JOSUWE 1 - Boy Lonana

Josuwe varak fok suu Israelna balam Moiz

¹ Ŋgoo dagan hu li ma Moiz, sa sun Yawena, miɗ kina, Yawe di Josuwe ma goŋ Nunna, sa sun Moizna ana,

² «Saan ma sunda Moiz miɗ ki wa. Cemi ni aŋ hin calaɗ mbo lum ma Yurdanna u suuna a tuɗ hu mbassa an vi vunun kaɗ a ɦaɗ maŋ suu Israelnara.

³ Ko ndal an di ay ki maŋ Moizza na, ndaŋgara agi tuɗ huruɗ wandara lay an ɦagira ni magiya.

⁴ An hin ɦagi mbassa col ay ŋgoo bagi ii dali na day tuɗ ta ta ɦinira Libanda. Col ay fun mbo lum ŋgol ma Efratna, mbassa vi suu Hetna halaŋ, ta ta fun mbo lum ŋgolna ii u fiɗigina halaŋ hin li ni a mbas magira.

⁵ Hu li ma aŋ ka iiri tu wanna sa ma hin col ay fokoŋ na ɗow ni kaɗi. An hin li u aŋŋi ko ndal an ay u Moizza na may. An ka laŋ dlara coɗi, an ka noyoŋ kiɗi.

⁶ Aŋ col saɓaki, so huruŋu kay aŋŋi sa ma hin ɓorow jona ki maŋ suu Israelna, mbassa an vi vunun ay kaɗ u somoyosi ana an hin ɦasirara.

⁷ Na daŋ may col saɓaki, so huruŋ eŋ cocoo. Aŋ mba gol taŋ jivi a li u gaɗta halaŋ ta saan ma sunda, Moiz, ɓiiriŋga kara. Viɗ taŋ ki a tuɗ bik njufɗi lay, guluɗi lay kay a li ma aŋ hin tuɗ huna halaŋŋi dla ka suu kaŋgi.

⁸ Ka magaara gaɗta tuɗ ki funuŋ dayɗi. Aŋ hin hosokoɗ ni faali lay, njeŋge lay. Ni kay a li u tlesuu ɓiiri huruɗna halaŋ. Aŋ li wa na ni aŋ hin fi tlena hu iiri maŋga coco lay, dlara aŋ laɗta halaŋ aŋ ka puk hu taaɗi lay.

⁹ An daŋ ana col eŋŋe, so huruŋu, ni ka an daŋ mayɗi su? Dlak ndaaɗi, ɓik vun dikiŋgi lay. Kay Yawe, Looŋŋa, ka u aŋ hu li ma aŋ hin a tuɗ huna halaŋ.»

Josuwe min tam a calaɗ mbo lum ma Yurdanna

¹⁰ Josuwe di suu ŋgolo suu fok suunana ana,

¹¹ «Tuɗugi duk suu Israelna dasi ha ki ana, asi li tlesuu tira kasiya, hin buuna na hindi ni asi hin calaɗ mbo lum ma Yurdanna a tuɗ hu mbas mayra Yawe, Loogina, ɦagira a agi cuk hura.»

¹² Josuwe hin ɓak dee suu vi Rubenna, suu vi Gadna u nus suu vi Manasena ana,

¹³ «Humugi gagi kay dla mayra Moiz, sa sun Yawena, dagira ay ki fok jewra. Yawe, Loogina, ɦagi koɗ tara wa, nam ɦagi mbassa ii wannara.

¹⁴ Boyogogiya, goryogi suu gorina u yoori magisina hin hin tani keŋ lumma ii u maɗiina hu mbas mayra Moiz ɦagira ŋgoo lumma Yurdanna wandara. Na may agi suu ki ndaki suu wi dla duuna hin tuɗugi fok gorsegina, agi hin nda njunusi a duuna may.

¹⁵ Ta ta hu li ma Yawe hin koɗ ta gorsegina ko nam koɗogi tagi wandara na may. A asi fi mbas masira Yawe, Loogina, hin ɦasirara ki kosi ko agi na may. Ŋgoo dagan agi hin hoŋ ay hu mbas magira tuwa. Agi hin cuk hu mbassa Moiz, sa ma sun Yawena, ɦagira ŋgoo mbo lum ma Yurdanna ii u maɗiina nara may.»

¹⁶ Asi hoŋ dira maŋ Josuwe ana, «Dlara aŋ damira halaŋ wandara ami hin laɗu, li ma aŋ hin a sunumi huna lini aragelay ni ami hin tuɗa.

¹⁷ Ami vi vun Moiz ay kay dlara nam damirara halaŋ. Ami min a hum uŋŋi ko ndaɗta na may. Na daŋ may Yawe, Looŋŋa, hin li u aŋŋi ko ndal nam li ay u Moizza na may.

¹⁸ Sa may ma ka min a hum u boy ma aŋ dammaɗi, ka min humuŋ gaɗ maŋga aŋ damiraɗina hin cam ki ni ciya. Na daŋ may col eŋŋe, so uŋ kiyo.»