JONAS 3 - Boy Lonana

Jonas di boy Lonana hu Ninive

¹ Yawe hoŋ di Jonas a yamba mbara olo ana,

² «Col kolo, tuɗ hu Ninive, ɦoŋzi ma ŋgolna, tuɗ dasi boy ma an hin daŋŋana.»

³ Jonas col kolo hin tuɗ may ɗaŋ ko Yawe damba na. Doli Ninive mbuɗ ni ɦoŋzi ma ŋgol cocoo. A calaɗ ɦoŋzina ki halaŋga ni li buuna hindi u tuɗta.

⁴ Jonas kal hu ɦoŋzina buuna dew gawni nam ka di suuna ana, «Hin buuna dok fiɗi ni ɦoŋzi ma Ninivena hin ɓalak kiyo.»

⁵ Suu hu Ninivena tin hurusi kay Lona. Asi sawalla hu zina halaŋ a suuna li laara, cuk baraw bolna tasi may. Col ha kay suu ŋgolona ta ta kemba.

⁶ Boy namma tew mul ma Ninivena. Nam fok baraw mam ma mulla kiyo, cuk tammi baraw bolna, kak ki kaŋga duk buɗna.

⁷ Nam ɦal gaɗta ha ki maŋ muli suu hu mbas mambana halaŋ ana, «Suu warna u yoorina halaŋ ti vaɗi, mbutlina u timigiina, sa taarasiɗi, ɦasi mboɗi lay.

⁸ Suuna u yoorina halaŋ cuk baraw bolna tasiya, asi mba cen Lona u saɓakasi halaŋ. Gegelay mba hom kay dla coomba nam laɗta. Hin fuli masi suu cona ki halaŋ, hin sun masira cora ki lay.

⁹ Sa ndak wiɗi lini Lona hurum heɓa, hin mbuɗ hurum a hiniygi kalage, hu li namma aygi ka ndak a ba kiɗi.»

¹⁰ Lona wi ana asi hom gasi kay dla coosira asi laɗta wani, nam col ka kay saa mamba jew nam a baasi kira oloɗi, nam hinisiya.