JOSUWE 11 - Boy Lonana

Duu ŋgol ma fun mbo lum ma Meromma

¹ Hu li ma Yabin mul ma Hassorna hum dla saɓak ma vi suu Israelna na ni, nam gi vun sunda eg Yohab mul ma Madonna, maŋ mul ma Simronna, maŋ mul ma Akesafna may.

² Nam sun eg muli suu mbayawna suu kolo kay ɦinirana may, hu ɦuɗugumma vi Yurdanda lay, ii ma dalina keŋ Genesaret na, sun hu mbassa Dorra ii u fiɗigina may.

³ Nam sun kay suu Kanaanna suu u maɗiinana u suu may suu u fiɗigina na may, suu Amorna, suu Hetna, suu Perizna u suu Jebusna kay ɦinira, suu Hivna ga u ɦinira Hermonda, hu mbassa Mispara may.

⁴ Asi cuk ay ki u suu masi suu duuna usi halaŋ halaŋ. Suu warna zuli coco suu ŋgetl ma doŋ lummana, u kulumina cocoo, pupus ma kulumina coco ɦay lay.

⁵ Muli asina halaŋ vi vunusi ŋgaɓ lina duk tasiya tok tasi ay halaŋ mba buu fun mbo lum ma Meromma a gijaŋ duuna u suu Israelna.

⁶ Yawe di Josuwe ana, «Li ndaaɗi, kay vini faɗta ko wanda na ni asi halaŋ ki ni ciya, an hin casi ki fok suu Israelna. Aŋ hin kaasi diŋ diliŋ kulumi masisina kiyo, hin ŋgalasi pupus masi ma kulumina ki lay.»

⁷ Josuwe u suu mam suu duuna yow kolo i ndugusi ni asi wi kaɗi, mba ndugusi fun mbo lum ma Meromma, mboɗ duuna u asiya.

⁸ Yawe hinisi ki hu duk ko suu Israelna asi casiya. Dikisi ta ta tuɗusi ha ki hu Sidon ta ŋgolla ta ta Misrefot-Maim jakasi ta ta hu ɦuɗugumba Mispera, ii u maɗiina. Asi casi ki halaŋ halaŋ hin sa ka a suɗ ki na dewɗi.

⁹ Josuwe lasi egesi ni dlara Yawe dambara may. Nam kaasi diŋ diliŋ kulumi masisina kiyo, ŋgalasi pupus masi ma kulumina ki may.

Tli zi ma Hasorna kiyo

¹⁰ Josuwe a hoŋ ay vora ni mba ndug zi ma Hasorna ni na gaw, casi mul masina kiyo, Hasor ay jew ni a zi ma ŋgolna vi mulla ii nammara halaŋ.

¹¹ Asi ci suu hu ɦoŋzi nammana ki halaŋ halaŋ, tlesuu musukka halaŋ asi hin maa ka iiriɗi. Asi ŋgal ɦoŋzi ma Hasorna ki lay.

¹² Josuwe ti ɦoŋzi namma ki halaŋ halaŋ u muli masisina lay. Nam casi ki halaŋ halaŋ ko ndal Moiz, sa sunda vi Yawe, damba na.

¹³ Na may ɦoŋzi ma mini kolo kay ɦinirana suu Israelna ŋgal maa ka kiɗi. Josuwe ŋgal ki ni ɦoŋzi ma Hasorna doy hol.

¹⁴ Tlesuu vo hu zinana halaŋ u yoorina lay, suu Israelna yowosi ni kay tasiya, may suu warna asi casi ki halaŋ halaŋ, hin sa kaɗi.

¹⁵ Ni ko ndal Yawe di ka maŋ Moiz, nam Moiz hin jok boy namma ka maŋ Josuwe wanda na may. Josuwe hin li ni ko ndaɗta na may, nam ka hin dla mayra Yawe daɗ ka maŋ Moizza kiɗi.

Mbassa Josuwe taɗ kira

¹⁶ Josuwe ti mbassa ki halaŋŋi ko wandara na, mbassa ɦinira hu cocora, mbas mayra kolo hu lii mbuyna ii mbayaw may ii dali may halaŋ. Mbassa Gosenda u ŋgoo bagira ii dalira halaŋ u ful mayra fun lum ma yam ana Yurdanna lay.

¹⁷ Col ha kay ɦinira Halakka day tuɗ ta ta hu mbassa Seirra jak ki Baal-Gad hu ɦuɗugumba Libanda ga u ɦinira Hermonda. Nam casi muli masisina ki halaŋ halaŋ, hin maa kaɗi.

¹⁸ Josuwe duu u muli asina buuna bolow cocoo.

¹⁹ Ҥoŋzi maa na dew lay ma vi bana u nam kaɗi, ni suu Hivna suu cuki hu mbassa Gabaonda vi banara u suu Israelna ni asi doy hol. Ҥoŋzi ma daŋŋa halaŋ asi ɓaɗammi u duuna.

²⁰ Yawe soosi hurusi ki hinisi ka a taɓ dukusi banara u suu Israelnaɗi. Asi li duuna u suu Israel ni kay a suu Israelna daɓasi kira, ka asi vi banara u asiɗira. Asi casi ki ni ko ndal Yawe di ka maŋ Moizza na may.

²¹ Hu coki ndaɗta ni Josuwe tuɗ ci suu Anakŋa kiyo. Suu cuki kay ɦinira Hebronda, hu Debir, hu Anab, u suu cuki hu mbassa ɦinira cocora vi Yuda u Israella nam casi ki halaŋ halaŋ, ŋgalasi ziisi ki lay.

²² Hu mbassa vi suu Israelna suu Anakŋa sa hin ka hu oloɗi, usira hin ha ndera ni hu mbassa Gaza, Gat u Asdod hol.

²³ Josuwe tli mbassa ki halaŋ ko dlara Yawe daɗ ka ki maŋ Moizza na may. Nam ɦaɗ ki maŋ suu Israelna a joosina, ɓorowosira ki u deeresi halaŋ halaŋ. Mbassa ndaɗta fi koɗ tara ni na gaw, duu ka hu oloɗi.