JOSUWE 10 - Boy Lonana

Mulina vadl taɓ u tasi a duu u suu Gabaonna

¹ Hu li ma Adoni Sadek mul ma Yerusalemma hum ana Josuwe tli zi ma Aina kiyo, ci mul ma huna ki lay, ko nam li ay u zi ma Yerikona u mul masinara na may. Nam hin hum olo ana suu Gabaonna vi galamba u suu Israelna ka laki dukusiya.

² Boy namma mbuɗ suu cuki hu Yerusalemma ki ndaa cocoo kay ana Gabaonni ɦoŋzi ma ŋgol cocona, ko tam u ɦoŋzi ma mul ŋgolna kagi huna dew. Nammi ŋgol suu ɦoŋzi ma Aina. Suu hurumma saɓak coco lay.

³ Adoni Sadek mul ma Yerusalemma gi sunda maŋ Hoham mul ma Hebronna, maŋ Piream mul ma Yarmutna, maŋ Yafia mul ma Lakisna, maŋ Devir mul ma Eglonna may dasi ana,

⁴ «Mbaagi ay egenu, mbay njunungiya, mbay duuruygi zi ma Gabaonna kay asi vi banara u Josuwe u suu Israelna mayra.»

⁵ Muli suu vadl suu Amorna halaŋ taɓ ki u tasiya. Mul ma Yerusalemma, mul ma Hebronna, mul ma Yarmutna, mul ma Lakisna u mul ma Eglonna yow u suu masi suu duuna halaŋ halaŋ ndug zi ma Gabaonna a duu u asira.

⁶ Suu Gabaonna gi sunda ay eg Josuwe hu Gilgal dam ana, «Hin bay a njun kay suu sun maŋsinaɗi, mbay egemi na zak suɗumi kiyo, kay muli suu Amorna suu cuki kolo kay ɦinirana halaŋ taɓ ay u tasi a duurumira.»

⁷ Josuwe col ha hu Gilgal day u suu mam suu duuna u suu may suu wi yal duuna cocona halaŋ halaŋ.

⁸ Yawe di Josuwe ana, «Li ndaaɗi, an hiniŋsina ki ni koŋu. Dukusi halaŋŋi sa ma col fokoŋ dew kaɗi.»

⁹ Josuwe col ay njeŋge gak gak ay hu Gilgal day mba kafasi kasi ni na gaw.

¹⁰ Yawe viɗ suu Amorna ki na dawla, ka wi li ma asi tuɗ hunaɗi lay. Suu Israelna casi cocoo u suu hin ndena asi dikisi usi gak gak tuɗusi kolo kay ɦinira Bet Horonda, casi ta ta tinisi ha ki Azeka ta ta Makeda lay.

¹¹ Hu li ma suu Amorna ka liŋ fok suu Israelna nana, asi a ɗiŋ ha ki ga kay ɦinira Bet Horonda may ni, Yawe sasi dlaŋmagi ma ŋgolona ay kasi, casi cocoo. Suu may suu dlaŋmagina casina bolow su suu may suu suu Israelna casina.

¹² Hu buu namma ni Yawe ɦal saɓakŋa maŋ suu Israelna asi suu kay suu Amorna. Hu li namma ni Josuwe col ki kolo fok suu Israelna halaŋ ɓak tam u Yawe ana, «Ndak faɗta col kolo kay zi ma Gabaonna na zol, aŋ tilna col kay ɦuɗugumba Ayalonda na zol may.»

¹³ Faɗta hin coli na gaw may, tilna ka jok umbi kay suu Israelna oloɗi may, ta ta asi daɓ suu babali masisina ki cira tuwa. Boy namma hin ka ɓiiri hu Magaara vi sa ma Ɗegeena ana, Faɗta hin colira kolo huulona duk gayra na zow, ndaɗ ka dik u taɗ a ɗikkaɗi lay ta ta hu faali ndaɗta halaŋ.

¹⁴ Ay fok jew dayra lay, tuɗ ha fokka lay ni, faali ta fiyek ko ndaɗta na ka li oloɗi Yawe ka hum u sa warna ko wanda naɗi, kay Yawe duu kay suu Israelna.

¹⁵ Josuwe u suu Israelna halaŋ hoŋ ha hu kaŋ masina hu Gilgal.

Josuwe ci muli suu vadlna kiyo

¹⁶ Muli suu vadlna yow piira, tuɗ ŋgay tasi ki hu zul ɦinira Makeda.

¹⁷ Asi mba di Josuwe ana, «Muli suu vadlna asi fasi ha ŋgay hu zul ɦinira Makeda.»

¹⁸ Josuwe dasi ana, «Laagaɗagi ɦinira ŋgolora fun zulla, cukugi suuna fun a juɓuɗ uɗta may.

¹⁹ Agi suu hinna cuɗugi u suu hiŋŋa ka hinigi suu babali magisina a cuk hu ɦoŋziisinaɗi, kay Yawe, Loogina, ɦagisina ki ni hu duk kogiya.»

²⁰ Josuwe u suu Israelna daɓ gin suu Amorna ki cira, suu pii ki suɗna ni na ew daŋ, asina tuɗ cuki vo hu ziisi ma ŋgayra may.

²¹ Suu Israelna halaŋ hoŋ ay eg Josuwe hu Makeda ni u heɓpa sa ma a da vun na fe ni kaɗi.

²² Josuwe hin di ana, «Malagi fun zul ɦinira kiyo, cukungi muli suu vadl wanna ay ki bunsuwa.»

²³ Asi li ko ndaɗta na may, ay hu zul ɦinira asi cuk muli suu vadl asina ay ki eg Josuwe. Mul ma Yerusalemma, mul ma Hebronna, mul ma Yarmutna, mul ma Lakisna, mul ma Eglonna.

²⁴ Hu li ma asi cuk muli suu vadl asina ay ki eg Josuwe cani, nam yi suu Israelna ay ga na halaŋ, hin di suu ŋgolo suu fok suu duu may suu Israelna ana, «Mbaagi aya, mbay tinigi segi del muli suu vadl asina.» Asi ɦuɗ tasi ay mba tin sesi del muli suu vadl asina may.

²⁵ Josuwe dasi ana, «Lagi ndaaɗi, ɓikigi vun dikigiɗi lay, soogi ugi kiyo, lagi saɓaki kay suu babali magisina suu agi hin duu u asina halaŋ Yawe hin lasi ni na.»

²⁶ Ŋgoo dagan Josuwe hin ci muli suu vadl asina kiyo, ɓalasi ki kolo eg ŋgusugina vadl may, hinisi ɓali kolo eg ŋgusugina ta ta fiɗigiya.

²⁷ Hu li ma faɗta a kal gana, Josuwe ɦal voɗta ana paɗasi ay ki ga hum ŋgusuna, cukusi ha ki hu zul ɦini masira asi ŋgay tasi ay huruɗta. Asi lagaɗ ɦinira ŋgolla fun zulla, ɦini ndaɗta ka ta ta cemi.

Josuwe tli ɦoŋzi ma dalina kiyo

²⁸ Hu buu namma ni Josuwe tli ɦoŋzi ma Makedana kiyo, ci suu huna ki halaŋ halaŋ u mul masina lay. Nam ŋgal zi namma kiyo, suu huna u tlegeyesi bel bel, hin sa ka iiri na dewɗi. Nam li mul ma Makedana ni ko ndal nam li mul ma Yerikona ay jewra na may.

²⁹ Ŋgoo dagan Josuwe u suu Israelna halaŋ jak ha hu Makeda tuɗ hu Libna, asi tuɗ duu u suu hu Libnana.

³⁰ Yawe hin suu Libnana ki hu duk ko suu Israelna u mul masina halaŋ, suu Israelna casi ki halaŋ halaŋ, hin sa ka iiriɗi. Josuwe lasi mul masina ni ko nam li mul ma Yerikona na may.

³¹ Ŋgoo dagan Josuwe u suu Israelna jak hu Libna tuɗ hu Lakis. Asi ŋgufusi li duuna u asiya.

³² Yawe ɦal mbassa Lakissa ki hu duk ko suu Israelna. Asi nduguɗ ni hu buu ma mbana, ci suu hu mbas ndaɗtana ki na halaŋ halaŋ ko ndal asi li ay u suu Libnana na may.

³³ Horam mul ma Gezerna yow ay u suu mam suu duuna a njun kay suu Lakisna. Na may Josuwe cam ki u suu duu mamsina halaŋ halaŋ. Sa hin ka iiri na dewɗi.

³⁴ Josuwe u suu Israelna hin Lakis ka tani jak Eglon. Asi tuɗ ndug zi namma duu u asiya.

³⁵ Asi ndugusi hu buu namma na ni casi ki halaŋ. Suu hu ɦoŋzi nammana halaŋŋi asi casi kiyo, ni ko ndal asi li suu hu mbassa Lakissa ayra na may.

³⁶ Ŋgoo dagan Josuwe u suu Israelna hin Eglon ka tani jak Hebron. Asi tuɗ ndug zi namma duu u asiya.

³⁷ Asi ndugusi hu buu namma na ni, casi ki halaŋ halaŋ u mul masina lay. Ҥoŋziisina u suu huna halaŋ asi casi ki bel bel, hin sa ka iiriɗi. Ni ko ndal asi li ay u ɦoŋzi ma Eglonna na may.

³⁸ Josuwe u suu Israelna hoŋ irisi hu ɦoŋzi ma Debirna duu u asiya.

³⁹ Asi ci suu huna ki u mul masina halaŋ. Suu hu ɦoŋzi nammana asi casi ki halaŋ halaŋ, hin sa ka iiri dewɗi. Josuwe tli zi ma Debirna u mul masina ni ko ndal nam li zi ma Hebron u ma Libnana u mul masinara na may u ɦoŋzi ma ŋguy kasina halaŋ may.

⁴⁰ Josuwe ti mbassa dali ndaɗta ki bel bel. Muli suu kolo kay ɦinirana u mbassa ga hu ɦuɗugumbara halaŋ nam taɗ kiyo. Suu huna nam casi ki halaŋ halaŋ. Tlesuu iiri suu musukka nam casi ki bel bel. Ko ndal Yawe, Lona vi suu Israelna, damba na may.

⁴¹ Josuwe li duuna col ha Kades Barnea ta ta Gaza, col ha hu mbassa Gosenda ta ta Gabaon may.

⁴² Josuwe suu kay muli masisina u mbas masira halaŋ halaŋ, ni hu koyra dewra ɦawaa. Kay ana Yawe, Lona vi suu Israelna, ka duu kasiya.

⁴³ Ŋgoo dagan Josuwe u suu Israelna halaŋ hoŋ vo hu kaŋ masina Gilgal.