JOB 5 - Boy Lonana

¹ Tuk taŋ yi kolo ɗaŋ gige. Sa ma humuŋ ayna ni gege? Sa ma teteɗna huulona ma aŋ a yamma ni gege?

² Kay yara ci sa ma giniŋŋa kiyo. Yowmusna ci sa ma ka wi dlaɗɗina ki may.

³ An wiya ni sa ma giniŋŋa ɦiza sariyam ŋgaa ki gaa. An hin gam vunna ziim namma ɓalak ki ɦawaa.

⁴ Goryom hin ki ni sa ma njun kasi kaɗi. Fun li ma kaɓakŋa ɓakŋa vasi ki wa lay, sa ma njun usi kaɗi.

⁵ Suu mayra casina tam tlegeyem suu nam feɗesina ki wa. Asi tuɗ vaa suu hin ha duk wayarana ki lay. Suu hawra ɦurumum bege mamba ki wa.

⁶ Hahawra ka col ay ni ga duk ndaŋgara na ɗowɗi. Lassa ka day ay ni hu senenaɗi lay.

⁷ Sana vuɗ ki ni maŋ lassa. Ko ndal murus kura mun kolora na.

⁸ Lini anu ni an joɓmi maŋ Lona, an tin dlaanda halaŋŋi fokomu.

⁹ Dlara nam laɗta ni ŋgol cocoo. Sa ka ndak a faɗ uɗɗi. Sa ka ndak a ndum dlara mbuɗ mbuɗta nam laɗtaɗi.

¹⁰ Nammi sa ma si mbona ay a laɓ yam ndaŋgara, nam sun yoom ma kolo huulonana ay a si hu senena.

¹¹ Nam col suu hoŋ yasi gana ki koloo. Suu ka hu yoorana nam mbuɗusi suu li furira.

¹² Nam ɓalak dlara vi suu mbeleŋŋa kiyo. Dlara asi ŋga hurusi gin a laɗta hin ɓeŋ ki kosiya.

¹³ Nam vi suu wi dlara ni u daw masi ma asi gunumma tok. Gaɗ masira asi gaɗ suunara ka li va oloɗi.

¹⁴ Faalira mbuɗ ki kasi ndufunda ni ko njeŋgera na. Asi lam voɗta faali ni ko ndal duk ŋgikkara na.

¹⁵ Na may sa ma asi poŋomma Lona suɗusina ay ki kosiya. Nam baɗasi sa ma hawra ay ki fun cifiɗ kosi ma seey cocona.

¹⁶ Nam col suu maŋiina ki koloo. Suu li dla cora nam dugusi vunusiya.

¹⁷ Furira ka kay sa ma Lona gaɗamma. Aŋ Job may ni ŋgul gaɗta vi Lona ma Saɓakŋa Kom Belnaɗi.

¹⁸ Lona ndak a las sana may nam ndak a garaɗam ki lay. Lini nam dak sana wa ni, nam hin njunum mbilimmi nam tok.

¹⁹ Na olo ni, nam ndak a suɗuŋ ki hu las maŋga. Ŋgoo dagan dlara co ka hin a laŋ oloɗi.

²⁰ Hu li ma mayra ndina, nam suɗuŋ kiyo. Duk duu ma cocona nam suɗuŋ iiri maŋga kiyo.

²¹ Nam hin goloŋ ko vun ma cona, ɓalakka hin mbay wandara aŋ ka li ndaa koɗɗi.

²² Ɓalakka u may ŋgolla aŋ sanni saniya. Tlebagi suu bagina aŋ ka li ndaa kosiɗi.

²³ Kay gogoyra ŋgoo bagi hu senenara mbuɗ ki ni banayaŋŋa. Mbuuri suu ŋgoo bagina vi galamba ki u aŋ lay.

²⁴ Aŋ hin wi ki ana heɓpa ka vo hu ziiŋu. Aŋ hin gol sene maŋŋa ni ka fi li ma co huna ndeɗi.

²⁵ Aŋ hin wi ni goryoŋ zul coco lay, njafaŋ hin ɗuf ni ko usu ma hu senenana ɦawa na.

²⁶ Aŋ hin kal hu zulla u maa maŋga ni u furira, ko ndal wa ma neeyna suuna cukum hu veenara na.

²⁷ Gola ami hal u dlara ta ta faɗ ni ko wanda na. Aŋ taŋga may ni huma, wi dlaaŋga ki may.