JOB 3 - Boy Lonana

JOB ƁAK DUK TAM U BANAYAM SUU HINDINA Job 3—31 Job di ana nam vuɗ ki kay ndaŋgara na herekŋi kay mege? Job

¹ Ŋgoo dagan wanni Job gijaŋ ɓakŋa ŋgul buu maa nam vuɗ ki kay ndaŋgarana.

² Nam di ana,

Boy ma Job dam jewna

³ «Ҥii, an min ana Lona bulum buu maa an vuɗ hu duliyarna kiyo, njeŋge mayra asi di ana go njufna vuɗara.»

⁴ Buu namma ni buu maa ndufunna. Ka Lona ha kolo day ni caa yam kay buu namma oloɗi. Kiɗik ta ɗi ki hu buu namma kaɗi.

⁵ Ko ndufunda ŋgolla kuluɓ buu namma kiyo. Ko ɗugulla doɓ lokka kuluɓ ki ii buu namma. ɗowba faɗta kuluɓ ki ndufunda hu buu namma.

⁶ Njeŋgera an vuɗ hura li ni a njeŋgera ki wara coco ɦayra. Sa ka a ndumuɗ hu buu tilna oloɗi. Njeŋge ndaɗta ka duk ndum tilna oloɗi.

⁷ Na daŋ may njeŋge ndaɗta hinni njeŋgera va ka huɗira. Sa ka hum della furi huɗi a fafaɗta.

⁸ Ndaɗ hin ki ni a njeŋgera hahawra. Njeŋge ndaɗta hin ki ni maŋ suu li dlara kumuna.

⁹ Njeŋge ndaɗta sa ka wi vel ma fo lina oloɗi. Ndaɗ min li ma fo kina may, nam ka fo oloɗi. Ka wi faɗta a day ayra oloɗi lay.

¹⁰ Kay ndaɗ doo vuɗta an vuɗ ay ki huu sunda kaɗi, hin a an wi hahaw mayra coco wanda u irinu.

¹¹ An miɗ ay ki hu buu maa an kal ay ki ga hu sunna gawɗi ni kay mege?

¹² Asi van ay ki vun givisi na salni kay mege? Hinin a an ci pona na herekŋi kay mege?

¹³ Kak hu njokŋi tan hin koɗa. An hin buu senna. An hin furiya, koɗ tanu.

¹⁴ U mulina u suu ŋgolo suu maliyaŋ ndaŋgara, suu min tlena kolo kay tasina, ni kay a ɓalak kira ɦawaa.

¹⁵ An hin taɓmi ko tan u suu lorra oy usi oy oyna, suu huu ziisi ki oy u gursurana.

¹⁶ Anni ko gogoo ma ndi ki ndina na, ko gorkemba wi kiɗikka kaɗira ɦawa na.

¹⁷ Ha hu li namma suu dlasi cona ka las sa oloɗi, hu li namma suu saɓakasi daɓ kina ka koɗ tasiya.

¹⁸ Suu daŋgayna halaŋ ka koɗ tasiya. Asi ka hum del sa ŋgol ma juɓusi usina oloɗi.

¹⁹ Ha hu li namma kemba u suu ŋgolona ni fun tasi dew, mbaɓuna buɗ ki hu lassa vi malammara wa lay.

²⁰ «Nam hin kiɗikka li kay sa ma ka lasna mbee ni kay mege? Ҥal iirira maŋ suu ka hu yoorana ni kay mege?

²¹ Asi ka juɓ miɗna. Nam ka casiɗi lay. Asi hal maɗna ni suu begera.

²² Lini asi miɗ wa fi zulusi wa ni asi hin li furira cocoo.

²³ Sa ma voɗta ki viɗi irimma, Lona ka golom iiri mamba gak gakŋi kay mege?

²⁴ «Yoora hin konni a vaan ma tira. Simina ɓaɗ irinni ko ndal mbona na.

²⁵ Va ma an lam ndaaramma hin mba kanni nam na ɗow. Va ma an saa gin ana ka liɗina hin li ni namu.

²⁶ An wanni kak man ma en kaɗi. Koɗ ta kaɗi lay. Manda ni yoora sak sak.»