JOB 34 - Boy Lonana

Boy ma Elihu dam a mbarana

¹ Elihu tuɗ fok u njaɗta di ana,

² Humugi haa, agi suu wi dlara, agi suu yalna tinigi humugi haa, humugiya.

³ Kay humba hum boy ma jivina ni ndaɗu. Ko ŋgotlna wi jivi tlesuu tiira na may.

⁴ Aygi ni suu a ɓorow ii jivira ki u corana. Waygi dlara ɗegeera duk taygiya.

⁵ Job di ana, «Anni ɗegee, Lona ɓalakan ɗegee manda ki ni namu.

⁶ Hu li ma an hal ɗegeera nam mbuɗunda ki konni kaboyna. Mbuurura mununu hin tok a can ki maɗna, ni an li co kaɗi lay.»

⁷ Sa ma ɦiŋ ko Job nana ni gege? Nam ci panna ni ko ndal yona na.

⁸ Nam tuɗ voɗta ni ko tam u suu li dla cora, poy ni ko tam u suu cona.

⁹ Nam di ana, «Sana ka ndak a fi va kay lira nam li tam jivi ii Lonaraɗi.»

¹⁰ Humungi haa, agi suu saaragi jivina. Lona huu ma co ka hurumbi. Ma Saɓakŋa ka li dlara guniɗi.

¹¹ Kay nam warak sana ni u sun mamba. Nam kaɓakŋa kay sana ni u poy mamba.

¹² Ҥawaa, Lona ka li huu ma coɗi. Ma Saɓakŋa ka ɓalak ɗegeera kiɗi.

¹³ Sa ma daŋ ma ɦal ndaŋgara ko Lona a golla ni gege? Sa ma daŋ ma tinim a gol u duliyara ka su?

¹⁴ Lona u tamba saa ni namu. Lini nam vi musukum hurummi kay tamu.

¹⁵ Tlesuu iirina halaŋ hin miɗ kiyo. Sana hin hoŋ ki ga duk ndaŋgara.

¹⁶ Aŋ sa ma ka u nera huruŋŋa, hum dla ndaɗta haa. Tin humuŋ humun boy manna ha jiviya.

¹⁷ Sa ma ka ŋgaf u dlara ɗegeeraɗina ndak a ti mul su? Aŋ hin ndak a kaɓakŋa kay sa ma ɦizi ma ɗegeena may su?

¹⁸ Sana ndak ŋgul mulna ana, «Aŋ ka wi vaɗi na su?» Aŋ ndak a yak suu ŋgolona ana asi ni suu ci maɗna na su?

¹⁹ Nam dew ni sa ma ka njun u mulɗi lay, ka ɗoɓ dlara vi suu ɦizina su mayra vi suu hawraɗi lay. Kay suuna halaŋ nam lasi ni namu.

²⁰ Asi miɗ ni na zak duk njeŋgera. Suu ŋgolona ba kiyo, asi viɗ ni na gaw. Nam ba mul ma cona ki ni ko sa ka tin egesi kekgi lay.

²¹ Kay Lona irim ka cuki kay poyra vi sa warna. Nam ka njumum sem ma tuɗta halaŋ.

²² Ndufunda ɗowba ŋgus mitna lay ka ndak a ŋgay sa ma li dla coraɗi.

²³ Lona ka gol sana ha fokom na gak gak a tuɗum fun ɓakŋaraɗi.

²⁴ Nam vi suu saɓak cocona ni ka joɓ u dla ay ki kasi joɓi dayɗi. Nam varak sa ma daŋŋa ni na gaw.

²⁵ Dlaasira asi laɗta halaŋ nam waɗu. dikisi kiyo, bulumusi ki ni hu njeŋgera dewra.

²⁶ Nam casi ki ni kiɗik ii suuna halaŋ ko ndal suu ci maɗna na.

²⁷ Kay asi ka min a hum umbi. ka wam voɗ mambaɗi lay.

²⁸ Ni kay ana tii ma vi suu wihawra tew ha ki egemu, Lona hum tii ma vi suu ka lasna.

²⁹ Lini nam seŋ tam ki wa ni sa ma hin kaasi ɓakŋa kasina ni gege? Lini nam kuluɓ irim ki wa ni sa ma hin wasina ni gege? May Lona ka saa kay njaf suuna ko sa warna na.

³⁰ Nam ka min ana sa ma ka wi Lonaɗina kak a mulnaɗi. Ka min a asi ganyam suuna a cukusi hu bay masiraɗi lay.

³¹ Lini sana di Lona wa ana, «An cuk coonda ki wa an ka li co oloɗi,

³² Va ma ŋgay ma an ka wambina aŋ takanna u taŋga. Lini li coo ni an ka li dla ndaɗta na oloɗi.»

³³ Na ni Lona ndak a gam daŋgayna su? Aŋ sa ma gol boy nammana. Saa maŋga ka ni ana mege? Di dlara aŋ saaraɗta ay tu gige.

³⁴ Suu wi dlara halaŋ hurusi ni ko ndal an na. Suu humun vununna ndak a di dlara u yalna.

³⁵ «Ҥawaa, Job ka wi dlara nam daɗtaɗi. Boy mamma tak ki ni ana nam ka ndakiɗi.»

³⁶ Kay ana nam di ni boy ma vi suu vi vunusi a li dla corana. Nam min ana tukka ndaɗta tuɗ ta ta hu daɓ maɗta.

³⁷ Kay ana dla coomba nam cuk yara daŋga ha kayam hu olo. Nam kalaygi dlara ci wayra dukuygiya. Nam zul yakka yak Lonara ha ni zuli na ɗow ɗow.