JOEL 2 - Boy Lonana

Buu ma vi Yawena hin tok

¹ Buugi tokolomma maŋ Siyon, yagi kolo u delegi eŋga kay ɦini manda teteɗta. Ko suu hu mbassana halaŋ mbuɗ ndaana. Buu ma vi Yawena mba wa, nam hin tok.

² Ni buu ma ndufunda hin kuluɓ kay suuna, ni buu ma ɗugulla hin tin ay warra na ilik ilikŋa. Ko ndal ŋgarpira na tuɗ cuk kolo kay ɦinira, suuna bolowo, saɓak coco lay, ko ndal suu asina day day ni sa wasi ka dewɗira na, ko ndal ana ŋgorosi dagan wanni suu daŋ hin ka li oloɗira na, ta ta tew ha ki hu bassara vi njaf suu ay day dayna lay.

³ Kura ŋgal fokom may, ŋgorom dagan sin kura ŋgal may. Ndaŋgara fokommi ko ndal sene ma Edenna na ŋgorom dagan fulla ki ɓeŋira. Va dew lay ka suɗ kombi.

⁴ Nammi ko ndal kulumina na ko ndal kulumi suu duuna jaŋga na.

⁵ Ni ko ndal pupus ma kulumina li vunna a ɗiŋ kolo kay ɦinirara na, ko ndal tlena mbassa mun duk ku zinara na, ko ndal suu saɓakŋa ɦayna colosi a duunara na.

⁶ Suuna torɗi tasi ko tiitara fokomu, suuna mbuɗ ki hahawra.

⁷ Ko ndal suu ɦiŋŋa na asi liŋa, ko ndal suu duuna na asi ɗiŋ kolo kay gulumunna, gegelay hu voɗ mamba, asi ka es ki hu voɗ masiraɗi.

⁸ Sa ka zuɗ ndarambi, gegelay tuɗ ni duk na ɗegee. Hu li ma a vasi yasina lay ni, asi tuɗ irisi ni foko. Asi ka ɓorow irisi kiɗi.

⁹ Asi jak ɦoŋzina, liŋ kay li ma mbuyna, diŋ kay ziginina, kal ii zira ko ndal suu kulnana.

¹⁰ Ndaŋgara dlak fokosiya, huulona dlak lay, faɗta u tilna mbuɗ ki ndufunda, ciciwra ka ɓo lina oloɗi.

¹¹ Hu li ma Yawe ka tak voɗta maŋ suu mam suu duuna. Suu mam suu duuna bolow cocoo, saɓak ɦay lay humum boy mamma lay. Buu ma vi Yawena ŋgolo, dlam ti ta cocoo, sa hin vi tam hu buu nammana ni gege?

Ni li ma hoŋ ay eg Bu Suunana

¹² Cecem wanda, Yawe di ana hoŋogi ay egen u hurugi halaŋ, u laara lira, u tiina, u yoo tara.

¹³ Yoorogi hurugi na ɗow, haragi barawi magisinaɗi, hoŋogi ay eg Yawe Loogina. Nam ka tew tew u heɓpa hurum ka ɓeŋ zak zakgi, ɗegee cocoo. Nam yoo tam kay dla cora ɦay.

¹⁴ Sa wi ana nam li ka yoo tam tu olona ni gege, ŋgoo dagan wanni nam hin hin paɗvun mamma kay ɦalla ɦawara u ɓivun ma lira maŋ Yawe Loogina.

Buu ma li laara hin cen Lona mayna

¹⁵ Buugi tokolomma hu Siyon, mbuɗugi tagi ki jivira u laara lira yagi tokka ɓivunna.

¹⁶ Tokogi suuna eg tasiya, yagi tokka teteɗta. Tokogi suu maana kay tasi may, gorzoŋina kay tasi may, kem gorira fun ponara kay tasi may. Sa vi caamba wilina hin ziimba buuna kiyo, cara fi njufna wilira hin ziiɗta buuna kiyo.

¹⁷ Duk ɦoŋ vun goŋga u givin ma togolla, muli suu li ɓivunna u suu ŋgolo suu sunda vi Yawena tii tasi huwa. Asi di ana, «Yawe wi hahaw suu maŋsina, mbuɗ jooŋŋa ki zolonaɗi a suuna pan suu maŋsinaɗi. Ka a suuna di duk tasi ana Loosina ni arageraɗi.»

Yawe hoŋ dira maŋ suu mamsina

¹⁸ Yawe suu jivira ki kay mbas mamba, nam wi hahaw suu mamsina.

¹⁹ Yawe hoŋ dira maŋ suu mamsina, «Na ɗaŋ, an ka ɦagi wana haa, summa u mbul ma heɓma, agi hin hoɓogiya. An hin ka mbuɗugi ki zolo duk suuna a fafaɗtaɗi.

²⁰ Sa ma col ay mbayawna an ɦuɗum ha ki egegi na day. An dikim ha ki hu fulla kay ndaŋgara sooyra. Sa fokom a golomma ha ki hu mbo lumma ŋgolna u maɗiina. Sa ŋgorom a golomma ha ki hu mbo lumma ŋgolna u fiɗigina. Hisna hin cola, lina hin mbuɗ ki hissa. Gasi nam li tlesuu ŋgolona ni namu.»

²¹ Ndaŋgara li ndaanaɗi, li furira kay Yawe li tlesuu ŋgolona ni namu.

²² Lagi ndaaɗi, mbuuri suu bagina, haɗ ma bagina hoŋ ɗuffa wa, ŋgusugina vuɗa, ŋgus tulumma u gugutlura vuɗ lay.

²³ Agi suu hu Siyonna lagi furira u Yawe Loogina. Nam ɦagi mbo lo ma ndolna a suɗugi kira. Nam si yo ma ndolna hu lina kagi ko ay fok jew dayra na.

²⁴ Lina hin oy ki u wana, summa u mbul ma heɓma hin sulul ki kaŋga fun doyogina.

²⁵ An waragagi ki ni basara jufulna ti tlena kira, baara, boboŋora u baa jeena, suu man suu duu suu an cukusi ay kagina.

²⁶ Agi hin tiya, suu ki kagi lay agi hin geleɗegi sem Yawe Loogina, ma lagi dlara jivira egegina. Suu mansina hin ka mbuɗ ki zolo a fafaɗtaɗi.

²⁷ Agi hin wi ana an ka hu Israel, anni Yawe Loogina, lo ma daŋ kaɗi. Suu mansina hin ka mbuɗ ki zolo a fafaɗtaɗi.