JOB 30 - Boy Lonana

Lassa ka cemi ni wanda

¹ Cemi ni suu gori suunna mbuɗ san unu, suu an ay panasi somoyosina, an cukusi ki ni duk digini man suu golon yoori mansinana.

² Saɓak masi ma asi lamma a lanni mege? Asi ca ni ka ndak a mbuɗ maa kay ndaŋgaraɗi lay.

³ Lassa u mayra ka maŋasi kiyo. Asi pii ki bagi hu li ma yo ka huɗina. Asi ni duk ndufunda hu ɓalaka u hahawra.

⁴ Asi duɗ ni vuɗ gu ma galakŋa, vek sari tlesuu galaana a tasira.

⁵ Suuna halaŋ dikisi kiyo, soo usi ko ndal suu ci maɗna na.

⁶ Asi buu ni hu li ma li tara ndaa cocona, buu ga hu zulla u zul ɦinira.

⁷ Asi ŋgay tasi ni duk tlesuu siina, humusi delesira tiina ha ki ni duk bubura bagiya.

⁸ Goryoŋ sa ma cona, ni goryoŋ sa ma sem kaɗina. Dikisi ki hu mbassa ni u tokolora.

⁹ Cemi ni an mbuɗ ki ni a vaasi ma soolla. An ki ni vaasi ma njunjunda.

¹⁰ Asi pereɗ ŋgorosi manu, tak ki ana asi ka minin dlaandaɗi. Asi tofoɗon yoyona irinu.

¹¹ Kay ana Lona ɓaɗan mbuuru manda ki wa, mbuɗun ki maŋira. Va ma hin ka egen na ndeɗi lay.

¹² Suuna halaŋ tok vunusi kan a yakan u dlara. Asi halan a njunun senda. Asi gun daw masina ki fokon halan a baan kira.

¹³ Asi kaan voɗ manda kiyo. Gegelay hal ni dlara a lan hawra. Sa ma njun tam kaɗi lay.

¹⁴ Asi coon ii gulumun ma gi kanna kiyo. Asi halaŋ tok ay kan na kuɗulu.

¹⁵ An mbuɗ ki ndaana cocoo. Saɓak ma njun kanna sii ki ko ndal semeɗna na. Saara ana an a suɗ kiyora val ki ko ndal ɗugulla na.

¹⁶ Cemi ni iiri manda ka ɓaɗ ay ki hurunu. An tluɓi cemi ni duk lassa.

¹⁷ Duk njeŋgera ni sokon ka muɗun cocoo. Lassa lasan wanda ka koɗ taɗ duk na ndeɗi.

¹⁸ Lona van baraw manna kom wa. Nam kawan delen ko ndal del baraw ma cuk keleŋ eŋŋa na.

¹⁹ Nam zuɗun duk doropma. Suuna wanni ko ndal an ay buuri ga duk buɗnara na.

²⁰ Loonna an ka yaŋu. Aŋ humunɗi ni kay mege? An col fokoŋu. Aŋ ka caa yaŋ a golonɗi lay.

²¹ Cemi ni aŋ mbuɗ taŋ ki a sa ma lasanna, kay aŋ tin koŋ ma saɓak cocona kan wa.

²² Aŋ fulun ki kolo kay kulum semeɗna. Babaana ka dlaɗan kolo zeɗ zeɗ cocoo.

²³ An wi ki ana aŋ tuɗunni hu miɗna. Ni li ma suuna halaŋ ka tuɗ huna.

²⁴ Hu li ma dla cora ka li nana, sana ka yorok kom koloɗi su? Sa ma ka hu yoorana ka yi kolo ana njunumu naɗi su?

²⁵ Anni ka sa ma li tii u suu ka tiinaɗi su? Anni ka sa ma li njun u suu hahawranaɗi su?

²⁶ Hu li ma an saa kay jivira ni cora hin fanni ndaɗu. An li saa kay kiɗikka ni ndufunda hin mba ni ndaɗ na ɗow.

²⁷ Hurun ka ni u yoora tew tew ka buu senɗi. Hu buuna halaŋ lassa ka mba kanu.

²⁸ An tuɗ ni u yoora na cow cow. Irin ka wi faɗtaɗi lay. Duk suu kisna lay ni an yi kolo ana njununu.

²⁹ An mbuɗ ni a waŋ bayakkana, tuɗ manda mbuɗ ko tanni u erketta.

³⁰ Bakan mbuɗ ki warra cuk ki kaŋgaa. Sokon ŋgalanu, so ki lay.

³¹ Diŋ manna bu ni soolla hahawra. Dif manda bu ni soolla tiina may.