JOB 9 - Boy Lonana

Job Boy ma Job dam a hindirana

¹ Job gijaŋ njaɗta di ana,

² Gasi an wi ana dlara ni na daŋ may. Sana ndak a li ɗegee su Lona na ɗow ni nanage?

³ Lini aŋ min ɓak dlara u namu, aŋ di boyna ni na buɓ lay ni, nam ka daŋ boy na dewɗi lay.

⁴ Nammi yal cocoo, neey coco lay. Sa ma ndak a hin vam u dlara ni gege?

⁵ Nammi sa ma ndaki a jok u ɦinira kina, u yaamba nam tooɗ ki lay.

⁶ Nam geŋeɗ ndaŋgara hu liiɗ ma ndaɗ tini huna, uɗ mayra ay ŋgaari ga eŋga geŋeɗ ki bel bel.

⁷ Nam ndaki a doo faɗta bay li kiɗik maɗta lay. Nam ndak a yak ciwciwra huulonara ay ki kaŋgaa.

⁸ Nam dew ni sa ma li huulona halaŋŋa. Nam tuɗ kolo kay mbo lum ma ŋgolona lay.

⁹ Nam li bosokona, li ciwciwra kolo huulona zeɗ zeɗ gi dumussa u tawla kaɗara.

¹⁰ Nam li tlesuu ŋgolo coco suu usi ka wi ko saɗina. Tlesuu mbuɗ mbuɗta bolowo.

¹¹ Nam jak egen tok lay ni an ka wambi. Nam viɗ ni an ka wi li ma nam kal hunaɗi.

¹² Sa ma ndak a hoŋ va ma Lona tlam ha kina ayna ni gege? Sa ma ndak joɓom ana aŋ li na ni megena ni gege?

¹³ Lona hurum ɓeŋ wa ni sa ma doorom ka oloɗi. Nam cuk suu njun u Rahab ful ma duk mbonana ki ga u sem halaŋ.

¹⁴ An may ni hin hoŋom dira ni ana mege? Boy ma an hin fam a dammana ni manage?

¹⁵ Lini anni ɗegee lay ni va ma an a damma ni mege? An joɓmi oora ko saan ma kaan ɓakŋa kanna na ɗow.

¹⁶ Lini an yam wa ni nam ndak a humunu. Ni an ka wi ki gasi ana nam humun wa gawɗi.

¹⁷ Nam lasan ki ni kay dlara an waɗ uɗ kaɗira. Nam dakan ki ni bay an li vaa.

¹⁸ Nam ka hinin a an musuk ki na ndeɗi. Nam hoɓon ki u lassa cocoo.

¹⁹ Lini an a hal ni sa ma njun kanna, nammi saɓakŋa tamba gaw. Lini a kaɓakŋa lay ni sa ma hin a col fokomma ni gege?

²⁰ Lini anni ɗegee lay vunun kaan ɓakŋa kanni namu. An li ka li dla coɗi lay, vunun van u dlara ni namu.

²¹ An gasi ki ɗegee li co kaɗi su? An ka wiɗi lay. Miɗna irinni jiviya.

²² Halaŋŋi fun tasi dew ko an di ay ki jewra na. Lona hin ci suu ɗegeena u suu cona ki ni halaŋ.

²³ Lini mbodomma ndi wa ka ci suu bay corana ni, Lona san u miɗ ma vi suu ɗegeena ni saniya.

²⁴ Nam hin duliyara hu dla cora. Nam dug ii suu kaɓakŋa ki kay dlara. Lini Lona li dla ndaɗta ka nambi ni sa ma hin laɗna ni ge ologe?

²⁵ Buu manna ɓaɗ tam zak zak su suu may suu cuk liŋŋa. Nam daɓ tammi bay wi jivira.

²⁶ Nam tuɗ feɗta na zak zak ko ndal lum cerewna tuɗ kolo kay mbonara na. Ko ndal bakŋa a pii kolo kay ɦaanara na.

²⁷ Lini an di ana an maa yoo manda kiyo, an furiya, an baa irin kiyo.

²⁸ Lassa lan wanda ka mbuɗun ndaana gak gak, an wi ki ana aŋ ka golon ko sa ma ɗegeena naɗi.

²⁹ Anni sa ma cora vanna, aŋ loɓon tan ki ɦawa ni kay mege?

³⁰ Lini an mbus tan ki u yo dlaŋmagi ma haɓma lay, lini an mbus kon ki u sabunna lay.

³¹ Aŋ hin hoŋon ga duk doroɓma olo, baraw manna ka min a cuk egen oloɗi lay.

³² Nam ka sa war ko ndal an na a an hoŋom diraɗi. Aygi halaŋ hin tuɗ ni fun ɓakŋa.

³³ Sa ma ki duk ɦoŋomi a njun kan kaɗi.

³⁴ Sa ma cakan tokolo ki kan ana ndaram lan oloɗina kaɗi lay, ndaana ka lan oloɗi lay.

³⁵ Kay ndaɗta an ɓaka an ka liŋ ndaaɗi, kay an kay tan ndak ka a li vaɗi.