JONAS 4 - Boy Lonana

Jonas hurum ɓeŋa, Yawe vam u dlara ki may

¹ Boy namma ka ii Jonas jiviɗi, hurum ɓeŋ ki cocoo.

² Nam cen Yawe di ana, «Ҥii, Yawe ni boy ma an dam hu li ma an ay hu mbas mandanaɗi su? Kay ndaɗta an mbuɗ a pii ki a tuɗ hu Tarsis ni naɗi su? An wi ki jivi ana, aŋŋi Lo ma jivina ma wi hahaw suuna, huruŋ ka mbuɗ ya zakgi, huruŋ oy u dlara jivira, aŋ ndak hoŋ ay kay dlaaŋga aŋ daɗ a li cora eg sanara.

³ Cemi ni, Yawe, an ceneŋu, tlan iiri manda, kay a miɗ kira ni irin jivi sura an kak iirira.»

⁴ Yawe dam ana, «Aŋ ɓeŋ huruŋ ki na ni gasi su?»

⁵ Jonas kal ki tuɗ kak ha ki doŋ kaana ii u maɗiina na. Hu li namma nam pi gina kamu, kak ha ki um a gol dlara hin li hu zinara.

⁶ Hu li namma Yawe day gugutlura eg gina ndaɗ la kolo kay Jonas, li ŋgusna kam jivi cocoo ni kay a heɓem hurumba ŋgus namma furi hu Jonas cocoo.

⁷ Vin maɗiira ni Lona cuk njufulna eɗ sari gugutlura ndaɗ so kiyo.

⁸ Hu li ma faɗta day ay ki kolona, Lona sun semeɗ ma kuna col ay u maɗiina, faɗta gijaŋ waa yam Jonas cocoo. Jonas joɓ ana miɗna irimmi mariyaɗ. Nam ana mariyaɗ ni miɗna sura nam a kak iirira.

⁹ Lona hin dam ana, «Huruŋ ɓeŋ kay gugutlu ndaɗta na ni gasi su?» Jonas hoŋom dira ana, «Gasi, an ndak a hurun ɓeŋ ta ta miɗna.»

¹⁰ Yawe dam ana, «Aŋ wi hahaw gugutlu mayra aŋ loɓ ka kaɗɗira, wuluɗ ka aŋgi lay, ndaɗ day ni hu njeŋgera dewra, so ki ni hu njeŋgera dewra lay.

¹¹ An may ni ka wi hahaw ɦoŋzi ma ŋgol ma Ninivena manɗi su? Suuna ka hurummi suu buɓ buɓ kis duk dok mba' (120,000) suu ka wi a ɓorow ii jivira ki u coraɗina, yoorina ka hu coco lay.»