JOB 6 - Boy Lonana

Job Boy ma Job dam a mbarana

¹ Job gijaŋ ɓakŋa di ana,

² Lini sa a tlan nek hahaw manda an laɗ wandara, lini sa tinin wihaw manda kolo kay va ma ŋga nekka ni,

³ ndaɗ su ki kay ŋgetl ma doŋ lum ŋgolnana. Kay ndaɗta u boy ma an damma viɗ ki irinu.

⁴ Kay mbuurura vi sa ma Saɓakŋa ka kusi egenu. An musuk ay ki ni ŋgis mbur ndaɗta lay. Ndaa ma Lona sunum ay a vi sana gana ka toki ni kan halaŋ.

⁵ Korra ndak a hel hu li ma haɗna ka funuɗna su? Mbutlna ndak tii hu li ma haɗna ka funumma su?

⁶ Sa ndak a ti va ma elelna bay cuk vuvu dukum su? Sena yoom ma haɓma na ni yulum lay su?

⁷ Lini anu ni an ka ndak a ti tlesuu asinaɗi. Ti ma namma an tam wa ni lan tuguɗiira.

⁸ An min a Lona humun ha ni cen manda, ko nam ɦanni dlara an miniɗta.

⁹ Ko Lona luɗun kiyo, ko nam maɗ kom njaan ki duku.

¹⁰ Ni an hin fi saɓakŋa. An hin li furira hu las manda ka daɓbi ndaɗta ka a humun maa ki kay gaɗta vi ma Teteɗnaɗi.

¹¹ Saɓak man ma kay tan ka may su? An wi buurun ma daɓpa a hin di ana an kak iiri na gak gakka su?

¹² Saɓak manna ni ko ma vi ɦinirana na su? Tliw tan u kawi dukum su?

¹³ An u tanda wi ki ana va ma njun kan ka egenɗi. An ki ni sami vay danu, sa ma njunun kaɗi.

¹⁴ Noy ndaraŋŋa ki hu li ma nam ka las nana, ni aŋ noy ki ni ma Saɓakŋa.

¹⁵ Gorsenna noyon ki ko ndal mbo lumma so kira na, ko ndal ɦoŋ ɦoŋ lumma u po lumma so kira na.

¹⁶ Hu li ma lona si cocona, dlaŋmagina law ki lay ni nam oy ki halaŋ may.

¹⁷ Na may hu til zamalla ni nam so ki gaw may. Faɗta ti kam na ni, nam so ki gaw.

¹⁸ Jamballa laara ka ŋguy lumma a hal yona, ndaɗ tin yaɗ ŋgoo bagi hu fulla viɗ ha kiyo.

¹⁹ Suu jamballa suu yow ay hu Temana tuɗ ha hu a hal yona lay, suu koyra suu ay Sabana saa kam lay,

²⁰ hu li ma asi mbay hu fi yo kaɗina ni asi mbuɗ ki zolona.

²¹ Agi lay li u banagina ni ko ndaɗta na may. Hu li ma agi wi dla cora li na ni, agi mbuɗ ki ndaana.

²² An joɓogi ana agi ɦan va aya na su? An dagi ka ana agi yowon ay ki u bege magira naɗi lay.

²³ A suɗun ki ko sa ma ka lasanna, buɗun ki ko sa ma babali mannana su?

²⁴ Gangi u dlara an laɗta ay kiyo. Takangi dla ndaɗta ay ki jiviya, ni an waɗu, an hin seŋ tanu.

²⁵ Boy ma ɗegeena ndak a ɓeŋ huu sa su? Na may dlara agi daɗta bel ni ka u voɗoɗɗi.

²⁶ Boy manna tagi tagi ni nam su? An tii tanni ko lassa landa ɦawaa, hin jak ki ni duk semeɗna.

²⁷ Agi tuɗ paɗ dewna u gogoo ma kuyuna, a gus banagi ma njenjena ki ni nanage?

²⁸ Agi golongi irin kolo gige. Lini an dagi ni dlara kaboyo ni agi ndak a wi layɗi su?

²⁹ Agi saaragiya, ka dlara co kal dukuygiɗi, agi saara an dagi ni gasi manda.

³⁰ Agi fan dlara kaboy kal ha ki funun su? Vunun ka ndak a di hahaw manda kiɗi su?