JOB 41 - Boy Lonana

¹ Saa maŋga ka ndak a col eŋgi. Wira aŋ wam u iriŋ ɦawa na gora ni aŋ ndi ga ni na gaw.

² Sa ma hurum eŋ ma ndak a duum delem ay kaɗi. Sa ma ndak a col fokomma ni gege?

³ Sa ma kaan balna kan ana an hin warakammana ni gege? Tlesuu ga u huulonna halaŋŋi varanu.

⁴ An ka hin bay ɓak kay mbalatambi. Saɓakam u mbalatamba tini jivira lay.

⁵ Sa ma ŋgoom baraw ma tamma ki fokom wam tam kina ni gege? Sa ma kal ay ŋgotlom hin hoŋ ay kina ni gege?

⁶ Sa ma malam vunum ki kolo kay siimma ni gege? Sa ma wam siim na wi ka liŋ ndaaɗina ni gege?

⁷ Ŋgorom ki kuluɓi ni u wayara cilira ki a mbaarina ko ndal sa ŋguyuɗ ŋguy na.

⁸ Ndaɗ ki cilira kel taɗ ni na ket ket semeɗ ka jak duk hoŋoɗɗi lay.

⁹ Asi halaŋŋi njuni eg tasiya taa ka ndi ki gaɗi lay, irisi ka ɓorow kiɗi.

¹⁰ Nam ercew wa ni welera li ki ko ndal kura na. Nam gol ki kiɗik ko ndal lina a fo ay kira na.

¹¹ Kura mun ay ki funum na yardat. Murus kura njay ay ki funumu.

¹² Ndoosna cuk ay ki hu cinimu ko ndal yona zal ay kuŋgu hu doyrara na.

¹³ Musukum ta cuk ay kira ŋgal kura ni na ŋgik ŋgik gaw. Kura vi ay ki funum na miliw miliw.

¹⁴ Delem saɓak cocoo. Sana wam delem wa ni ndi ki ndaana ni na gaw.

¹⁵ Tliwim ki cili eg tam eŋ cocoo. Nam ki coɓi eŋga na ki ki ka ŋgenɗi.

¹⁶ Mukulum ki eŋga ko ndal gogoyra na. Nam ki saɓakŋa ko ndal do ɦinira ay u gaara na.

¹⁷ Nam col ay wa ni loogi suu daŋŋa liŋ ndaana komu. Asi mbuɗ ki ndaa cocoo.

¹⁸ Ŋgew lay ni ka ti egembi. Sa ka ndak a cokom u saɓpaɗi lay, u kuɓ kuɓi lay, u mbuuruɗi lay.

¹⁹ Nam gol kawina ni ko ndal ŋgayara ɦawa na. Kawi ma tlawna ni ko gu ma ki ti tusnana ɦawa na.

²⁰ Mbuuru mayra munuɗ ayra ka lam vaɗi. Gogoyra asi gikiɗ ay u gewrek gewrekka mbuɗ ki ni usuna ɦawaa.

²¹ Tokolorra irimmi ko ndal usuna ɦawa na. Nam san u saɓpa soo ay a kusumba ni saniya.

²² Kaŋga gudigimmi kawina ka huwa, njaarira ko ndal pontina na. Nam tuɗ ha na ni, kawi namma ɓii ndaŋgara na siw siw.

²³ Nam kal duk mbona wa ni zalam ki ko doyra zal yonara na. Nam mbuɗ mbo lum ŋgolna ki ko mbul ma hisna na.

²⁴ Voɗta nam tuɗ ha hura hin ka daganammi kiɗikka ki huwa. Tusuna day ay ki kolo kay mbona hu li ma gaalina.

²⁵ Hu duliyara halaŋ va ma su kam kaɗi. An lammi ndaa va ka kam na ndeɗi.

²⁶ Nam wi tlesuu dlasi ŋgolona ki halaŋ. Nammi mulna vi vabagi suu dlasi cona halaŋ.