JOEL 4 - Boy Lonana

Ɓak ma vi Lonana kay suu ɦawana

¹ Gasi daŋ may hu li ma an hin hoŋ Yuda u Yerusalem kolo balamasina ni,

² an hin tok suuna eg tasi halaŋ, an hin tuɗusi kaŋga hu ɦuɗugum mayra yaɗ ana, «Yawe kaɓakŋara.» Hu li namma an hin kaɓakŋa kasiya kay Israel suu mansina u liinna, kay ana asi njayasi ki duk suuna, kay ana asi ɓorowon mbas manda kiyo.

³ Asi can suu mansina ki ɓeelera asi mbuɗun gor njufii mansina ki u gorɓii suu gawlaŋina, asi gusun gorɓii mansina ki kay summa hin camu.

⁴ Agi gi Tir u Sidon u ɦoŋzi ma Filistinna halaŋ, agi minigi ni mege? Agi hin saagi sugulugi ni u an su? Lini agi ka u saara cora egenu ni an hin hoŋogi sa sugul magina kagi hoŋo na zak gaw may.

⁵ Agi suu yowongi gursu manna u lor mandana, cukungi mbumbu manda begera jivi cocora ki hu ziigirana,

⁶ Agi suu gus suu hu mbassa Yuda u Yerusalem ki ko suu hu Yavanna a tuɗusi ha ki eg mbas masira na dayna.

⁷ Anni sa hin dliɗisi ay ki kolo hu li ma agi gususi ha ki huna an hin hoŋogi coogira ni kagiya.

⁸ An hin gusugi goryogi u gorɓii magisina ki ko suu hu mbassa Yudara, asi hin gususi ki ko suu Sabeenna suu ha ki hu mbassa dayra. Yawe di na ni namu.

Duu ma daganna u kaɓakŋa

⁹ Jokogi boy namma ha ki maŋ suuna, minigi tagi jivi a duuna, yowogi suu ɦiŋga, asi ɦuɗ tasi haa, tuɗ ha foko, suu duuna halaŋ.

¹⁰ U sin kawagi magisina dlagi ŋgewegina u maragami magisina dlagi yagara. Ko sa maŋiina di ana anni sa saɓakŋa.

¹¹ Mbaagi ay njun usiya, agi suu keŋesina halaŋ, tokoygi taygi tani. Yawe cuk suu maŋ suu saɓakŋa ay kaŋgaa.

¹² Ko suuna halaŋ yo wa, tuɗ ha hu ɦuɗugum mayra yaɗ ana Bu Suuna kaɓakŋara. An hin kakŋi hu li namma a kaɓakŋa kay suu keŋa halaŋ.

¹³ Yowogi maragamba kogiya, wana ne wa, mbagi ay toogina, ciwra ki oya, doyogina ka sulul ki kaŋgaa. Gasi, coosira ŋgolo.

¹⁴ Suuna bolowo, suuna bolow cocoo, hu ɦuɗugumba kaɓakŋa. Buu ma vi Yawena hin tok, hu li ma kaɓakŋa.

¹⁵ Faɗta u tilna mbuɗ ki ndufunda, ciciwra ka ɓoo lina oloɗi.

¹⁶ Yawe ka ŋgoɓ ay hu Siyon, hu Yerusalem, nam ka di delem aya, huulona u ndaŋgara dlaka, may Yawe ni ŋgus ma kay suu mamsinana, ni li ma ŋgayra vi suu Israelna.

¹⁷ Na ɗaŋi agi hin wi ana anni Yawe, Loogina, ma kaki hu Siyon, ɦini manda teteɗta. Yerusalem hin mbuɗ ki ni li ma teteɗna, suu hu mbassa daŋgana hin ka kal huɗi a fafaɗta.

Jivira wilira kay suu vi Lonana

¹⁸ Buu namma ni sum ma wilina hin sel ay ki duk gogoyra, mbiira hin cuɗ ay ki kaŋga kay gogoyra. Hu gorgoloŋi suu Yudana halaŋ yona hin ɓaɗ huwa, mbona hin ɓaɗ ay ki hu zira vi Yawera, hin yorok yona hu ɦuɗugumba Akasiyara.

¹⁹ Egipte hin mbuɗ ki ni ndaŋga mayra ki bulumira, Edommi fulla ki bulumira, ni kay dla cora asi laɗ eg goryoŋ Yudanara. Asi vo busu ma ɓeŋ va kaɗina kaŋga hu mbas masira.

²⁰ Na may, suuna hin kak hu Yuda a fafaɗta, kak hu Yerusalem basara u basara.

²¹ An ɓak kay busu suu li va co kaɗina, gasi an ɓak kamu. Ni Yawe, ma ka hu Siyonna.