JONAS 2 - Boy Lonana

Jonas ga hu galina ni cen Yawe nam suɗum kiyo

¹ Yawe sun kuluf mayra ŋgolla ay mba lik Jonas. Jonas li buuna hu kuluffa hindi.

² Ay kurufu huu kuluffa ni nam cen Yawe Loomma.

³ Nam di ana, Hu hahaw mayra fanda ni an joɓ mi Yawe. Nam hoŋon dira may. Ay hu lina vi suu miɗina an joɓoŋ aŋ njununu. Aŋ humun delenu.

⁴ Aŋ gan hu li ndufunna ga duk mbo ŋgolna. Mbo ma ɓaɗna ŋguyun ki duku, kuluɓ ki kan halaŋ.

⁵ An saa ana aŋ dikin ki wa, ki egeŋ day. Na may ni irin ka cuki tew tew kay ziiŋga teteɗta.

⁶ Mbona mbaan ki kolo delenu, may ni bil mbona ŋguyun ki duku, dayra cil ki kanu.

⁷ An kali ga ta ta u zul ɦinira, kawi ma ga duk ndaŋgarana duk vunum ki kanu. Na may ay ga hu zulla aŋ paɗan ay ki kolo iiriya. Ҥii, Yawe, Loonna.

⁸ Musukun hinni tok a kal kira, humun ganu, an di ana, Yawe, cen manda tew ay ta ta egeŋu, tew ta ta hu ziiŋga teteɗta.

⁹ Suu goɓ loogi suu hawana, ɦuɗusi ha ki egeŋ day.

¹⁰ An may ni gi soolla gi deɓpa, an min laŋ ɓivunna ni maŋu. An min li dlara an suu tan ki kaɗta. Suɗta col ay ni ko Yawe.

¹¹ Yawe hin di kuluffa, na gawni kuluffa vin Jonas ay ki kolo doŋ lumma.