JOB 4 - Boy Lonana

Elifaz Lona ndak a suuna tin hurusi kamu

¹ Elifaz ma Temnana gijaŋ njaɗta di ana,

² «Lini ami min a ɓak u aŋu ni, aŋ ndak a sip boy namma may su? Dlara ko wanda na ni an ka ndak a kak ɦawa na nje bay di vaɗi.

³ Aŋ haɗ dlara maŋ suuna cocoo. Aŋ garaɗ suu tasi maŋina ki lay.

⁴ Boy maŋŋa ɗoɓ suu puk gin gana kolo cocoo. Suu vun givisi tasina aŋ garaɗasi ki lay.

⁵ Cemi ni wanda dlara faŋŋi aŋ taŋga may ɗaŋ. Aŋ mbuɗ ki cemi ni ko ndal sa ma puluɗina na.

⁶ Ndaa ma aŋ lam u Lonana takaŋ va kaɗi su? Huruŋ tini ni kay poy maŋga ɗegeera na hol su?

⁷ «Aŋ saa tu gige. Aŋ wi sa ma ɗegee ma li va kaɗi dlara lam ko ndaɗta nana ni gege?

⁸ Va ma an wamma ni suu may suu zaa dla cora, asi hin feɗ dla coosi ndaɗta ni asi may.

⁹ Musuk Lonara baasi kiyo, semeɗ ma cuk ay ki cinimma ŋgalasi kiyo.

¹⁰ Nam seŋesi ŋgoɓ masira ko dlona nara kiyo, gor dlo ma gorina nam kusum siim ki wa.

¹¹ «Dlona ba kiyo, kay va ma nam vam ka oloɗi. Goryoŋ dlonana njay ki wa.

¹² Boy ma daŋŋa mba fan vo ŋgay ŋgayra. Humun hum gurni ndaɗta.

¹³ Boy namma fanni njeŋgee, lan ndaa cocoo, hu li ma suuna buuri sennana.

¹⁴ An mbuɗ ki ndaa cocoo, tan mbuɗ dlak ki na jik jik.

¹⁵ Vana jak kolo vogon ko ndal semeɗna na. Tlimiɗin yow ki kolo ko tlimiɗ cemcemma na.

¹⁶ Sana coli koloo, an ka wam vogombi may, wi sana coliya, nam col na en, hin gijaŋ ɓakŋa di ana,

¹⁷ Sa warna su Loomma u ɗegeera su? Sana ndak a su saam ma lamma u jivira su?

¹⁸ Lona ka tin yam kay suu mam suu sunda huulonaɗi, ɦakŋi ge, nam ka gaɗ suu mam suu sunda lay.

¹⁹ Gol ko suu warna suu nam minisi u luɓuna ɦawana su? Mbalata sana ni luɓuna ɦawaa. Nam ndak a ɦadlam ki ni ko ndal pipira ɦawa na.

²⁰ Col ha maɗiiya ta ta fiɗigi na ni, nam ndak a luɗusi kiyo. Sa ma hin wi na ni gege?

²¹ Nam njaasi zew iiri masira ki wa ni asi miɗ kiyo, ni kay asi ka wi u dla ndaɗtaɗira.»