JOB 8 - Boy Lonana

Bildad Boy ma Bildad dam jewna

¹ Bildad ma Kuhana gijaŋ njaɗta di ana,

² Njaɗ maŋga ndaɗta hin daɓmi saɓage? Boy ma cuk ay ki funuŋŋa ko ndal babaana a paɗta na.

³ Aŋ wi ana Lona kaɓakŋa ni kay gasira, ɗegee mamba ka mbuɗɗi.

⁴ Lini goryoŋ lam dla cora egem wa ni nam warakasi ni u coosi ndaɗta may.

⁵ Aŋ taŋga may ni lini aŋ hal Lona, lini aŋ cen ma Saɓakŋa,

⁶ lini dlara co ka egeŋgi aŋ ɗegee, ni nam hin saa ay kaŋ may, nam hin miniŋ ziiŋ ko jewra na.

⁷ Tlesuu aŋ fasi ay fok jewna ni ew, suu aŋ fasi ŋgoo daganna ŋgol suwa.

⁸ Aŋ joɓ kay dlara vi suu ay ki fokoygi jewna, halasi u dlara somoyosi laɗ ay fokka tuwa.

⁹ Aygi ni suu vuɗ kaa wan daŋŋa, ay ka wi vaɗi, iiri maygira kay ndaŋgara ni ko ndal ŋgusna a jakka ɦawa na.

¹⁰ Asi may ni ndak a haɗaŋu, ɓakaŋ lay. Asi ndak a daŋ dlara asi waɗ ay ki fokoŋ jewra.

¹¹ «Cerewna ndak a day ki hu li ma bay mbona su? Vovotna ndak a wul bay mbona um su?

¹² Hu li ma nam ɓo ni ɓooy tu lay, nam so ki ni jew usu ma daŋŋa bel bel.»

¹³ Suu maa Lona kina ni ko ndal ndaɗta na may. Dlara suu ka wi Lonaɗina saaraɗta ba ki ni ɦawaa.

¹⁴ Dlara nam saaraɗta viɗ kiyo, hurum ma tini namma ni ko bay mbaraŋ mbaraŋŋa ɦawa na.

¹⁵ Nam deŋ tam ha eg zi ndaɗta na ni, ndaɗ bow ha ki ni na gaw, ka hin coli kolo oloɗi.

¹⁶ Asi ni ko ndal ŋgus ma ki pii ii faɗta wasna na, humum ki laay kolo kay tlesuu zaari ga umma.

¹⁷ Nam sii sariyam ta ta tew ay ki ga u ɦinira, tuɗ ta ta gol duk ɦinira ay kiyo.

¹⁸ May lini asi paɗam ki hu li ma nam li pii huna wa ni, asi hin gijaŋ njaɗta ni ana asi wam ka dewɗi.

¹⁹ Aŋ gola buu maa vi tlena daɓmi ko ndaɗta na. Va ma daŋŋa hin day ki hu balamasiya.

²⁰ Lona ka hin sa ma ɗegeena kiɗi. Nam ka njun u suu li dla coraɗi lay.

²¹ Nam hin oyoŋ ŋgotloŋ ki u sanda, hoɓoŋ vunuŋ ki u furira may.

²² May suu babali maŋŋa hin mbuɗ zolona. Mbutluɓ ma vi suu cona ka oloɗi.