma Yerikona dam ana, «Gola suuna mbay kaa njeŋge tani ni suu Israelna. Asi mba ni a gol ni lina.»

³ Mul ma Yerikona sun vun sunda ay eg Rahab daɗ ana, «Cukumi suu mbay kaa njeŋge varakŋa ay kiyo, suu may suu buu kaa varakŋa kay asi mba ni a tin ndeŋ mbassa.»

⁴ Cara yow suu mba' asina, ŋgayasi ha ki ŋgay ni, hin hoŋ ay di suu vun sunda ana, «Na daŋ may suu asina mbay varanu, an ka wi li ma asi col ay hunaɗi.

⁵ Njeŋge ni asi dug vun grekŋa ki may ni, suu asina hin cuk ha kiyo, li ma asi tuɗ huna an wam kaɗi kama. Agi liŋigi usi zak zak, agi hin fasi duku.»

⁶ Doliɗi ni ndaɗ tuɗusi ki ni kolo kay yam sorna, baarasi ŋgayra ki kasi may.

⁷ Hu li ma suuna tuɗ a cuɗusi usira asi dug vun grek ma ay ɦoŋzi ŋgolnana ka ŋgorosi dagan ni na gaw may. Asi cuɗusi usi gak gak tuɗ fun mbo lum ma Yurdanna vun voo ma taɓara.

Rahab ɓak boyna u suu mba' su gol lina

⁸ Suu gol lina bay buu kaŋga tu may ni, ndaɗ ɗiŋ ha kolo egesi kay yam zira.

⁹ Ndaɗ di suu asina ana, «An wi ana Yawe ɦagi mbas ndaɗta ki wa. Ami suu hu mbas ndaɗtana halaŋ ki kogi ni ndaana, suu cuki hu mbas ndaɗta halaŋ ka dlak ndaana kogiya.

¹⁰ Kay ami hum ki ana hu li ma agi cuk ay ki hu mbassa Egiptera, Yawe soogi mbo Lum ma Cerewna ki fokogiya, u dlara agi laɗ eg muli suu Amorna suu mbana ay ŋgoo lum ma Yurdanna ii hiŋŋana gi Sihon u Og agi toosi ziisi ki halaŋ halaŋga.

¹¹ Ami hum dla ndaɗta ki na ni, ŋgusumi ka kami oloɗi. Gegelay fokogi ni saɓakam kaɗi, kay ana Yawe, Loogina, ni Lo ma kolo huulona may, kaŋga kay ndaŋgara mayna.

¹² Cemi ni agi suu tagi ki fok Yawe fokon tani kay an lagi ɗegeera egegiya. Agi may ni lan ɗegeera egen u suu mansina ko ndaɗta na may. Ҥangi va ma tak ki gasi ana agi a minin una.

¹³ A agi hinin suu mansina iiriya, bunu, sunu, gorsen suu njufiina u gorɓiina, u tlegeyesi halaŋ, a agi suɗumi ki ko maɗnana.»

¹⁴ Suu mba' asina hoŋ daɗ ana, «Ami suu tami fokok u iiri mamira gaw, dew ni lini ndak gami umi ka ki maŋ suunaɗi ni, hu li ma Yawe ɦami mbas ndaɗta wa ni ami hin lak dlara ɗegeera egeku, hin golok u jivira may.»

¹⁵ Ŋgoo dagan ndaɗ hin siirisi ay ki ga ŋgoo gulumunna u zewna. Kay ana ziiɗ minira ni kolo kay yam gulumunna. Ndaɗ siirisi ay ki ni ii zira.

¹⁶ Ndaɗ hin dasi ana, «Tinigi irigi u ɦinira na ɗow kay ana suu ay halagina ŋgafagi voɗɗi. Agi ŋgay tagi u ɦinira ta ta buuna hindi, hin suu tuɗ a halagina hoŋ ay ki vo tuwa. Ŋgoo dagan agi hin tuɗ tuɗ magira.»

Suu gol lina hoŋ hu kaŋ masina eg Josuwe

¹⁷ Suu asina hin daɗ ana, «Gola ami a buɗ tami ki ko suura ami suu tami fokokga ni.

¹⁸ Hu li ma ami tew ki vo wa ni ndak njun zew ma tlaw namma ii zira hu li ma ami sii ha ki ga huna. Ndak tok suu maksina egek hu zira, buku, suku, gorsekŋa, suu maksina halaŋ.

¹⁹ Lini sa maa dukugi kali kiɗik wa ni busuɗum hoŋŋi kamu, ka kamiɗi. Lini sa ma ka kalafi ukŋa sa ŋgen kom egem wa ni busuɗummi kami amiya.

²⁰ Na may lini ndak gami umi ki wa ni, suu mayra ami suu tami fokok wanda ka kami oloɗi may.»

²¹ Ndaɗ di ana, «Ko dla ndaɗta li ko ndal agi dira na.» Ndaɗ hin njun zew ma tlaw namma ay kolo hu ii zira may.

²² Asi cuk tasi ca ni tuɗ irisi u ɦinira na li buuna hu hindi a suu tuɗ ha halasina hoŋ ay ki vo tura. Suu tuɗ a halasina hal ɦawa ta ta keŋ voɗta ni fasi kaɗi.

²³ Suu mba' asina hoŋ ɗiŋ ay ki ga ɗiŋŋa mba calaɗ lumma hoŋ vo eg Josuwe goŋ Nunna. Asi cuɗum dla mayra asi faɗ ay hura ki halaŋ halaŋ.

²⁴ Asi di Josuwe ana, «A gasira ni Yawe ɦaygi mbas ndaɗta halaŋŋi hu duk koygiya. Suu hu mbas ndaɗtana halaŋŋi dlak ndaana koygiya.»