JOB 7 - Boy Lonana

Job ka tuɗ fok u boyna tuwa

¹ Iirira vi sa warna kay ndaŋgara ni loɓ cocoo. Ndaɗ ni ko ndal sa ma li sunda laɗ u saɓakamba na.

² Ni ko ndal mbaɓuna yoo tam coli ii faɗta, hurum haɗ a kak u ŋgusnara na. Ko ndal sa ma li sunda ka juɓ warak mammara na.

³ Ko ndaɗta na til ma lassa ca ni warak manna. Va ma ka kon hu ndum mandana ni njeŋge mayra lassa.

⁴ Hu li ma an buu ga wa ni an joɓ tan ana, «An hin coli kolo ni saɓage?» Lina ka foɗi lay. An ka mbusuk kay lay manna ɦawa na, du du ta ta fo maɗiira ki u ndaɗta.

⁵ Mbalatan halaŋ ki cuki njufulna. Tan ki taɓagi ni u ndaŋgara na holol. Bakan ka ki ni u mbil ndondona halaŋ halaŋ.

⁶ Iiri manda liŋ zak suu mbuurura. Vi cara paa barawra, ndaɗ tew ha ki fun li ma daɓpa na tok gaw.

⁷ Humuŋ mba gaŋ ana iiri manda ni semeɗna ɦawaa. Irin ka hin a wi jivira oloɗi.

⁸ Sa ma ka wan cemina ka hin a wan oloɗi. Aŋ hin golon u iriŋ lay ni an ka oloɗi.

⁹ Ɗugulla tin ay tani hin paɗ kiyo. Sa ma kal ga u ndaŋgara hin ka hoŋ ay ki kolo oloɗi.

¹⁰ Nam ka hoŋ ay hu ziim oloɗi. Suu mamsina ka wam oloɗi.

¹¹ Kay ndaɗta an ka seŋ vunun oloɗi. An ka hu yoora cocoo. Lini nanagelay ni an di kiyo, hurun haɗ cocoo. An ndak a di kiyo.

¹² Anni mbo lum ŋgolna ɗowba gangan ma duk mbonana a aŋ juɓun un su?

¹³ Lini an di ana, «Lay manna koɗon tanu, buu maa an buu gana seŋen yoo manda.»

¹⁴ Aŋ hin mbuɗun ndaana u doyra dira. Wira an wi tlena nara mbuɗun ki ndaa cocoo.

¹⁵ Lini aŋ faɗan kiyo ni irin jiviya. An minni miɗna. Sura an mbuɗ ki ɦaana wanda.

¹⁶ An ka min a aŋ ɦuɗun buu manna fok oloɗi. Ndakan wa iiri manda ni semeɗna ɦawaa.

¹⁷ Sa warna ni me aŋ a golom dlam ŋgolla cocora nage? Aŋ a tin saa maŋga kam na ni kay mege?

¹⁸ Hu buuna halaŋ aŋ ka gol sana tew tew. Aŋ ka tukum hu lina halaŋ lay.

¹⁹ Aŋ hin a hin golla golonda ki ni saɓa tuge? Aŋ hin hinin a an lik yoyoon gara ni saɓage?

²⁰ Lini an li coo, va ma ŋgeneŋ dukŋa ni mege? Aŋ sa ma gol iirira vi suu warnana. Aŋ hinin a ciiŋga van na ni kay mege? Dlaanda iriŋ nekka ni ko me nage?

²¹ Aŋ min ka a bulumun coonda kiɗi. Aŋ min bulumunda kiɗi ni kay mege? Gola cemi an ka bulum duk ndaŋgara. Aŋ halanni. Ka fan oloɗi.