JOEL 1 - Boy Lonana

¹ Boy ma Yawe dam maŋ Joel, goŋ Petuelna.

Tira baarina ti tlenara u baktarra

² Humugi haa, agi suu ŋgolona, tinigi humugi jiviya, agi suu kay yam mbassana halaŋ. Dla ndaɗta li ay hu coki magira, ɗowba hu cokira vi somoyogira su?

³ Haɗagi boy namma maŋ goryogiya, goryogi haɗam maŋ goryosiya, goryosi hin haɗam maŋ njafasi ma hin ka daganna may.

⁴ Tlesuu jufulna hinisi kana, baarina tasi kiyo, tlesuu baarina hinisi kana, boŋgoboŋgora tasi kiyo, tlesuu boŋgoboŋgora hinisi kana baa jeena tasi kiyo.

⁵ Dliɗigi ki koloo, agi suu guruɗ u summana, tiirigiya, oyogiya agi suu ci summa halaŋ. Kay sum ma wili wanna hin doorogina ki funugiya

⁶ Suuna mba duu u mbas manda, suu asina saɓak lay, bolow coco lay. Siisi ko sii dlona na, kiriŋisi ko kiriŋ dlona na.

⁷ Nam mbuɗun sene gugutlu manda ki fulla, ŋgusu tulum manna nam paliyam kiyo. Nam hawaɗasi cukusi ki kaŋgaa, gogor kosi mbuɗ ki haɓpa.

⁸ Oya, ko ndal goo wayra u doona egeɗ tii maɗ njufuɗ ma u wayaɗna na.

⁹ Ҥalla ɦawara u ɓivunna ki bulumi hu zira vi Yawera. Muli suu li ɓivunna u doona egesiya, suu sunda vi Yawe lay.

¹⁰ Senena ki ɓeŋiya, ndaŋgara yo taɗu. Sene wa blena ki ɓeŋiya, ii wana kaɗi, mbul ma heɓma daɓ ki wa.

¹¹ Suu horokŋa mbuɗ ki hahawi, sene gugutlura yoo tam lay, kay vuɗ tlesuu hu senena halaŋ ɓeŋ kiyo.

¹² Sene gugutlura so kiyo, hum tulumma yak kiyo, ŋgusu manawra, ndondoyra u ŋgusu ma hu sene nana halaŋ so kiyo. Suu warna halaŋ ka furi oloɗi.

Yi suuna a li laara cen Yawe

¹³ Njunugi doona hurugiya, tiirigiya, muli suu li ɓivunna, yoorogi tagiya suu ŋgal ɓivunna. Mbaagi aya, buurugi cukugi baraw bolna kagiya, suu sunda vi Loonna. Ɓivun u njaf wana u ɦalla sum veŋŋa ki noy hu zira vi Looginara.

¹⁴ Mbuɗugi tagi ki teteɗ u laara lira, yagi tokka ɓivunna, tokogi suu ŋgolona u suu hu mbassana halaŋ hu zira vi Yawe Looginara, hin yagi Yawe.

Buu ma vi Yawena Buu ma ɓeŋga

¹⁵ Ҥawa ɗaŋ. Buu manage. Buu ma vi Yawena mba wa, nam col ay ni ko sa ɓeŋ tlena ko ndal ɓeŋga na.

¹⁶ Tlesuu tira ɓeŋ ki ni aygi wasi u iriygiɗi su, hu zira vi Yawera furira u fanira layɗi su?

¹⁷ Ii wana so ki duk luɓuna wa, kuɓina ɓeŋ ki lay, veerina bow ki lay kay wana ka hurusiɗi.

¹⁸ Ko yoorina oy tasiya, mbutlina ka guruɗta kiyo, kay li ma asi fi haɗna a tira ka oloɗi. Yoori suu gorina miɗ ki lay.

Cenda vi sa jok vun Lona

¹⁹ An yi ha ni egeŋu Yawe, kura ka ŋgal haɗ ma hu fullana kiyo, sin kura ka ŋgal ŋgusugi suu hu senenana ki halaŋ halaŋ.

²⁰ Mbuuri suu bagina lay pereɗ irisi ni egeŋu. Lii voɗ mbona huna so kiyo, kura ŋgal haɗ ma hu fullana kiyo.