JOB 42 - Boy Lonana

Hoŋ dira vi Job ta daɓ daganda

¹ Job hoŋ dira maŋ Yawe di ana,

² An wi ki ana aŋ ndaki kay tlena halaŋ. Va ma jak ki kaŋ dew bay aŋ wam kaɗi.

³ «Aŋ di ana an ɓalakaŋ dlaaŋga aŋ min a laɗta kiyo.» An ɓak kay dlara an ka waɗ uɗɗira. Ni gasi daŋ may an li ni coo. An ka hum u dla ndaɗtaɗi lay, ka waɗ uɗɗi lay.

⁴ An di ana, «Humun vunun haa, an min a njaɗa. An min joɓoŋu, aŋ hoŋon dira ay may.»

⁵ An humuŋ dlaŋ jew ni u humun ɦawaa. Cemi ni an waŋ ki u irin wa.

Boy ma daɓ daganna Job 42.7-16 Lona kaɓakŋa kay banayaŋ Jobma

⁶ Cemi ni kay boy man ma an damma zolona van funun wa, an hom wa. Cemi ni an ka ci way oloɗi.

Lona hoŋ Job hu balamam ma jewna Boy ma daɓ daganna

⁷ Hu li ma nam di boy namma maŋ Job di ni, Yawe hin di Elifaz ma Temanna ana, «Cemi ni yaanda hoŋ ki kaŋu, kay banayaŋ suu mbana may. Kay ana agi ɓak ka kan u ɗegeera ko saan ma sunda, Job, ɓakka naɗi.

⁸ «Cemi ni agi yowogi bologi mbutlugina na kiɗisiya, gamlagina na kiɗisiya may. Tuɗugi eg saan ma sunda, Job. Lagi ɓivun ma ŋgalam ki ŋgalina kagiya. Saan ma sunda, Job, hin cen kagiya. An ka lagi co ko agi li wandara naɗi ni kamu. Agi suu ɓak ka ki kan u jiviraɗina, lagi ka ko saan ma sunda, Job, lira naɗi.»

⁹ Elifaz ma Temanna, Bildad ma Kuhana, Sofar ma Naamana li u dlara Yawe daɗta. Yawe hin wi hahaw Job.

Lona hoŋ Job hu balamam ma jewna

¹⁰ Yawe hoŋ tlesuu vi Jobma ay halaŋ hu li ma nam ha ki a cen kay ndarayammana. Yawe ɦam tlena ni sesi mba' mba' su mam suu kom jewna.

¹¹ Gorsemma, gorsem suu gorɓiina, u ndarayam suu wamma halaŋ mbay a golomba. Asi ti funa ay u nam vo hu ziimu. Asi ɗilim irim kay hahawra ŋgolla Yawe mbaramba ay kamba. Asi halaŋŋi suu ɦam gursura may, suu ɦam kaaɗum lorra may.

¹² Yawe paɗ vunum ki kay basara wilira vi Jobpa su basa mayra jak ay ki fok jewra. Timigii mamsina na buɓ buɓ doogo yam fiɗi. Jamballa buɓ buɓ karkiya. Mbutligi suu zumma fun tasi cuɓ cuɓpa na buɓ.

¹³ Goryom suu njufiina kiɗisiya, gorɓiina hindi may.

¹⁴ Goromba ŋgolla nam yaɗ ana Gukgukka, ta mbara nam yaɗ ana Kessiya, ta hindira nam yaɗ ana Keren-Hapul.

¹⁵ Hu mbassa ndaɗta halaŋŋi aŋ ka fi cara jivi ko ndal goryoŋ Jobma naɗi. Busi ɦasi ii joosina ki ni fun tasi u gorsesi suu njufiina dew.

¹⁶ Job li basara dagan dla ndaɗta ni kis duk dok-fiɗi. Nam wi gor ŋgologi mamsina ta ta tew ki kay gor ŋgologi mam suu fiɗina.

¹⁷ Job miɗ ni mbuɗ ki maa cocoo. Nam buu coco kay ndaŋgara ɦay.