JOB 40 - Boy Lonana

Job hoŋ dira maŋ Lona ta jewra

¹ Yawe ɓak Job dam ana,

² Sa ma min ciwayra u ma Saɓakŋa boy ka kom a di su? Sa ma ci wayra u Lona min a hoŋ dira su?

Job

³ Job hoŋ dira maŋ Yawe di ana,

⁴ Anni ko va kaɗira na tok may ni an di ni ana mege? Cemi ni an baa kon ki funun wa, ka di vaɗi.

⁵ Boy ma an dam kina an ka hoŋ dam oloɗi. An ka di va a yanda mbara oloɗi lay.

Job a ŋga tammi u Lona su? Lona

⁶ Yawe hoŋ dira ay maŋ Job duk babaa ma ŋgolna dam ana,

⁷ Min taŋu, col ko ndal sa njufna na. An min joɓoŋu, aŋ hoŋon dira.

⁸ Aŋ min gasi a bulumun ɓak manna ki su? Aŋ min a tokon dlara ki kan, mbuɗ taŋ ki a sa ma ɗegeena ɗaŋ su?

⁹ Bikiŋ ki ko ma vi Lonna na may su? Deleŋ ndak a bay ko nam bayra na may su?

¹⁰ Kay ndaɗta min taŋ ay u bibiŋilla u ŋgolla, cuk weleɗta u bigawlara ay egeŋu.

¹¹ Tak yaaŋga ki kay suu warna. Hu faalira dewra aŋ hoŋ suu ŋga tasina ki kaŋgaa.

¹² Hin saɓak maŋ namma bulumusi ki hu buu maa dewna. Suu bay vina u suu ka wi Lonɗina aŋ casi kiyo.

¹³ Hu falira dew ndaɗta aŋ tososi ki ga u ndaŋgara, dug gegelay ki ga hu lina vi suu miɗina.

¹⁴ An lay ni hin geleɗeŋu. Kay ɗegee maŋga ɦaŋ saɓakŋa a su kasi ni ndaɗu.

Garyamba

¹⁵ Gola garyamba an laɗ ni anu. Ndaɗ ni tlesuu mbuɗina ɦawaa, ti haɗna ni ko ndal mbutlina na. An laɗ ni ko ndal an laŋga na may.

¹⁶ Gola, ndaɗ saɓak cocoo. Tliwiɗ egeɗ ni ŋgolo coco ɦay lay.

¹⁷ Njawaɗ saɓakŋa ko ndal gu ma sedrena na. Ɓalaɗ njunira ni u ndee ma eŋ cocona.

¹⁸ Sokoɗ saɓakŋa ni ko ndal kawina na. Sok payaɗ ni ko tokolo ɓalaŋŋa na may.

¹⁹ Tlesuu an lasina halaŋŋi sunda an laɗ u bik konda. An dew ni sa ma lasina. An ka golosi, lasi usi ni an lay.

²⁰ Ҥinira kolo dayra ka ɦasi haɗna ay ni ndaɗu, li ma tle bagina luu huna asi ti ay ni huwa.

²¹ Ndaɗ buu ni ga ugi wayara, buu ni duk cerewna hu lokka may.

²² Wayara ka laɗ ŋgusna kaɗu. Uusu ma hu lummana ŋguyuɗ yaɗ kiyo.

²³ Mbo lumma tli ay ni ndaɗ ka ŋgen taɗɗi lay. Mbo lum ma Yurdanna ɓaɗ ay funuɗ ni ndaɗ ka juɓumu, ŋgen taɗɗi lay.

²⁴ Sa ma ndak dug irim a duu u ndaɗ cokoɗ ciniɗna ni gege?

Hurumma ɗowba dragoŋŋa

²⁵ Aŋ ndak a tuɗ ciw hurumma u jambatta su? Aŋ ndak a tuɗ vam sinim ay u zew ma aŋ gikim ha namma su?

²⁶ Aŋ ndak a coom zewna ay cinim su? Ndak a coom ŋgotlom ay u lelew ma koŋŋa su?

²⁷ Aŋ saa ana nam hin ceneŋ ana aŋ wam hahawamu na su? Nam ndak a njaɗ boy ma jivi u aŋ su?

²⁸ Nam ndak a vi vunum u aŋ ana nam kak fokoŋ a mbaɓu maŋŋa ta ta miɗ mamma na su?

²⁹ Aŋ ndak a luu u nam ko suuna luu u gor layagina na su? Ɗowba njunum vo a goryoŋ luu u namba su?

³⁰ Suu ciwim ayna ndak tuɗum ki u sukŋa, ɗowba ɓorowom tliwim tuɗum ki sukŋa zeɗ zeɗ.

³¹ Aŋ ndak a lam bakam ki a fulna su? Aŋ ndak a coom yam ko ndal kulufna na su?

³² Tin koŋ kam ɦawa na ta, humuŋ gaŋ kay njogoɗta aŋ njogoɗta, ka aŋ hoŋ li na oloɗi.