JONAS 1 - Boy Lonana

Jonas min ŋgay ki ko Yawe

¹ Hu buu maa dew Yawe di Jonas, goŋ Amitayna, ana,

² «Col koloo tuɗ hu ɦoŋzi ma ŋgolna, Ninive, dasi boyna kay coosira. Kay ana dla cora hu ɦoŋzi nammara tew ha ki ta ta egenu.»

³ Jonas col kolo colni pii tin irim ki hu ɦoŋzi ma Tarsisna a ŋgay tam ki day eg Yawe. Nam tuɗ ga hu Yoppe, tuɗ fi lum kawi ma asi minim a tuɗ Tarsisna huwa. Nam warak suu lum kawina, ful usi a tuɗ ki hu Tarsissa may. Ki day eg Yawera.

⁴ May Yawe gi babaa ma ŋgolna kay mbona. Mbona mbuɗ ɓaɗ cocoo, lum kawina ka tuɗ oloɗi, hal a kus kiyo.

⁵ Suu li sunda hu lum kawina mbuɗ li ndaa cocoo. Di suu hu lum kawinana ana, gegelay ni joɓ loomma. Kay a mbuɗ lum kawina feɗta ni asi gijaŋ cuk tlesuu huna ki duk mbona. Jonas ɦuɗ tam ha ki dagan njaw lum kawina na day, lagaɗ senna na kalaŋtaŋ.

⁶ Sa ŋgol ma li sunda hu lum kawina ɦuɗ tam ha egem bayam ana, «Hay! Ni mege? Aŋ buu ni senna su? Col ki koloo, cen looŋŋa kala nam li a saa ay kaygi nde kalage. Ka aygi ba kiɗi.»

⁷ Suu hu lum kawinana njaɗ duk tasi ana, «Mbaygi ay paɗaygi dewna, kay a wi sa ma mbaaraygi dla cora kaygi wanna kiyo.» Asi paɗ dewna, nam vini Jonas.

⁸ Asi joɓom ana, «Dami ay gige, aŋ min tuɗ ni arage? Aŋ col ay ni arage? Aŋ ay ni hu mbas tarage? Aŋŋi hu njaf marage?»

⁹ Nam hoŋosi dira ana, «Anni sa ma Hebrena, an goɓmi Yawe, Lo ma Kolona, nammi sa ma li mbo lum ma ŋgolona u ndaŋgara halaŋ.»

¹⁰ Asi paɗ ki ndaana cocoo, dam ana, «Aŋ a li na ni dla mege?» U boy ma nam dasinana, asi wi ana nam pii kini a tin yam ki day eg Yawe.

¹¹ Asi joɓom ana, «A mbo lumma tin ga baami kiɗira ni ami laŋŋi ana mege? Kay cecemmi babaana col kolo ni coli na ɗow ɗow.»

¹² Nam dasi ana, «Tlangiya gangi ki duk mbona, ni babaana hin seŋ tamu. An wi ki ana babaana lagi cocora ni kay boy manna.»

¹³ Suuna hin gin tok a tew ki doŋga, may ni babaana ka hinisiɗi.

¹⁴ Asi gijaŋ yi Yawe, sawalla kolo ana, «Ҥii, Yawe, ami ka min gin a taɓ vunumi a ba sa namma kiɗi. Aŋ ŋgaami busu sa namma kamiɗi, dla ndaɗta ndolomi kaɗi. Kay aŋ, Yawe, li ni dlara huruŋ miniɗta.»

¹⁵ Asi tli Jonas, gam ki duk mbo lumma. Na gawni babaana seŋ tammi na en gaw.

¹⁶ Suu hu lum kawinana mbuɗ ki ndaa cocoo ko Yawe. Asi gijaŋ lam ɓivunna, yi tlena ki kasi lay.