JOSUWE 16 - Boy Lonana

Mbassa vi gi Efrayim u Manasera

¹ Mbassa vi goryoŋ Yosefna col ha ni fun lum ma Yurdanna tok eg zi ma Yerikora ii u maɗiina na, mba ki fun mbo ma Yerikona, col ii hakara ay hu ŋgoo bagira hu mbassa Yerikona na mba ki kolo kay ɦini mayra Betella.

² Col ha hu Betel ta ta hu Luz jak ha ki ii hakara Arkitta hu Atarot.

³ Hoŋ ay ga u fiɗigina ii hakara u suu Yefletna ta ta mba ki hu Bet-Horon ta Gaara ta ta Gezer hin do ay ki fun mbo lumma ŋgol ma Mediteranena.

⁴ Gola goryoŋ Yosefna, Manase u Efrayim, fi joosina ni ko ndaɗta na.

Mbassa vi Efrayimba

⁵ Gola ni ii hakara vi goryoŋ Efrayimma u deeresiya, ii haka masira ay u maɗiinara ni Atrot-Addar ta ta tew ay ki Bet-Horon ta Kolora.

⁶ Ii u fiɗigina na ni hakara maɗ ha ki fok ta ta Mikmetat ii mbayawi, hoŋ ii u maɗiina hu Taanat-Silo na, ndaɗ jak ha ki kay u maɗiina ii Yanoha na.

⁷ Hakara hoŋ ay ga ay Yanohana hin tuɗ Atarot u Naarata mba tew ki Yeriko hin tuɗ fok ta ta fun mbo lum ma Yurdanna.

⁸ Col ha hu Tappua ii hakara tuɗ ii u fiɗigina na tew ay ki fun mbo lum ma Kana tuɗ ta ta fun mbo lum ŋgol ma Mediteranena. Gola jo ma vi goryoŋ Efrayimma, ɓorow kosi u deeresi ni na.

⁹ Ndum ɦoŋzi ŋgolo ma vi goryoŋ Efrayim ma hu duk suu vi Manasena ka dukgi, ɦoŋzi ma ŋgolo namma u ma gorina halaŋ.

¹⁰ Na may asi dik suu Kanaan suu laki hu Gezerna ka kiɗi, kay ndaɗta suu Kanaanna ka cuki duk suu vi Efrayimma ta ta cemi. Asi li sunda ko mborɓiina na.