JOSUWE 13 - Boy Lonana

Mbassa hin bay asi tlaɗ ki tura

¹ Hu li ma Josuwe mbuɗ ki maa cocona, Yawe dam ana, «Cemi ni aŋ mbuɗ ki ni maari, basaɗaŋ ki bolow cocoo, doli u mbassa daŋ hin kaa ta agi bay tlaɗ ki tura. Ni mbassa dlaɗ ŋgol cocora lay.

² Gola ca ni u mbassa hin ka bay tli ki tura, mbassa vi suu Filistinna halaŋ u mbassa vi suu Gesurna.

³ Col ha fun mbo lum ma Sihorna vok tam u mbassa Egiptera na ta ta tew hu mbassa Ekronda keŋ ma mbayawna na, li namma a ndum ki ni duk mbassa Kanaanda, muli suu Filistinna ka hu ni vadl, mul ma Gazana, mul ma Asdodna, mul ma Askalonna, mul ma Gatna u mul ma Ekronna. Suu Avna ka cuki hu lay.

⁴ Hoŋ ii ma dalina na ni mbas mayra Kanaanda halaŋ u Meara ta ka vi suu Sidonnara ta ta Afek, jak gak gak tew ay ki ii hakara u suu Amorna.

⁵ Col ha hu mbassa Geballa u mbassa Libanda ii ma u maɗiinana na, col ha Baal-Gad u ɦinira Hermonda ta ta tew ay ki Lebo-Hamat.

⁶ Suu may suu cuki kolo kay ɦinirana halaŋ, col ha hu Liban ta ta tew ha ki hu Misrefot-Main, suu hu zi nammana halaŋŋi suu Sidonna, hu li ma suu Israelna tuɗ hana ni an u tanda dikisi suu asina ha ki fokosiya. Aŋ hin ɓorow mbas ndaɗta ki maŋ suu Israelna ko ndal an daŋga na.

⁷ Cemi wanda aŋ ɓorow mbas ndaɗta ki maŋ dee suu dleeŋena u nus dee suu vi Manasena.»

Ɓorow mbassa keŋ lumma Yurdanna ii hiŋŋara kiyo

⁸ Dee suu vi Rubenna, suu vi Gadna u nus dee suu vi Manasena fi liisina ha ki keŋ lum ma Yurdanna ii u maɗiina, liisi ma Moiz, sa sunda vi Yawe, ɦasina kana.

⁹ Mbas masira ii haka maɗta col ay ni dali eg ɦoŋzi ma Aroerna fun mbo lum ma Arnonna u ɦoŋzi ma cuki hu ɦuɗugum ndaɗtana halaŋ u mbas mayra Medebara u Dibon lay.

¹⁰ Ҥoŋzi ma vi mul ma Amorna, Sihon, halaŋ, nam ti mulla ay kaki ni hu Hesbon ay ni ii hakara u suu Amonna na day.

¹¹ Mbassa Galaadta u mbassa vi suu Gesurna u Maakŋa u ɦinira Hermonda halaŋ u mbassa Basanda halaŋ ta ta tew ay ki hu Salka.

¹² Hu Basan mulla vi Ogka halaŋ nam ti mulla kay Astarot u Edrei, nammi sa ma do dagan suu vi Refana.

¹³ Na may suu Israelna dik suu Gesurna u suu Maakŋa ka kiɗi ta ta cemi ni suu asina ka duk suu Israelna.

¹⁴ Dee suu vi Levina hol ni suu fi ndaŋga kaɗi na. Tlesuu ɦasi ay maŋ Yawena ni a ɓorow masina gaw. Ko nam dasi ay ki fok jewra na may.

Mbassa Moiz ɦaɗ ka maŋ dee suu vi Rubennara

¹⁵ Moiz ɦal lina ka maŋ dee suu vi Rubenna u njafasiya.

¹⁶ Nam ɦasi ni mbassa col ha Aroer fun mbo lum ma Arnonna u ɦoŋzi ma do ay ga fun mbo lumma namma halaŋ u mbassa Madabara halaŋ may.

¹⁷ Mbassa Hesbonda u ɦoŋzi ma ka huruɗna, Dibon, Bamot Baal, Bet-Baal-Meon,

¹⁸ Yahas, Kedemot, Mefaat,

¹⁹ Kiriataim, Sibma, Seret-Sahar kolo kay mbura ka fun ɦuɗugumbara.

²⁰ Bet-Peor, lagaɗ ɦini mayra Pisgara u Bet-Yesimot.

²¹ Ҥoŋzi ma cuki hu mbas ndaɗtana halaŋ, mulla Sihonda halaŋ, mul ma vi suu Amorna ma ay kaki ti mulla hu ɦoŋzi ma Hesbonna. Moiz cam kiyo u suu ŋgolo suu Madiyanna, Ewi, Rekem, Sur, Hur u Reba. Ni muli suu ka u Sihon cuki hu li nammana.

²² Duk suu casi asina ni Balaam ma goŋ Peorna, ma joɓpa suu Israelna cam ki dukusi may.

²³ Ii hakara vi goryoŋ Rubenna ni mbo lum ma Yurdanna u li ŋguyumma, jo ma vi goryoŋ Rubenna li ni ko ndaɗta na u njafasi halaŋ u ɦoŋziisina may, zi ma gorina lay.

Mbassa Moiz ɦaɗ ka maŋ dee suu vi Gadnara

²⁴ Moiz ɦal mbassa maŋ njaf suu vi Gadna ni u deeresi may. Mbas ndaɗta ni ii mbayaw eg mbassa vi suu vi Rubenna.

²⁵ Gola ni mbas mayra Moiz ɦasirara: Yazer, ɦoŋzi ma Galaadna halaŋ, nus mbassa vi suu Amonna ta ta tew ay ki hu Aroer tok eg Rabba.

²⁶ Asi cuk hu Hesbon hu Ramat-Mispe u Betonim u Mahanaim hu mbassa Lo-Dabarra.

²⁷ Hu ɦuɗugumba fun mbo lum ma Yurdanna ni Bet-Haram, Bet-Nimra, Sukot u Safonni mbassa vi mulna Sihonda, nam ti mulla ay ka ki ni hu mbassa Hesbonda. Mbas ndaɗta halaŋ ay ni ii u maɗiina vi mbo lum ma Yurdanna, ii hakara ay ni ta ta u mbo lum ma Genesaretna ii ma mbayawna na.

²⁸ Sem ɦoŋzi ma ndum ay kolo cana halaŋ ɦammi maŋ njaf suu vi Gadna.

Mbassa Moiz ɦaɗ ka maŋ dee nus suu vi Manasenara

²⁹ Moiz ɦal lina maŋ nus dee suu vi Manasena, nam ɦasi lina ni u ndak masira u njafasi may. Mbas ndaɗta ni ii mbayaw eg mbassa vi suu vi Gadna.

³⁰ Mbas masira ɦasirara col ha hu Mahanaim, mbassa Basanda halaŋ, li ma mulna Og ti mulla kamma halaŋ, nammi mul ma Basanna u ɦoŋzi ma Yairna halaŋ halaŋ zi ma ka cuki hu mbassa Basanda, ɦoŋzi ma ŋgolona zeɗ zeɗ dok karkiya.

³¹ Yow nus mbassa Galaadta ay ki hu may u ɦoŋzi ma vi Astarot u Edrei zi ma ka hu mulla vi Ogka hu mbassa Basanda, mbas ndaɗta halaŋ ki ni maŋ Makir ma goŋ Manasena, ni ana maŋ nus goryoŋ Makirna u njafasi halaŋ.

³² Moiz ɓorowosi lina ay ŋgoo lum ma Yurdanna ii u maɗiina vi zi ma Yerikona ni ko ndaɗta na, ay hu mbassa Moabba.

³³ Na may dee suu vi Levina Moiz ɦasi li kaɗi. Yawe, Lona vi suu Israelna, hinni a joosina gaw, ko nam dasira na may.